غروب

وقت الغروب

لا بفتكرك....ولا بتعب وأخبى

لأن اللى زيك

لا ينفع يتحب

ولا حتى يتكره....ويتعب قلبى

انت اخرك تتنسى

كأنى معرفتكش

ولا كنت يوم جنبى

أحمد

الصورة ...عدسة الفنان وليد منتصر

فيلم عربى

عدا عليا وساب

وردة فى حضن كتاب

وكلمتين فى جواب

وقال أنا مسافر

جانى بعد غياب

وكأنه مسافرشى

بص فى عنيا وشاف

الوردة مدبلتشى

قرا الجواب بعنيه

قرب ومد اديه

ولسه كان هيقول

لقيتنى قبله بقول

أسف مينفعشى

أحمد

مش عادى

مش عادى

انك تهرب

انك تملى كفوفك حزن وتشرب

انك تسكر حزن وتبقى فى عز الفرح حزين

رايح فين

لأ مش عادى

تبقى فى وادى واحنا فى وادى

يبقى فى عينك بحر الحزن تملى غريق

ليه يا صديق

دا فاضل خطوة بين الحلم وبينك

ليه هتوه فى الماضى وتنسى سنينك

افتح ايدك

مكتوب على كفك عنوان

وفى عينك مولود انسان

لسه بيحلم

لسه بيعرف شكل الوردة

لسه فى قلبه للفرح مكان

أحمد

عمر فتحى

أصوات كثيرة لازمتنى منذ الطفولة , بداية من صوت ايمان البحر درويش و عمر فتحى اللذان احببت دفئ صوتيهما , مرورا بفيروز , ثم محمد منير الذى اقتحم حياتى بقوة فترة المراهقة , وصولا لعوالم مختلفة من الموسيقى انفتحت عليها منذ دخولى المرحلة الثانوية , دائما كنت أستطيع أن اجمع كل ما هو متاح من أغانى من أحب , الوحيد الذى لم أستطع ان أحصل له على أى شئ هو عمر فتحى اللهم الا بعض التسجيلات التى كنت أقوم بتسجيلها من الراديو

وفى يوم

من عشر سنين

بعد درس الكيميا

وتحت المطر

كنت واقف مع يوسف صاحبى

مستنين أخته اللى هتوصلنا بعربيتها

ولما ركبت العربية

خطفنى صوت عمر فتحى من الكاسيت

وهو بيقول

الناس لازم يطلوا ع الناس من حين لحين

كنت دايما بحب عمر فتحى

اتفائل لما اسمعه

بحة غريبة فى صوته

كانت بتحسسنى بدفا جميل

وشجن أجمل

ويومها

كان أول شريط اسمعه لعمر فتحى

عرفت كمان

انه منزلش غير 4 البومات

كل واحد فيهم بيبدأ ب كلمة ...على

على ايدك

على سهوا

خلصت تانية ثانوى

وتالتة

ويوسف واهله راحوا عاشوا فى مصر

عدت سنين

وسنين

ومعدتش اعرف حاجة عن يوسف

ولا أخته

لكن كل ما اسمع عمر فتحى افتكرهم

ومن يومين

بفتح الأميل لقيت رسالة

من حد معرفوش

كان بيعمل سرش على أغانى عمر فتحى

وخبط فى موضوع كنت كاتبه عنه فى منتدى بورسعيد

فقرر يبعتلى

ويضيفنى

ويقوللى انه بورسعيدى زيى

وانه بيحب عمر فتحى

ويتكلم

واتكلم

واكتشفت

ان اخت يوسف

بقت أم يوسف

وان يوسف بقه فى فرنسا

وان الشخص اللى خدت منه اغانى عمر فتحى

صدفة من 10 سنين

بعد عشر سنين

بيطلب منى أغانى عمر فتحى دلوقتى

صدفة برضه

عمر فتحى مات سنة 1986 وهو عنده 34 سنة بسبب ازمة قلبيه نتيجة لمرضه بالشريان التاجى ,

أغنية عمر فتحى يوم 8 ديسمبر مع فرقة المصريين

أغنية عمر فتحى البنت دية من البوم على سهوا

ليا نصيب

ليا نصيب أقابلك صدفة

قبل ما تاخدى القطر وتمشى

قبل ما يخدك بحر الدنيا ولا أعرف فين نتقابل تانى

عمرى ما كنت فى يوم وحدانى

عمرى ما كنت بدمع وابكى

لكنى بكيت لما عرفت اننا بنقابل بعض لأخر مرة

ولما عرفت اننا هنكمل من غير بعض

رعشة برد أجتاحت روحى

رجعت أقول لو كنتى تبوحى

لو كان قلبى يقول ويبوح

مكنتش لما أفتكرك مرة أبات مجروح

مكنتش لما الدنيا تمطر

اتوه واتبعتر وأنا بفتكرك وانتى بتجرى فى طرح البحر وع الكورنيش

لما الاقى الحزن فى عينك أقولك مالك مترديش

لما الاقى ألو تشبهلك...تيجى فى بالى ولا أسمعكيش

ليا نصيب نتقابل صدفة

علشان أحضن فيكى الدنيا وأكمل وحدى وأقدر أعيش

اللوحة من أعمال وليام ويتكر

أحمد

من سنة

منذعام بالظبط وفى مثل تلك الأيام كان لقائى الأول مع صديقى الشاعر الجميل عمر مصطفى , وقبل هذا اللقاء بشهور كانت تربطنى بعمر صداقة الكترونية عبر الأميلات والماسنجر , فعمر الذى تعرفت عليه لأول مرة فى اواخر عن طريق مدونته , واكتشفت فيه شاعر جميل , عندما اقتربت منه انسانيا اكتشفت انه انسان أجمل ايضا , مثقف دون ادعاء , أو كما يقول تعبير وسط البلد فنان بجد

وفى مثل ذلك الوقت من العام الماضى , جاء عمر الى بورسعيد ليلة شم النسيم , وبالفعل كانت ليلة غاية فى الجمال مع أصدقاء عمر الذين اصبحوا اصدقائى فيما بعد حمد وسامح , حيث سهرنا على أنغام السمسمية للصباح وشاهدنا شروق الشمس من فوق حجر ديليسبس

هذا العام كان من المفترض ان نقضى ليلة شم النسيم سويا مثل العام السابق الا ان ظروف حفلة عمر مع فرقة الجميزة أجلت اللقاء

عمر الذى يستعد لأصدار ديوانه الأول , غير انه شاعر جميل فهو ملحن جميل أيضا , وبصفة شخصية بحب له حاجات كتير ومستنى منه اكتر , ومن أجمل قصايد عمر اللى بحبها قصيدة كلام فاضى اللى بيقول فيها

افضّي الكلام

وارميه في قلبك يتحرق

سامع غنا بردان

وشفت نورس غرق

وضحكت من قلبي

وباخبي..

وانا عريان

وجعي عن الأحزان

وباداري وانا دفيان

فرحي البسيط بيكي

غجرية في عنيكي

بترقص اسباني

وبتنشر المناديل

يكفي العياط بالليل

زارعين سُكات أشطر

خللينا نستفسر

عن أول الفراشات

عن ارْوَق الينابيع

خللينا لما نبيع

مننتهيش فجأة

خللينا في الزنقة

نغازل الوسعات

وافتكري ليه في الفرْح

ابدعتي في البسمات

افتكري ليه فعلاً

قدرتي ترضيني

وانا كنت مش راضي

كلام فاضي

وتر السمسمية انجرح

وتر السمسية انجرح

فى الضمة معرفناش

نوح الحمام اندبح

فرفر ولا غناش

حتى الشوارع بكت

والصحبجية اشتكت

لما الحبايب غابوا

فى السكة راحوا بلاش

طار اليمام ولا جاش

وسكن الوجع روحنا

والبوح بيجرحنا

نكتم يجرحنا

وجراحنا توجعنا

تجرحنا اوجعانا

نكتم فتوجعنا

فصاحبنا أوجاعنا

ووجعنا مصاحبناش

أحمد

أطفأت مدينتى قنديلها

الغاء جميع احتفالات بورسعيد بشم النسيم , بسبب حادث انقلاب اتوبيس كلية التربية النوعية

ان لله وان اليه راجعون

يا حلاوتك يا بورسعيد......فى شم النسيم

دائما شم النسيم فى بورسعيد له طعم أخر , طابع كرنفالى شعبى غاية فى الروعة , و اذا ذكر شم النسيم فى بورسعيد ذكر الألمبى , تلك الدمية التى تفنن فى صنعها ابناء بورسعيد واحراقها نكاية فى الأحتلال , حيث يمثل الألمبى نموزج مجسم للورد لمبى المندوب السامى الأنجليزى ,, طوال أعوام , وحتى منتصف التسعينات كان احراق اللبمى طقس مقدس عند ابناء بورسعيد الى ان منعته الحكومة لأسباب أمنية واقتصر الأحتفال على بعض العروض الرسمية فقط دون اى طابع شعبى

صور حرائق شم النسيم فى شارع التلاتينى فترة التسعينات

عدسة المصور...وليد منتصر

وفى عام 2006 تضافرت جهود مجموعة من عشاق بورسعيد لأحياء احتفالات الألمبى مرة اخرى , فكانت مبادرة منتدى بورسعيد وتحت رعاية فندق الباتروس وتم اعداد مهرجان كبير تضمن عودة الألمبى مرة أخرى لشوارع بورسعيد , بينما تم عرض معرض مفتوح للجمهور تضمن صور بورسعيد القديمة على مر العصور والذى نال اعجاب غير مسبوق من الجمهور

الصور عدسة المصور وليد منتصر


السنة دى بورسعيد هتحتفل بشم النسيم زى زمان

سهر واحتفالات وامسيات شعرية وسمسمية للصبح

هترجع تانى الأسر تخرج وتستمتع بمناسبة بنعتبرها خاصة بينا بس وبضيوفنا الكتير اللى بيجوا يشاركونا فيها كل سنة

السنة دى كمان فرحتى اكبر انى هقدر اشارك فيها ولو بحاجة بسيطة أعبر فيها عن حبى للبلد دى

بكره انشاء الله , الحد 8 ابريل , فى قاعة سينما الكروان , وقدام عدد كبير جدا من ضيوف بورسعيد وولادها , هيكون فى عرض فيلم وثائقى عن بورسعيد , تعقبه حفلة سمسمية , يعقبها ندوة شعرية للشاعر الكبير عم محمد عبد القادر , وعم كامل عيد , وبعدها انشاء الله هنقدم أنا ولمطرب الجميل على الألفى أمسية شعرية غنائية من الحان على الألفى وغنائه وكلمات العبد الله , انشاء الله يكون احتفال ناجح ومناسبة ترجعلنا بورسعيد زمان , والدعوة عامة للجميع فى شارع طرح البحر أمام فندق الباتروس

فى بورسعيد

لسه الناس ع الشط سهرانة

رغم القلق

والحزن

رغم القلوب اللى حيرانة

لسه العجوز ع البحر منساش الحاجات

ولسه الشباب ع البحر مجربش السكات

أحمد

وتضيع منى كل ما لقيتك....شكرا يا علوة

من الجميل أن يكون لديك صديق ذو صوت جميل , ومن الأجمل ان يكون لديك ميل لطبقة معينة من الصوت والأحساس فتجد صديقك يمتلك تلك الطبقة ونفس الأحساس , والأكثر جمالا عندما تطلب من صديقك غنوة لمطرب تحبه فيغنيها كما توقعت أن تسمعها , والأكثر والأروع عندما يكون لديك ميل للكتابة وتجد صديقك يبدأ فى تلحين وغناء ما تكتبه وتضعه فى جيبك ,, وهذا ما حدث مع صديقى المطرب الجميل على الألفى فقد تعرفت عليه عن طريق صديقة وفنانة جميلة عرفتنا على بعض ثم سابتنا لبعض فاتصحابنا على بعض فاكتشفنا بعض وعليه اشتغلنا مع بعض ولهذا فكل ما انتجناه من أغانى أو أمسيات شعرية غنائية كان نتاج تجربة جميلة أعجبت أصدقائنا فى بورسعيد فشجعونا لأكمالها كما فعلت الجميلة روزاليا

ومن أكثر الأغانى التى كنت أطلبها من على الألفى فى سهراتنا الدائمة على شاطئ البحر , أو لقائتنا المتكررة مع أصدقائنا من محبى صوت على غنوة فيروز الجميلة حبيتك تانسيت النوم , وغالبا على قرر انه يستريح منى فسجلها التسجيل الجميل ده

حبيتك تانسيت النوم

بصوت على الألفى