كتير ما بسرح فى الخيال
واطير وادندن غنوتى
والحلم لو بعيد محال
أغازله وارسم ضحكتى
وأكتب قصيدة تعيش
وأقول لحزنى مفيش
والفرح لو ميجيش
ساكن فى احلامى
شايفه هناك مرسوم
عارف هقابله فى يوم
من غير عتاب ولا لوم
هيحنى ايامى
وارسم حاجات ياما
ورداية ويمامة
وقرص شمس كبير
وتطول المشاوير
يصاحبنى قرص الشمس
ويمامة تعزف همس
واعشق سما العصافير
واحلم
اعدى
اطير
ولو نهار روح
وقابلنى مليون ليل
عاشق انا وساهر
بتعب لكن قادر
احلم بمليون فجر
وطريق غنوة وبحر
وفرح بكره يزيد
وسفينة جاية بعيد
فيها النهار مولود
وفى يوم اكيد موعود
هقابله فى طريقى
يبللى ريقى
يدينى معنى الحلم
والضم حروفه فى اسم
يطرح غنا واشعار
ليكى يا رايحة معاه
على الشطوط لساه
بيمدلك ايدو
عيدك طرح عيدو
وفرحك اكيد جواه
هتلاقى نص معاه
والنص فى جيوبك
بس انتى مش شايفاه
يمكن ساعات حساه
لكن زحام العمر
خلى العيون السمر
خايفة من المشاوير
من حتى بكره الجاى
شفتى يا حلوة اززاى
من كلمتين منك
عرفت اكتب شعر
وحتى لو مش شعر
يمكن كلام عادى
يمكن كلام فاضى
حتى ولو فاضى
اهو لجل ما تبكيش
وبكره جاى منسيش
والمره دى ليكى
احمد
عدسة.. وليد منتصر
12 comments:
kalam gameel yemla el wa7ed amal we e7saaaaaaaaas
حلوة القصيده ده ..كل سنه وانت طيب
عاشق انا وساهر
بتعب لكن قادر
احلم بمليون فجر
وطريق غنوة وبحر
وفرح بكره يزيد
وسفينة جاية بعيد
فيها النهار مولود
وفى يوم اكيد موعود
هقابله فى طريقى
يبللى ريقى
يدينى معنى الحلم
الله عليك
من كلمتين منها تعمل ده كله؟ مين بنت اللذينا دي؟ دي جامدة جدااا :-)
حلو حلو حلو يا احمد
قد ايه حلوه جدا واحساسها عالى وتلمس القلب
تحياتى ليك
قصيدة حلوة و كلماتها طعمة و هادية
وليد منتصر
ع البركة يا عم...وشكرا ع التظبيط
سهى
منورانى وشكرا بجد
رضوى
فينك...شكرا وكل سنة وانتى وعمرو بخير
غواص
شكرا يا جميل ومنور
عمر
حبيبى يا شاعر
كل سنة وانت طيب يا صاحبى...ومبسوط صدقنى انها عجبتك...والمشكلة انهم كلمتين فعلا ...مش عارف حلوين ولا وحشيين بس كلمتين
وينكى
شكرا يا باشا
حفصة
حلوة طعمة دى
))
شكرا ومنورانى
مبدع يا زيفاجو .. حامل تذكرة سفر للهبوط على قلب أي إنسان و بدون استئذان ..
مش قد كلامك ده انا يا روزاليا
مظبطانى انتى دايما بكلامك
مبروك المدونة
احمد
القصيدة طالع منها صو ت البحر
هي اغنية مش شعر بس
:)
حلو
هايله يا أحمد
بجد انتقاءك لكلماتك حلو جداومعبر جدا
و احساسك عالى جدا
شكرا ليك بجد
الله عليك
بجد زجل جميل جدا
لا أولا نيجى للصورة
متاخدة حلو قوى قوى
و ليها بصمة لوحدها كده من قبل ما تقرأ القصيدة
ثانيا بقى القصيدة
ما شاء الله يا أحمد
الإحساس واصلو الكلمات بتنساب كده بنعومة قوى
أجمل حاجه عجبتنى روح القصيدة نفسها
الأمل اللى بينطق منها
ياااااااااااه ياريت بكرة يسمعك و انت بتتكلم عنه كده و مايخذلكش
ربنا يوفقك
و تحياتى للملهمة عاشقة المكان
Post a Comment