Tuesday, November 15, 2005

الشوارع فى المدينة

الشوارع فى المدينة

المدينة فى الشوارع

بيعرفونا من عينينا

اللى رايح واللى راجع

اللى رايح من بلدنا

اللى راجع لون ولادنا

فجرها بمعنى الدروب

صبحها فرق قلوب

الشوارع ذودتها

ذكرى حلوه من ريحتها

صوت وزحمة

وشوش حزينة

غنوة بلدى

لحن يوصف المدينة

قصة تحكى عن بلادنا

لما تعشق من ولادنا

وولادنا عاشقين صبابة

ايديهم حاضنة الربابة

وتترسم حاجات فى حياتى

بلون حاراتى

معانى بشوفها فى كل الناس

اسامى تغيب و لاتنداس

ويحلالى

تزورنى تملى فى خيالى

امسكها

احبسها

احاول المس اللحظة

اخزن عمرى بكلامى

اكتبها

بجنونى

بعيونى

تتشاف فى الشوارع

ولا اشوفهاش

تصرخلى الساعات

و لا اسمعهاش

فى المدينة

والمدينة فى عينيا

اتوبيسات عربيات

قلب حاير

عجوز يعافر ويا تاكسى

ريحة سجاير

شباب يعاكس

مرايل كحلى فى المدارس

أم تايهة على المفارق

عيون تدور على الصحاب

صحاب تدور على العيون

عصير قصب فى الكوبايات

بنت فرشة تبيع لمون

علب سجاير فى الجيوب

مقبوضة ليه القلوب

طريق سراب

احلام ضباب

نظرة تايهة فى العينين

سطور كتاب

ريحة دولاب

برواز بيحكى عن سنين

مطر خفيف

ليلة صيف

تملى نحلم بالرجوع

كلام لجدى

طرحى لستى

فرحة شارعنا بالسبوع

سكة سفر

اول طريق

نسيت اسلم على الصديق

فرحة ابويا يوم النجاح

اول ميدالية للمفتاح

كشك قديم على الكوريش

صور قديمة

صندوق كزوزة

اخر سهرة قبل الجيش


زيفاجو

8 comments:

saadny_architect said...

حالة شعرية جيدة ..ربما تشعرنا بفرحتك الشديدة عند رؤية الشارع وارتباط ذلك بالجيش الذى يسيطر نوعا على كتاباتك فى تلك المرحلة (تجربة الجيش التى مررت بها من قبل )وتأكيد هذا المعنى فى نهاية قصيدتك يؤكد لنا الحالة الشعرية التى أنت بصددها ...أنت تصف الشارع برؤية جديدة لا يستشعرها الا من افتقده لبعض الوقت حتى تنتبه لتفاصيل مثل بائعة الليمون و أكواب العصير

egyptaya said...

I like your blog. it is very refreshing to see an egyptian who is still an egyptian, in a time when lots of egyptians are trying to forget who they really are!
I will be visiting your blog regularly so keep the good work :)

hesterua said...

saadny
شكرا يا عم والله
بس هو الواحد بيوصف اللى يقدر يجمعه ويلمسه وكل واحد على اده بقى
و تجربة الجيش اثرت فيا كتير وانا لسه فيها لغاية دلوقتى
egyptaya
thank u very much
but there are alot of peuople love egypte very much
all my friends love egypt and dream for egypt alot
فوزى
ممكن الأكتشاف يحصل من الأفتقاد وممكن من كتر المعايشة و الأندماج باردو يا احمد

Ahmed Shokeir said...

واقعية جدا .. ياأحمد
إلتقاطك لكلمات رشيق جدا

hesterua said...

شقير
تشكر يا عمنا
والله بعض ما عندكم بجد

Omar Mostafa said...

أحمد صورك زي خرز السبحة الصندل المتعطرة.. لكن عارف؟ ناقصها خيط يشدها مع بعض، شدها زي ما بتشدنا يا ابوحميد

hesterua said...

عمر حبيبى
وحشانى نصايحك الجميلة قوى
بحاول يا عمر اعمل خيط
يمكن يكون ضعيف
شفاف
بحاول يا عمر
و100000000000000000000
شكر على كلامك الجميييييييييل ده

Anonymous said...

اكيسد فترة الجيش هى الفتره اللى فجرت جواك الابداع دا كله
معظم اللى انت كتبته وحسيته كان فى الفتره دى
اهو طلع بفايده