Tuesday, September 26, 2006

البنت



يا بنت يا اللى الحلم فى عيونك

والضحكة صافية مكحلة رموشك

لو حزن فات مرة على بابك

الفرح جاى مكتوب على كفوفك

والشمس بكره

تحلم معاكى

والقمرة جاية

فى ميعاد لقاكى

ونجوم كتير

وفراش يطير

وقلوب هتحلم

تلمس دفاكى

يا وردة يا اللى الحلم فى ايديكى

ايدين كتير حاولت تفوز بيكى

وايدين كتير لساها ممدودة

وهناك ايدين خايفة تأذيكى

يا شمس يكره

غنى وبوحى

قولى لحبيبتى

بلاش تروحى

وقوليلها انى

عاشق لكنى

مستنى بكره

يقفل جروحى

وقوليلها يا اللى الحلم بيكى

والفجر طالع من بين اديكى

الليل مروح والحزن رايح

والشمس راجعة تسكن عنيكى

احمد

عدسة وليد مننصر

7 comments:

Omar Mostafa said...

ما هو انت يا إما بتحب، يا إما ملاك الشعر متوصي بيك يا ابو حميد :-)

Unknown said...

يا ولد
ياللي خدودك المناديل
ودموعه مبتجفش
ولا بتسيل
حاسس آلام غيرك
وليف ... وقلب
كبير
ياحلم مربوط ف
الخطاوي
ولسه طريق طويل
بكرة تكون انت
حضن يساع الكل
بكرة يكون وتكون
شمس علينا تطل
بالشوق ف غنية
بصوت بنت سمرا
كفوفها محنية

طبعا انا مبسوطة بالتدوينة دى جدا
والظاهر انه ملاك الشعر بتاعي حب يرد عليك ...
قلت لك تعالى يا احمد نعمل دويتو انا بكتب شعر ع السكين

أجدع واحد في الشارع said...

بجد جميله اوى اوى
انت بجد فنان كبير اوى

سامية جاهين said...

"وقوليلها انى

عاشق لكنى

مستنى بكره

يقفل جروحى"

يا سيدي! دي لازم تتغنَّى دي! بس انا مع عمر.. إنت يا إما طبيت.. يا إما طبيت! هيهيهيه
:)

Shaimaa Zaher said...

جامدة جدا :)

hesterua said...

عمر
منورنى يا صاحبى ..حب ايه اللى انت جاى تقول عليه..شكرا يا قمر
جيرو
احم احم
انا يا فندم
مظبطانى انتى

اجدع واحد
شكرا يا باشا ومنورنى

سامية
منورانى بجد فينك
ربنا يكرمك بس لسه مطبيتش والله
لسه مستنى
شيماء
شكرا بجد
تامر حبيبى
واحشنى يا متغرب
لسه ولو فى فرح انت اول واحد طبعا
بس لسه يا واد وانت فاهم اللى فيها
السلام وصل

Anonymous said...

ياعينى ياعينى
مبدع كالعاده يا فندم
راااااائعه بجد وحسيتها قوى
إلى الأمام دائما