متضيعهاش....اهداء للصديق على الألفى

بعد حوار طويل مع الصديق على الألفى وبعد كلام كتير...كتبت له دى...يمكن الحلم يسمع الكلام

هكتبلك غنوة و لحنها

ومتضيعهاش

غنيها ودندن معانيها

ومتجرحهاش

ده كلامى كتبته بأحلامى

واحلامى يدوب حتة سكر

متدوبهاش

غنيها واحلم بالجاى

انده على بكره وغنيله

هيجيلك جرى

ولو يوم راح تزعل

صاحب شمسك

واغزل بدفاها خيوط حلمك

افرح بيها ومتزعلهاش

هكتبلك كوبليه موزون

فيه صورة وقافية

وتشبيه مجنون

راح اشبه حلمك بشبارة

وتايهة فى محيط

وانت الصياد فوق المركب

والبحر غويط

عافر وهتقدر تمسكها

صدقنى بسيط

وهكتبلك كوبليه مكسور

يشبه اوقات لما نثور

ونخاصم أحلام تتأخر

ونعاتب بكره لو اتأخر

ولا تتأثر

غنى الكوبليه وهوزنهولك

عمر الأحلام يوم هتخونك

طول ما انت فى قلبك لسه الصدق

حتما هترق

وهتيجى تخبط على بابك

تضحك وتدق

افتح و هتخدك بالأحضان

تغسل حزنك

وتبات فرحان

وتقوم م النجمة تكلمنى

وتقول من تانى ارجع اكتب

هنغنى كتير

وهكتبلك غنوة تلحنها على اى مقام

سيكا وبياتى أو عجمى

كلها انغام

لكن غنيها بأحساسك

قسسم

عررب

سلطن ناسك

خلينا نطير

خلينا نرفرف ونعاند قدامنا كتير

وهكتبلك كوبليه لحبيبتى

هسألها واقولها ليه غيبتى

ليه سيبتى الحزن فى عينك ليه
ليه يفرح قلبك وتخبيه

عينى رسايلك ليا فى شنطة

وارسمى وردة وقلب وبطة

وشموس علشانى

بكره قمرنا هيوصلها

عارف عنوانى

و اخيرا هكتبلك كوبليه

وهقولك لو يوم راح توصل متطنشنيش

ولا تعمل ناسى ومش شايف ومتعرفنيش

ولو مرة جيتلك بقصيدة اياك تحرجنى

خدها ولحنها

وغنيها

واياك تكسفنى وتنسانى

وتقولى مفيش

أحمد

هذيان....للشاعر البورسعيدى خالد توفيق

مشهد1

حجرةعارية
وسرير
وع الكومدينو صورة قديمة ابيض واسود
طرابيش ومنشة
وست عجوزة
وناس ووشوش
لمين ماعرفش
علي كرسي قديم
نامت قطة سودا وكانت رعشة
في ركن ما
ع الحيط صرصار بيجري
ومؤنث صرصار في شنابه متعلقة
ويمكن كان شايلها
او راكبها
.........أو
في آخر الطرقة
كانت واحدة باهت لونها
بتشتغل كانفا
وبكرة صوفها
تجيني أحدفها
بتغزل والا بتغازل
وانا نظري اضعف من عينيا
صاحب البنسيون
بصوته الاجش
فتح دولاب القباحة
طلع كام موس حلاقة ومشط
وسرحني

مشهد 2

علي زهرة البستان
قطتين من اغبي مايكون
جربت أقول الشعر
كنت هاتقيأ
Kintمستفزة اللي بتشرب سيجارة ماركة
وتلعب الدومينوعلي صدرها المشدود
بفعل الثقافة

مشهد 3

تمسح يابيه :
أمسح ايه لاسمح الله :
كل شئ في الزمن ده بيتمسح
الدماغ
والدمعة
والذاكرة
والرؤية
والتواريخ
والالفة
والحواديت
الهوية
والماهية
والوجود
حتي في التواليت
هي راخرة بتتمسح
كل ده مايهمنيش :
المهم تمسح جزمتك

مشهد 4

ناس كتير نامت علي الرصيف
ناس كتير ماتت علي الرصيف
وطفلة عيونها مابتحلمش

مشهد 5

المرايات مطفية
مش عارف اشوف شكلي النهاردة
سندوتش المكرونة بالعيش
من عند عم علي
كان طعمه مش ولابد
بس الفلوس والجوع
ولاد ستين كلب

ولسه فيه كتير مشاهد
بتتشاهد

عدسة ..العبد لله

قلم

حبيبتى

حبيبتى

فى وسط الحزن تتبسم

أشوف فى عنيها أحلى كلام

فى عز الجرح تتحزم

وترقصلى

أقول يا سلام..جميلة حبيبتى فوق الوصف

تعاندها ظروف وظروف

تخطيها متزعلشى

يقابلها بحور م الخوف

تعديها ولا تخافشى

وترجع تحضن الدنيا

تقوم الصبح من بدرى

تفتح عينها ع الأحلام

لسه الحلم جواها

ساكن روحها عمره ما نام

وتجرى تطل م الشباك

تصاحب أحلى عصفورة

وتبعتلى فى ديلها سلام

تنادى لنسمة مولودة

وتكتبلى معاها كلام

بنتواعد تملى ساعات

ونتباعد كتير أوقات

لكين دايما

بنتلاقى

وراح نكتب كتير حكايات

مكنتش تعرف

مكنتش تعرف

أنه يعرف

أنه فاهم كل حاجة

أنه رغم البعد بينهم

كان كاشفها

وهى ما بتعرف كسوف

هو خوف اللى ماليها

تنكشف قدامه اكتر

وكل خطوة تبديها

كان بيضحك من بعيد

وهو شايف النهاية

اللى جاية من جديد

فصول

قالوا

يمكن عشان تغير الفصول

حاول يصدق

لكنه كان حاسس بنفسه

كات غريبة

انه يربط دى بدى

قلم

كقبلة طفل رطبة

تترسخ فى العمق

مثل رائحة بيوت الجمعة

وعبق أستيكة عتيقة

أتشبث بلحظة خريفية محتبسة

أتوافق مع اللغة

سلام داخلى

لرؤية متزنة

تعانق التئام الروح

أتجرد من معنى ما

من رواسب حقد قديم

أتطهر من هالات العشق

وأترك القلم

يأخذ مساره

بينما اتشبث بالحافة

تارة مثل نباتات الضل

وتارة مثل دوار الشمس

أحمد

يا حلوتى

يا حلوتي لا تغضبي ... إن كنتُ أخطأتُ الطريقة

فأنا صــــغير لــم أزل ... أهوى الأحاديث الرقيقة

أهوى العصافير الشجية ... والفراشات الطليقة

إن شئتِ زخرفة القصائد ... بالحكايات الرشيقة

فلتصفحي فالشعر يبعد.. خطوتين عن الحقيقة

للشاعر البورسعيدى....أحمد الأقطش

سلمى ...تغنى لفيروز فى عيد ميلادها

سلمى....فى ساقية الصاوى....23 نوفمبر

بعد النجاح الكبير الذى حققه حفلها الأول..حلم..تقيم سلمى حفلها الثانى يوم 23 نوفمبر القادم يمشيئة الله...ستغنى سلمى مجموعة من أجمل أغانى فيروز بمناسبة عيد ميلاد فيروز...بالأضافة الى بعض أغانيها الخاصة...كل من سمع سلمى وهى تغنى ممنوع من السفر للشيخ امام او وهى تغنى لفيروز اغانى مثل البوسطة وشط اسكندرية عرف انه امام صوت من اجمل وارق الأصوات واكثرها احساسا.....فى حفلها الأول غنت بالأضافة لأغانيها الخاصة اغانى امنير وفيروز وعايدة الأيوبى ومارسيل خليفة وسعاد حسنى..وفى حفلها القادم ستغنى لفيروز فى عيد ميلادها

للحلم أجنحة....للرائعة جيرونيمو

من أجمل ما قرأت للجميلة جيرونيمو

http://smsmamosaic.blogspot.com/

ولما أفرد الجناحات
وأحاول أطير
...... مبقدرش
واقول أمشي
مع الماشيين
وأتصالحي مع السكة
....... مبعرفش
أكون واحدة .... في وسط كتير
لكن أعرف .... أكون وحدي
وكل الكون في جوايا
وغير أحلامي ... وجنوني
....... مبفهمش
يقولوا دماغها ماشية عكس
يقولوا نظرها راح انطس
يقولوا زي ما يقولوا
...... مبتألمش
ومن أفكارهم الخايبة
.....أنا مازعلش
اكون مكسورة .... محنية
وأطاطي ... عشان الريح
انا مقبلش
أنا قلبي
لحلمي أسير
وحلمي بالفضا مربوط
وطول ما انا لسه
بحلم أطير
يعيش الفرح
وحزني يفوت
وطول ما انا لسه بحلم أطير
يكون أملي
ويأسي يموت

حكاية عادية جدا

أنا وأنتى

حكاية عادية جدا

حكاية أى حد

بدأ الكلام بورد

وخلص زمان بوعد

لكن ودى الغريبة

لسه بحسك قريبة

مع طلعة كل فجر

ولما الديك بيدن

بحن ليكى جدا

اكتر من أى حد

وأفتكر ملامحك

وبلوزتك أم ورد

وشعرك الفلو

وبرفان معرفش اسمه

ورقة كلمة ألو

وأقول سنين وعدت

القى الشمس اللى طلعت

وفى حضنها النهار

تقول دا كان هزار

واقول قلب بجد

))

حكاية عادية جدا

حكاية كل حد

احمد

والصورة ...عدسة العبد لله برضه

اهداء لواحدة بتحب المكان ده

كتير ما بسرح فى الخيال
واطير وادندن غنوتى
والحلم لو بعيد محال
أغازله وارسم ضحكتى

وأكتب قصيدة تعيش
وأقول لحزنى مفيش
والفرح لو ميجيش
ساكن فى احلامى

شايفه هناك مرسوم
عارف هقابله فى يوم
من غير عتاب ولا لوم
هيحنى ايامى

وارسم حاجات ياما
ورداية ويمامة
وقرص شمس كبير
وتطول المشاوير
يصاحبنى قرص الشمس
ويمامة تعزف همس
واعشق سما العصافير

واحلم

اعدى

اطير

ولو نهار روح

وقابلنى مليون ليل

عاشق انا وساهر

بتعب لكن قادر

احلم بمليون فجر

وطريق غنوة وبحر

وفرح بكره يزيد

وسفينة جاية بعيد

فيها النهار مولود

وفى يوم اكيد موعود

هقابله فى طريقى

يبللى ريقى

يدينى معنى الحلم

والضم حروفه فى اسم

يطرح غنا واشعار

ليكى يا رايحة معاه

على الشطوط لساه

بيمدلك ايدو

عيدك طرح عيدو

وفرحك اكيد جواه

هتلاقى نص معاه

والنص فى جيوبك

بس انتى مش شايفاه

يمكن ساعات حساه

لكن زحام العمر

خلى العيون السمر

خايفة من المشاوير

من حتى بكره الجاى

شفتى يا حلوة اززاى

من كلمتين منك

عرفت اكتب شعر

وحتى لو مش شعر

يمكن كلام عادى

يمكن كلام فاضى

حتى ولو فاضى

اهو لجل ما تبكيش

وبكره جاى منسيش

والمره دى ليكى

احمد

عدسة.. وليد منتصر

الصبح

بنت

عندها ست سنين

حاضنة بكفها

كف اخوها الصغير

اللى عنده اربع سنين

وبتعدى بيه شارع كبير

وقاسى

ومليان زحام

لكن فى عنيها الطيبة

مزروع بستان حنان

عمر الشارع

ما يقدر يقلعه

البنت

اللى عندها ست سنين

لما يزيد الزحام

ويعلى صوت الكلاكسات

وتطلع الأيدين من العربيات زى الأخطبوط

متخفشى

وكفها النونو

يضغط بشويش

كف اخوها الصغير

ينسى الخوف

ويرفع عنيه

يطل فى عنيها

وهو حاسس

ان الدنيا كلها

بزحامها

وناسها وقسوتها

مش هتقدر تخطفه

من البنت دى

اللى عندها

ست سنين

احمد

عدد 2 تاج

بناء على طلب المدون الجميل والعزيز محمد هشام عبية
http://nefsy.blogspot.com/

عدد 2 تاج زى الفل ومعلش ع التأخير يا عم محمد
وعلى طربقة انور وجدى ...الأول

تاج المدونات

هل انت مستكيف من مدونتك شكلا وموضوعا ؟

هو شكلا مكيف قوى بس ناقصنى اعرف اززاى احط الأسم يوصل للنك على طول وهعرفها قريب انشاء الله , لكن من ناحية الشكل مقدرش احكم وان كنت طبعا اتمنى انها تكون عروسة

هل تعلم أسرتك الصغيرة بأمر مدونتك؟

عندهم فكرة انى بقعد اكتب حاجات من اللى كنت غاوى اكتبها وارميها فى الدرج , واخدوا بالهم انى بقى ليا عن طريق المكان اللى بكتب فيه اصحاب وناس وحركات واخويا الصغير اللى هو مشروع شاعر غنائى عمل مدونة وقفلها عشان ميسرقوش حاجاته وكده


هل بتتكسف تقول لاصدقائك عن مدونتك؟

اتكسف من شو بس , هو اى نعم فى ناس بتقول دى ناس عقلها مسليها بس برضه يسلينى احسن ما يتعبنى

هل شقلبت المدونات حياتك للاحسن ؟

الى حد كبير , وكانت سبب انى اعرف مجموعة من الناس غيروا شوية فى سكة حياتى , واهم حاجة انى رجعت اكتب تانى وسواء اللى بكتبه حلو او وحش عجب او لأ الا انه فى الأخر حاجة بتحسسنى بسعادة كبيرة

هل تكتفى بفتح صفحات من يعقبون بردود فى مدونتك ؟ ولا مقضيها وسارح سواح في مدونات خلق الله؟

اول معرفتى عالم المدونات كان العدد قليل وكنت شغوف قوى بيه و كنت انا فاضى ..دلوقتى يا دوب على قد الناس اللى اعرفها واللى

بتزورنى

ماذا يعنى لك عداد المتطفلين.. هل تهتم بوضعه فى مدونتك ؟


اول مرة اسمع عنه بس طبعا اكيد الواحد هيكون مبسوط لما الناس كلها تزوره

هل حاولت تخيل شكل اصدقائك المدونين؟

لأ خالص بس اللى كنت بفكر فيه ان فى ناس شبه كتابتها قوى وناس ملهاش علاقة بما تكتبه

هل تشعر ان مجتمع التدوين مجتمع منفصل عن العالم المحيط بك ام متفاعل مع احداثه؟

مجتمع التدوين فى اوله كان معلق على احداث المجتمع , ولكن اولا واخيرا المدونات بقت زى المجتمع , فيها اللى بيكتب عن نفسه واللى بيدشن لنموزج مقتنع بيه و اللى بيعلق على اللى بيحصل واللى عاملها منتدى يظبط فيه بنات وتظبط فيه ولاد واللى بتدور على عريس واللى بينشر انتاجه القصصى والشعرى واللى بيمارس حرية ما من الأفكار اللى ميقدرش يقولها بصوت عالى

هل ترى فائدة حقيقة للتدوين؟
طبعا ..وبشكل شخصى استفدت

هل يزعجك وجود نقد بمدونتك؟ ام تشعر انه ظاهرة صحية؟
لأ طبعا لأنى عارف قصة جحا والحمار وان مش ممكن حد يرضى جميع الأطراف

هل تخاف من بعض المدونات السياسية وتتحاشاها؟ هل صدمك اعتقال بعض المدونين؟
ابدا ..واعتقال المدونين موضوع متوقعه من زمان عامة انا حاطط اسمى وصورتى واسامى اصحابى فى بورسعيد والعنوان ميتوهش

هل فكرت فى مصير مدونتك فى حال وفاتك؟
فى ناس كتير تعرفى شخصيا عن طريق المدونات وفى ناس قريبين منى اللى هما بلدياتى خوليو واحمد فوزى هما هيصرفوا , يعملوا بوست عنى وتفضل المدونة ذكرى لحد ما كان بيكتب نفسه وعن بلد كان بيحبها

آخر سؤال: تحب تسمع ايه؟
و الله الأيام دى بدور على حاجة لعمر فتحى واللى عنده يبعت و ميتكسفش
خمس مدونين يقومون بهذه العملية الجراحية بعدي
الدعوة عامة

الثانى
تاج الجوانيات

هل أنت عقلاني اكثر أم عاطفي؟
كل البنات اللى عرفونى بيقولوا انى عقلانى قوى وده طبعا هروب من تعبير تانى , لكن عن نفسى ماشى انا عقلانى لكن كتير قوى واكتر

من كتير من النحانيح بتكون دموعى قريبة فى حالات متستحقش

صف شخصيتك فى خمس كلمات

انا كما ترانى ويرانى الناس

إذا كان لكل إنسان شبيه من الحيوانات..أي حيوان يشبهك؟
عمو عمو ....ينفع طيور ؟

ماهو لونك المفضل؟
الأزرق بدرجاته

هل أنت اجتماعي أكثر أم منعزل؟
اجتماعى ولكن بحاول استغنى عن شوية خجل مش عاوزين يسيبونى

ماذا يشكل أصدقائك بالنسبة لك؟
رفقة عمر

هل أنت مرتبط بعائلتك؟
جدا ..برغم المشاكل اللى بتمر وتباعد الأفكار الا اننا كيان واحد جدا

هل أنت عصبي أكثر أم هادئ ؟
هادئ لكن بحالات ..لما بتطلب ضحك مبفصلش

هل تفضل فصل الشتاء ام الصيف؟
الشتاء عشق قديم ..وله نكهة بحسها وبتنادينى ..وشتاء بورسعيد ميتوصفش

متى آخر مره بكيت فيها؟ولماذا؟
من 4 تيام وكان موقف مسنى قوى

من يلعب هذه اللعبة مكاني؟
اللى نفسه فيها يتفضل ورمضان كريم يحب اللمة

البنت

يا بنت يا اللى الحلم فى عيونك

والضحكة صافية مكحلة رموشك

لو حزن فات مرة على بابك

الفرح جاى مكتوب على كفوفك

والشمس بكره

تحلم معاكى

والقمرة جاية

فى ميعاد لقاكى

ونجوم كتير

وفراش يطير

وقلوب هتحلم

تلمس دفاكى

يا وردة يا اللى الحلم فى ايديكى

ايدين كتير حاولت تفوز بيكى

وايدين كتير لساها ممدودة

وهناك ايدين خايفة تأذيكى

يا شمس يكره

غنى وبوحى

قولى لحبيبتى

بلاش تروحى

وقوليلها انى

عاشق لكنى

مستنى بكره

يقفل جروحى

وقوليلها يا اللى الحلم بيكى

والفجر طالع من بين اديكى

الليل مروح والحزن رايح

والشمس راجعة تسكن عنيكى

احمد

عدسة وليد مننصر

مدينتى فى الشتاء

مدينة شتوية

عبارة قديمة

قالها أحد عشاقها يوما

فمدينتنا فى الشتاء

زهرة برية

عروس غجرية

تنتظر على ناصية العالم

وسط الماء

وصول الشتاء

ويأتيها الشتاء

برائحة البرد

ومواسم السمان

وملامح عشاقها الكثيرون

من جديد

يأتيها الشتاء

فتودع صيفا مضى

بزحامه وصخبه

وقصصه الكثيرة

يأتى الشتاء

فيرحل الغرباء

وتنسى اللهاث

وتتذكرنا من جديد

تعرفنا نحن

يعرفنا بحرها

وبيوتها الخشبية القديمة

تنادينا طرقاتها الشتوية

الرمادية

مثل غمامة

تعانق بحرها الشتوى

الخالية

مثل قلب طفلة

لم تعرف الحياة بعد

كل عام

انتظر الشتاء

أعرفه من بحرها الرمادى

من ازدحام سمائها

بأسراب السمان الحزين

من رائحة اول حبة مطر

تداعب شوارعها القديمة

والبازلت الأسود اللامع

ينادينى تحت القمر

كى ارقص الرقصة الأخيرة

تحت المطر

احمد

عدسة وليد منتصر

ليل وبحر وقمر

صورة صورهالى الجامد جدا وليد منتصر

المكان .. شاطىء بورفؤاد بالقرب من الحاجز الشرقى

الزمان .. امبارح.. احدى ليالى القمر

وكنت بنسمع الجميلة جدا عفاف راضى وهى بتقول لمين يا قمر

rapidshare.de/files/31591960/_____________ae_______.mp3.html

عايدة الأيوبى......على بالى..من زمان..

عايدة الأيوبى ...تجربة جميلة ..وذكريات كتيرة ..لوقت قريب كنت فاكر ان قليلين اللى بيسمعوها ...لكنى اكتشفت ان فيه كتير قوى صوتها بيمثلهم ذكريات جميلة

فى اول حفلة للمطربة الجميلة سلمى ...كانت أول غنوة بدأت بيها الحفلة هى غنوة (من زمان) ومش هنسى رد فعل الجمهور كان عامل اززاى ...كل الناس افتكروا عايدة الأيوبى وصقفوا قوى تحية ليها

وده لنك غنوة من زمان بصوت سلمى صوت وصورة

http://rapidshare.de/files/31547653/_.mp3.html

كل يوم...اول افلام أحمد فوزى..الخميس القادم بساقية الصاوى

يعرض الخميس القادم الموافق 7 سبتمبر الفيلم القصير... (كل يوم).. وهو التجربة الأولى فى الأخراج لأحمد فوزى , احمد قام بكتابة سيناريو الفيلم الذى يتناول حياة مجموعة من أطفال عزبة الهجانة , حيث يحلق هؤلاء الأطفال بخيالاتهم بعيدا عن القبح الى مجالات الغناء والنحت والرسم الواقع المحيط بهم

الفيلم انتاج جمعية ابنوس للأمومة والطفولة

احمد فوزى من مواليد بورسعيد 1982 , ويدرس السيناريو بمعهد السينما والفيلم من انتاج جمعية ابنوس للأمومة والطفولة

مده الفيلم ..15 دقيقة

الفيلم سيناريو واخراج ..احمد فوزى

تصوير ..تامر نادى وبيشوى عاطف

مونتاج ..احمد جودة

صوت..احمد جمال

تمثيل ..محمد عادل

غناء وتعليق ..فاطمة عادل

شجن

بعيدا عن كل الأسوار

بين عروق أشجار الصفصاف

فى المساء على الشرفة المتعانقة أوراقها باللبلابة

وجهك وأشجار الصفصاف و الأخضر القاتم

و الليل الذى يهبط هادئا بعيدا عن هذه المدينة

وأنا أخذ طريقى اليك عابرا كل الغابات

وكل سنينى رميتها ورائى عابرا كل الأسوار

لا أرى الا

وجهك والمساء

عدسة وكلمات وليد منتصر

ساعات احب حاجات ميحبهاش غيرى ..فى الرايحة فى الجايات بغنى مع طيرى

عصفور
عصفور علم شباكي القديم
بلون السنبلات
وف زحمة التجديد
...بيضوا الشباك
فمــــــــــــــات
حدود
انتي الحدود المحالة التخطي
وانتي اللي خطي
حدد ملامحك
محبة وفتية
غابة غبية
كلبة نبيه
وكل اللي فيَا
بيعشق مافيكي
ويكره مافيَا
حياة
كنا في الأوتوبيس
أنا وانتي والزحام
كتلة ضجيج
الفراغ فاصلة تضيق
والجسد سد الجسد
ورا سد الجسد سد
الجسد سد سد الجسد
وسد الجسد الجسد سد
الجسد سد الجسد
سد سدالجسد
سد
الجسد
ولآخر سد كنتي انتي
ولامعة في عنيكي ابتسامة
باردة باهتة
فجأة
وقفت اشارات الشوارع
ونزلتي في أول محطة
قلب وناس
جسدي شارع
ومنحني آخري لشارع
وقلبي جدار في شارع
مروا ناس من أوله
وقفوا لحظة
إتبولوا

العنوان لمجدى نجيب

كلمات شاعر بورسعيدى رائع اسمه خالد توفيق

عدسة وليد منتصر

يا حلو صبح

السابعة و النصف صباحا , أمارس هوايتى القديمة فى قفزالسلالم , بينما يصلنى صوت الشيخ محمد رفعت قادما من راديوهات قريبة ممتزجا برنين منبه ما من احدى الشقق القريبة , اخرج من باب العمارة , تستقبلنى نسمات صباح بورفؤادى طازج , لم تلوثه بعد ادخنة العوادم وسحب مصانع الأسمنت التى يتأمرون لأقامتها وحرماننا من تلك النسمات للأبد .....الشارع ما زال خاليا , الى من بواب احدى العمارات يمارس عمله اليومى فى غسيل السيارات .
تبدأ الوجوه المعتادة فى الظهور, وشوش أراها يوميا فى رحلتى للعمل , اراهم وقد بدأوا فى الظهور فى تتابع , يأتون من الشوارع القريبة , و النواحى المختلفة لبورفؤاد , لتجمعنا فى النهاية معدية واحدة , تعبر بنا الى بورسعيد حيث أعمالنا .
دقائق بسيطة هى التى نتشارك فيها معدية واحدة , تلك الدقائق البسيطة خلقت بينا علاقة ما , تقابل الوشوش يوميا فى نفس الميعاد أنشأ بيننا الفة غريبة , و الأغرب ...أننا لا نتبادل التحية أو السلام , لكن لو حدث وتقابلنا فى مكان اخر , ووقت اخر ..نتبادل فورا الأبتسامات والتحية ولو بهز الرأس من بعيد , دائما ذلك الشيخ المتدين , يقف ساكنا ووجه لمياه القناه بينما يقرأ فى المصحف الشريف , وذلك الشاب المتأنق الذى لا يكف عن العبث فى تيلفونه المحمول , دائما هم ...زملاء الصبا والدراسة فى مدارس بورفؤاد وجامعتها , اقابلهم تحت شمس الصباح الذهبية , لأكتشف صلعة تلمع فى الشمس أو عدة شعيرات بيضاء تقول فى شماته ان 25 عاما فى الدنيا ليست بالوقت الهين كما تظنون .
و هى ....دائما هى من تشاركنى الرحلة الى نهايتها , عملها يقع على بعد 10 امتار من مكان عملى , تعمل فى محل هدايا واكسسوار وكل ما هو ب 2.5 , أراها وقد وقفت على سور المعدية , تنظر ناحية البحر فى شرود , تتابع طيور النورس و هى تغطس فى مياه القناه , باحثة عن اسماك كانت كثيرة يوما , أراها من ذلك النوع من الفتيات واللاتى كأنما خلقوا للحزن , ورغم ذلك لا تسمح له بالسيطرة عليها , كلما أراها اتذكر تعبير الزهرة البرية , بسيطة وعنيدة , رقيقة ومثابرة , جمالها لا يندرج تحت بند الملابس و الشعر والعيون , و لكنه فعلا جمال يندرج تحت بند جمال الروح , والكاريزما الجميلة .
ينتشلنى من افكارى وصول المعدية لبورسعيد , تنطلق الأقدام والسيارات والدراجات منتشرة فى المدينة الصغيرة , بينما اتوازى انا وهى فى طريق واحد يخترق ميدان المنشية مرورا بالثلاثينى , اتابعها بعينى , تمر على احد الأكشاك , لتشترى كعادتها اليومية 4 بسكوتات فيرى , تكمل طريقها , ألى ان تصل لتلك المتسولة العجوز على ناصية الميدان , تميل عليها , تعطيها قطعة بسكوت مع ابتسامة رائعة ,
تكمل طريقها , وعندما تصل للمحل أكون قد وصلت لمكان عملى , أتابعها و هى تفتح المحل , تبدأ فى اخراج البضاعة ووضعها فى اماكنها المخصصة , بينما تتحاشى نظرات بعض المارين وكثير من اصحاب المحلات المجاورة , ومع حلول التاسعة يصل مسعود , ومسعود هو اخر المنضمين لقائمة المجاذيب فى بورسعيد , يقولون انه ظهر فجأة فى المدينة امام محطة القطار , جاء فى قطار ما , وتركه القطار ومضى , يخاف منه الجميع بسبب مظهره وتصرفاته , الا انه يكون فى قمة وداعته امامها , يمرعليها يوميا فى نفس الموعد , تعطيه هو الأخر قطعة بسكوت , وكوب بلاستيك من الشاى الذى تصنعه فى المحل , يأخذ الشاى والبسكوت وينتقل للجانب الأخر من الطريق يأكل فى صمت بينما تتابعه بابتسامة هادئة , تظبطنى متلبسا بالنظر لها , تلاحظ نظرات الدهشة فى عينى , تختفى الأبتسامة من على وجهها وهى تقول ((طيب قوى والله )) ثم تختفى داخل المحل

صفارة انذار

كانت الساعة قد تجاوزت السادسة مساء , عندما دخلت المنزل عائدا من العمل , تبادلت التحية مع امى , وبينما همت هى بتحضير الطعام ذهبت لأرتداء ملابسى , وشعرت برغبة فى الوقوف فى الشباك , الشارع كما هو , نفس النكهة الصيفية المعتادة والممتزجة بنسيم العصر ..أطفال يرتدون بدلة الكاراتيه فى طريقهم للنادى ..واخرون يحملون اجذاء من المصحف الشريف فى طريقهم للمسجد حيث دروس التحفيظ...بينما الجانب الأكبر من اطفال الشارع بدأوا فى التجمع لممارسة نشاطهم اليومى فى لعب الكرة فى الشارع..اتابع الجيران فى جلساتهم الصيفية داخل البلكونات , والتى ما تبدأ غالبا بعد العصر , دائما الحاج احمد فى بلكونته الأرضية , واضعا كوب الشاى على السور , وصوت ام كلثوم يأتيه من الراديو القريب بينما يتلذذ بالسيجارة الوحيدة المسموح له بتدخينها يوميا , وبينما ينشغل عم حسن برى الزرع فى البلكونه تمارس زوجته هوايتها اليومية فى الحديث مع جارتها فى البلكونه المجاورة....اتذكر مقولة كثيرا ما يرددها احد اصدقائى....لا جديد تحت الشمس
ينتشلنى نداء امى من بعض الأفكار الوجودية...أبدأ فى تناول طعامى بينما تجلس هى امامى نفس الجلسة اليومية , اصابعها تداعب يطريقة لا ارادية قطعة خبز على المنضدة , بينما تخبرنى كعادتها اخبار فاتتنى فترة وجودى فى العمل....(( خطوبة هبة بنت ام هبة بوم الجمعة الجاية , الست كلمتنى ومأكدة عليا...احمد لازم ييجى )) ...وكالعادة تخبرنى بحدوث عطل ما فى التلاجة يستلزم قيامى بما يلزم ...أسألها عن لبنان وهل هناك جديد...فتخبرنى ان سوريا حشدت قواتها على الحدود ثم تردف ...ربنا معاهم يا رب.

وفجأة انطلق صوت صفير عالى جدا , وقريب جدا , بل ومقبض جدا جدا , يختلف حتى عن صوت السفن الذى اعتدناه نت السفن المارة فى القناة , نسرع للبلكونة لأكتشاف سر ذلك الصوت , لنكتشف ان كل الجيران وسكان الشارع يشاركوننا نفس الفعل...تتضح الرؤية اكثر , هناك سيارة من المحافظة , واخرى من الدفاع المدنى ...قاموا بتثبيت صفارة انذار فوق سطح المدرسة المجاورة , بل وقاموا بعمل انذار تجريبى
لا أستطيع وصف حالة الناس فى ذلك الموقف , الرعب كسى الشارع و الأنقباض غطى البيوت ....الناس فى بورسعيد تختلف عن أى مكان اخر ...لقد ذاقوا طعم الحرب عدة مرات , عرفوا معنى الدمار , وجربوا طعم اقسى شئ فى الحرب...التهجير...ما زالت ذكريات التهجير ومرارته ماثلة امامهم
وبدأت حبال الحديث تتصل عن الحرب...رغم ضعف الأحتمال...بدأ الرجال والنساء فى استعادة ذكريات التهجير المريرة....تحكى امى حكايات اعرفها جيدا , سمعتها مرارا منها ومن جدى وجدتى , معنى التهجير وليس الهجرة , تفرق الأهل والأصدقاء , وقف الحال , رحلة عذاب من بورسعيد فدمياط ثم القاهرة وانتهاء بالدقهلية , تحكى عن الغربة و الألم , عن الشوق لبورسعيد والحنين لرائحة البحر
ومع غروب الشمس , كان موضوع الصفارة هو حديث المنطقة , الخوف مسيطر وشبح ذكريات الهجرة قائم , قال خالد ....فى أول الهجرة , كان الناس يسافرون لمعارفهم فى المدن المجاورة ...بجمعون اشيائهم ويصفون اعمالهم , ومع مرور أول شهر أصبحت الهجرة تتم بشكل اجبارى , اصبحنا تحت رحمة قوات الدفاع المدنى عديمة الخبرة و بقايا الجيش المنكسر ...يبتلع ريقه ثم يكمل قائلا ...تخيل ..( تجمعنا كلنا عند المحافظة , قالوا محدش يجيب شنط معاه , ركبونا عربيات نقل من بتاعت الجيش , محدش عارف رايحين فين ولا حتى العساكر , كنا فاكرين العربيات رايحة مكان واحد , عشان كده اتفرقت الأسر بين العربيات , وتعدى ساعات وتلاقى بيقولك انزل هنا فى المدرسة دى وتلاقى نفسك فى المنوفية واخوك فى عربية تانية كملت للمنيا , ومحدش بيجاوب) .....أصعد للمنزل من جديد , تنتابنى رغبات متعددة واحاسيس مختلفة , أشاهد التيلفزيون و لا أستقر على قناز واحدة , أشعر بحاجتى الملحة للنوم , اذهب لأغلق الشباك استعدادا للنوم , وبينما احكم اغلاق الشيش تصطدم عيناى بمشهد جديد فوق سطح المدرسة المجاورة .....صفارة انذار

فى القاهرة

و كمان فى القاهرة , يوم 21 يوليو الجاى هيغنى فى الساقية صوت من اجمل الأصوات اللى سمعتها وأثرت فيا , وهو صاحبى وصديقى وبلدياتى (على الألفى)..على الألفى بيغنى فى فرقة اسمها ستيب باى ستيب هتعمل حفلة فى الساقية يوم 21 يوليو , وهوكمان دلوقتى مستنى نتيجة الكلية عشان نقوله يا بشمهندس انشاء الله

ودى غنوة ثلات سلامات صوت وصورة

http://rapidshare.de/files/22000275/Movie_0001.wmv.html

و دى غنوة خاصة بعلى اسمها وحشانى كتير

http://www.uploading.com/?get=VZFMDHUF

فى بورسعيد

" مهرجان بورسعيد الأول للتصوير الفوتوغرافى "

فى الفترة من 21/7/2006 حتى 5/8/2006 وذلك بقاعة المعارض بقر ثقافة بورسعيد وبالتعاون مع موقع بورسعيد أون لاين ، ويشارك فى المهرجان أكثر من 70 فنانا فوتوغرافيا مصريا يمثلون كل من : نادى الكاميرا أتيليه الأسكندرية ، صالون مصر للتصوير الضوئى ، نادى الصيد المصرى ، مجموعة Egypt photographers ، موقع بورسعيد أون لاين.والمهرجان هو الأول من نوعه فى مصر الذى يجمع هذا الكم من المصورين المصريين ، ويتضمن يوم الافتتاح جولات للمصورين فى بورسعيد لتصوير معالمها ، وجولة بحرية ، ليكون

المهرجان بمثلبة احتفالية فوتوغرافية وملتقى فنى تحت سماء بورسعيد يجمع المصورين من مختلف المحافظات .

ثلاثية الحلم والحزن

اهداء الى من اعطتنى معنى الحلم

المقطع الأول

لو هتحسى فى لحظة بوحشة
أوعى تقوللى..... فى يوم انا وحدى
لأ....مش وحدك
ياللى فى قلبك مالكيش زى
و أوعى تقولى انه مجاش
لأ......منساش
هيفضل فاكر
علشان بكره بتاعك جاى

لأ مش وحدك
والبنوتة الساكنة عيونك
لسه بتحلم
والفنان الساكن روحك
لسه بيرسم
لأ مش وحدك

و فرضا يعنى
مرة مشيتى فى سكة لوحدك
ولو لساعااااااات
صوتك فين......؟
دا الأحساس أندر م الماس
بيجمع ناس
ويعزف لمة
ويملى السكة الفاضية حااااااااجات
لأ.........مش وحدك

المقطع الثانى

مش لوحدك
انتى ليه
قلتهالك مرة وكان لسه مجاش
قلتهالك انتى حلم متنساش
و هتلاقيه
حلم طاير فوق يرفرف
شوق فى عينه كأنه يعرف
انه اللحظة دى هيخطف
احلى وردة تحس بيه

مش لوحدك
لسه فاكرة ؟
قلتهالك مرة من شهور
قلتهالك
شفت جوه عنيكى نور
جوه قلبك خير بحور
حلم عمره ما حاشه سور
شفت بكره
شفت غنوة تايهة منا من سنين
شفتها رجعت معاكى من يومين
عشتها
وعشنا حلمك
وانتى ليه
وانتى فيه
مش لوحدك

المقطع الثالث

شدى حيلك

واللى سافر راح يجيلك

ماشى يضحك

احلى ضحكة من عنيه

راح تقولك

انتى همسة فجر صاحى

شمس ساكنه نور براحى

انتى احلى وردة

خضرت بستان جراحى

احمد

مش دلوقت

بحبك

بس مش دلوقت

وبحلم

امتى يجى الوقت

وأقولهالك بعلو الصوت

بحبك موت

وليكى اشتقت

احمد

مراكب الغروب

قال العجوز عندما لاحظ تأملى للشمس وهى فى رحلتها الأبدية نحو الغرب والأختفاء تدريجيا فى قلب البحر ,((, قبل ما تقف على الشط , , وتمد نظرك لبلاد الخواجات , لازم قبلا تمد نظرك لأهلك وأصلك )) , كان يكررها كل فى مرة أتى لزيارته , دائما كما هو , فى نفس المكان البعيد عن المدينة , ونفس الجلسة العتيقة , ((نهاية بورسعيد يا ياكلها البحر , يا تاكلها النار )) كان يرددها كلما سأل عن تفضيله الحياة فى (الجرابعة), كان قد ورث ذلك الخوف التقليدى من أهل المدينة القدامى , عندما كان البحر , جارهم القديم , , ومصدر رزقهم , يثور عليهم , فيهجم على المدينة ويغرقها , ويدمر البيوت الخشبية القديمة , التى وان نجت من ثورته , فان طبيعتها الخشبية تأبى الا ان يدمرها حريق من ان لأخر , لم اصدق او اتخيل موضوع الغرق , الا عندما ثار البحر منذ عدة سنوات , و اقتحم المدينة مغرقا الشوارع ويصل لعمق كيلو متر فى وسط المدينة . تعودت ان اذهب للعجوز مع جدى , أعرف انه قريب لنا بشكل ما , اراه كما تركته فى نفس الجلسة الأبدية امام البحر , او بجانب البحيرة , , يتركنى العب بجواره , اكنشف هذا العالم المثير , , وبين كل فترة واخرى يهتف باسمى , يسألنى عن اللغة الأنجليزية , , يبدأ فى كتابة حروفها على الرمال , و هو يحكى كيف كان يذهب ل (الأسكولة) التى انشاها الأنجليز لأبنائهم , ليتعلموا فيها مع المصريين نفس المناهج التى يتعلمها اقرانهم قى انجلترا , يتركنى انطلق لشاطىء البحيرة , , أصنع مراكب ورقية , واتركها للأمواج تعبث بها , تأخذها للمجهول , , اتابعها بعينى , , و , اتسائل هل من الممكن اناقابلها من جديد , , أعود للعجوز , أجده يصنع لى الطائرات الورقية , و السنانير البدائية , , يعلمنى كيف أطعم السنارة , متى اخطفها فى الوقت المناسب , تعلمت ان اتوقع نوع السمكة قبل ان تظهر فوق سطح الماء , سمكة السيجان عنيدة , , تحاول الهروب فى كافة الأتجاهات مخلفة دوامات مائية دائرية , الشبارة(البلطى) سمكة مسالمة وخنوعة تلتقط الطعم فى سكون , تحاول الغوص داخل جحورها ثم ما تلبث ان تستسلم للأمر الواقع , , يحكى لى عن الهدايا التى كان البحر يبعث بها فى ليالى القمر , عندما كان الماء ينحسر عن اغلب الشاطىء , فتظهر على رمال الشاطىء تستطع فى ضوء القمر , ,, ما زلت أذكر طقوس الصيد و المسماة ب (العس)حيث تنطلق عدة مراكب صغيرةفى ظلام البحيرة, وعلى مقدمة كل فلوكة شعلة صغيرة , وتتقدم المراكب بهدوء نحو أماكن نصب الغزل والتحاويط فى المراحات, وتبدأ فى المرور على كل موقع لجمع الأسماك منه ,أو من الجوابى المتناثرة , , لا أزال اذكره وهو يتحدث عنى الى جدى , ما زالت نبرات صوته المميزة تصيبنى بالشجن عندما اتذكره و هو يقول لجدى ((الواد مندوه يا حاج, , باين فى عنيه مندوه من البحر )) كان يثق فى البحر وقدراته , , , , تعودت ان اذهب معه لذلك الشاطىء الغربى البعيد , حيث الضريح المقام لأحد اولياء الله الصالحين و الذى يدعى (المغربى), أتذكر عندما مرض احد احفاده , أصر لأخذه بعد الفجر للشاطىء , , , ما ذلت أذكر ذلك اليوم , ما زلت أسمع صوت تهشم القواقع البحرية تحت اقدامى ممتزج مع رائحة البحر اليودية وقت الفجر تصلنى وانا أتابع بعينى أثار الكابوريا الوليدة على الرمال صانعة فى رحلتها الفطرية نحو البحر خيوط رملية تورثنى شجنا ما , ذاد منه صوت السيارات القادم من الطريق القريب , أتذكره و هو يجلس على ركبيته , يهمهم بأدعية ما , يضع الصغير على يديه المعروقتان , يجعل موج الفجر يداعب جسد الصغير , بينما عيناه تتابعان أسراب السمان القادمة من الشمال , , يعود بنظره للصغير , يضمه فى بطانية اعددها مقدما , يعطيه لأمه , يعدها بأنه مع شروق يوم جديد سيكون بخير , يعشق البحر , , عمله فى البحر , حتى الذنوب التى اقترفها فى حياته يعتقد أن سببها البحر , يحكى عن رحلاته فى العالم أثناء عمله فى البحر ,, يحكى كيف أدمن الخمر ليقام برودة الجو , يحكى عن توبته , والتى جائت عن طريق البحر أيضا , حيث موانىء الحجاز, حيث أول مرة يحج ويعتمر, أول مرة يزور قبر الرسول عليه الصلاة والسلام , ما زالت نبرات صوته المختلطة بصوت امواج البحر و هى تضرب الشاطىء تملىء كيانى, وعندما يرهقه الحديث , فيمصمص شفتاه قائلا .....البحر دنيا كبيرة

أحزان ليلية

وحيدا فى طرقات ليلية , لا يشاركنى فيها الا ضلى , وقمر ضاحك , أعود لمنزلى مستسلما لجنون الطقس الربيعى , تارة يداعبنى برياحه الساخنة , وتارة يجعلنى أنكمش من صفعات الهواء البارد , أهرب بعينى للقمر المكتمل مثل الرغيف , القريب جدا من مياه القناة الهادئة , لم أكن رومانسيا يوما , لم أكن خيالى , لكنى دائما أرى فى ملامحه المكتملة رسالة ما , من بعيد تصلنى تلك الحشرجة المعدنية المألوفة , فأعرف أن أحد المساجد القريبة يستعد لأطلاق أذان الفجر , ما زالت الشوارع خاوية رغم انطلاق صوت الأذان ممتزجا بصوت خطواتى العبثية , صانعا معنى ما للشجن , أقترب من ناصية الشارع الأخير , يلفت نظرى خروج رجل عجوز , ضخم ,من أحد البيوت القديمة , يستند على يدى فتاة نحيفة , ضعيفة , رقيقة و حزينة جدا , ترتدى الأسود , من النظرة الأولى عرفت أن حزنا ما يسيطر على هذه الأسرة , أقترب أكثر , , الرجل يهمهم بأدعية ما , والفتاة تكتم أهات المعاناة , أقترب أكثر وأكثر , أصبح فى مواجهتهما , أكتشف أن قدم الرجل اليمنى مقطوعة , ربما حديثا جدا, الرجل ضخم والفتاة ضعيفة , والمسجد بعيد , أترك ابتسامة باهتة تتسرب على ملامحى المرهقة وأنا أعرض على الرجل مرافقته للمسجد , معللا ذلك بذهابى للمسجد انا الأخر , يقف الرجل ,ينظرلى نظرة زائغة , ترتعش شفتاه فى عصبية , يشكرنى بصوت مرتجف يعلو تدريجيا ليقول ما معناه انه ما زال يستطيع مساعدتى ومساعدة عشرة من امثالى , ينفعل أكثر , ينهرنى , يطردنى , أبتعد بسرعة , بينما الفتاة تحاول تهدئته و هى تشيعنى بنظرة أخيرة ,معبرة , تحمل بمعانى متباينة ما بين الأعتذار , والرجاء , والخوف , ....و الحزن

انت فاهمنى كويس

فى يوم من الأيام

راح اكتب قصيدة

وان مكتبتهاش انا حر

الطير ماهوش ملزوم بالزقزقة

صلاح جاهين

ماشى يا عم جاسر

بناء على طلب المدون الجميل جاسر شمس

http://gassershams.blogspot.com/

افتح أقرب كتاب اليك على الصفحة 18 سطر 4

للأسف مفيش كتاب عشان انا فى سيبر

مد ذراعك اليسرى قدر ما تسطيع

ماشى

ما أخر ما شاهدته على التلفزيون

برنامج العاشرة مساء عن اللى حصل فى دهب

بدون أن تسترق النظر تكهن كم الساعة

الساعة 2 بالليل

و الأن كام الساعة فعلا

الا ربع

بأستثناء صوت الكمبيوتر أى صوت تسمع

كالعادة فى السيبر

واحد على يمينى بيظبط واحدة من القاهرة ومفهمها انه من الهرم

وواحد على شمالى بيحاول يقنع واحد فى البالتوك بوجهة نظر ما دينية

متى خرجت من المنزل للمرة الأخيرة وماذا كنت تفعل

من شوية

قلت اطل على الأميل والمدونة واتمتع بأخر شوية شتا فى بورفؤاد

أى موقع كنت تتصفح قبل مباشرتك لهذه الأسئلة

موقع بورسعيد أون لاين

ماذا ترتدى الأن

جينز وسويت شيرت اسود...بس شيك جدا

هل حلمت ليلة أمس

مش حلم بس صورة حد معين بتزورنى كتير اليومين دول

متى أخر مرة ضحكت

من شوية اول ما قريت اسمى عند جاسر شمس

ماذا فوق جدران الغرفة حيث تجلس

ورقة بتقول ممنوع فتح مواقع مخلة بالأداب

هل رأيت شىء غريبا مؤخرا

بدأت أشوف ناس كويسين ومحترمين كتير جدا

ما رأيك فى هذا الأختبار

لزوم ما يلزم

ما اخر فيلم شاهدته

امى كانت بتتفرج على فيلم صغيرة على الحب , ولما سمعت صوت سعاد حسنى مقدرتش اقاوم

وقعدت اتفرج , وضحكت وهى بتقول للدمرداش عندك عقدة الطبيييييخ

اذا اصبحت فاحش الثراء فماذا تشترى

قرية سياحية فى مرسى علم (حلم قديم جدا), وبعد كده عندى حاجات كتير قوى نفسى اعملها

اخبرنى شيئا اجهله عنك

حاجات كتير يمكن انا لغاية دلوقتى معرفتهاش

اذا كان بامكانك تغير شىء واحد فى العالم بغض النظر عن المعاصى والسياسة فماذا تختار

مش عارف

جورج بوش

ترس فى عجلة

لو كان وليدك الأول فتاة فماذا تسميها

مريم , سلمى

لو كان وليدك الأول صبيا ماذا تسميه

يوسف , عمر

قد تفكر يوما فى العيش بالخارج

لغاية دلوقتى لسه

ماذا تتصور ان يقول لك الله عندما تقف بين يديه

مقدرش اجاوب لأن رحمة ربنا فوق تصورى

اربع اشخاص تمرر لهم الدور

جيرونيمو , دعاء كراون , ابو شنب , الغائب الحاضر عمر مصطفى

و الف شكر يا عم جاسر

ملامح

أشعر بالحنين لشىء ما , لا أدرى ما هو , حتى الحنين نفسه لا أدرى أهو الحنين لشىء ما , أم خوف و انتظار من المستقبل والمجهول , بشكل ما أشعر بالحنين لشىء معين , وبشكل اخر اشعر انى سأعرفه عندما أقابله

أحاول أن أكتب , وعندما لا أستطيع أحاول الحفاظ على تفاصيل معينة , اتمنى وضعها فى برواز الذاكرة

عندما داعبت انفى رائحة الذرة المشوية , تذكرت الصيف , وتذكرت ذلك الصيف البعيد فى الأسكندرية عام 1989وتلك النسمات الليلية المحملة بالعرق والعطور , أكاد أرى نفسى جالسا فى الشرفة , أتابع تدريبات خالد ابن الجيران على الدرامز , حيث يتدرب مع فرقته فوق سطح منزلهم الصغير , اكاد اسمع من جديد أغنية ضمينى والتى غالبا ما كان يعقبها أغنية غربية عرفت فيما بعد أنها لكينى روجر

أشعر بالحنين لبحر الشتاء , ومفردات الوحدة والسكون , الا اننى ما البث احن لرائحة الشوارع والناس

اتذكر أبيات لصلاح جاهين لاعرف اين قرأتها...فى يوم من الأيام راح اكتب قصيدة....وان مكتبتهاش انا حر ...الطير ماهوش ملزوم بالزقزقة

الصورة من عدسة الفنان وليد منتصر

سفارى

المشهد الأول

الزمان: نوفمبر2001 الساعة الثانية عشر ليلا

المكان : ساحل البحر الأحمر بالغردقة امام فندق الشيراتون القديم , فى احد القوارب المطاطية ..ذوديك

القارب المطاطى يشق مياه البحر الأحمر وانا بداخله متجها من اليخت الذى اعمل به والقابع على مسافة عشرين مترا من الشيراتون القديم فى طريقى لأحد اليخوت القابعة فى الميرديان على بعد مائة متر

عند وصول القارب لليخت وعلى أثر صوت المحرك يظهر من اليخت احد الشباب مستفسرا

يقول :خير .....أقول خير ان شاء الله ....انا من يخت البرنس ماندو من طرف الريس حسن سفاجا , وكنا عايزين شيف من عندكو عشان عارفين انكو مريحين الأسبوع ده

الشاب متسائلا عن نوع الرحلة ...ديلى و لا سفارى .....قلت سفارى ان شاء الله

الشاب ..اتفضل ..الشيف فى البر بيجيب الزوادة وجاى على طول

ثم مد يده ليأخذ حبل القارب منى ليربطه فى مؤخرة اليخت

عند دخولى اليخت لم يلفت نظرى فيه شىء مختلف عن اغلب يخوت المنطقة ...نفس الديكور ونفس علب البيرة الفارغة المتناثرة هنا و هناك , بعض زجاجات الخمور ما ذالت موضوعة على الأركان , وكثير من المجلات الأجنبية ملقاة باهمال فوق الأرفف وعلى الأرضيات , ومن فوق السن ديك شابان يلعبان الطاولة ينظر لى احدهما بلا مبالاة

ثمة شاب يجلس على حافة اليخت مقطعا الكلمارى لأجذاء صغيرة استعدادا للصيد

جلست بجوار الشاب الذى بدأ فعلا فى الصيد

قلت ..كعادة اهل المنطقة من العاملين فى البحر..السلام عليكم يا ولد عمى

قال .. وعليكم السلام , ثم تأملنى للحظة ثم قال....شكلك مش من الغردقة ولا القصير لحقوا يبهتو عليك بلغوتهم

قلت ..عادى يعنى , انت لهجتك مش غريبة عليا...انت منين؟

قال..مش تسألنى الأول اسمك ايه

قلت .. معلش , انا احمد من بورسعيد

قال .. سيد من بورفؤاد

قلت بدهشة .. معقولة يعنى جيران ...بس اززاى مااقبلتكش فى بورفؤاد

قال ..عشان تقابلنى فى وسط البحر الاحمر الساعة 12 بالليل

قلت .. دا انت فيلسوف يا ريس سيد

قال .. اه الريس سيد ليسانس اداب علم نفس

قلت .. واكيد مستنى الحتة الخواجاية وتسافر زى كل الحلوين اللى هنا

قال .. عندك كام سنة

قلت.. 19

قال .. ومتجوزتش انت ليه الحتة وسافرت

قلت.. مش عارف , يمكن عشان الكلية , ويمكن عشان أهلى ويمكن عشان مش عايز

قال..اهو انا بقى مش عايز , رغم ان كل الظروف عايزة....ثم قال..مش عارف هتفهمنى و لا لأ....عندى امى وحبيبتى , وعندى ذكرياتى اللى ماليها حلم قديم حلمت فيه انى اعمل نفسى هنا , حلمت اشتغل فى السياحة ..و زى ما انت شايف و حلمت اشتغل فى التجارة ..مفيش شغلانة فى بورسعيد معرفتنيش , بحب الرسم وحلمت اكون رسام ...رسمت وعرضت فى بورسعيد ومصر والمحافظ جه والتيلفزيون صور ..وفى الأخر اللى جاى زى اللى راح

قلت وقد لاحظت وصول الشيف..عامة ربنا يوفقك ويا ريت اشوفك قريب

قال..سجل نمرتى ورنلى عشان معنديش رصيد , وانا م الأسبوع الجاى هشتغل سفارى جنوب واكيد هنتقابل

المشهد الثانى

الزمان : نوفمبر 2001الساعة التاسعة مساء

المكان : احد الجزر الصغيرة فى البحر الحمر تسمى وادى جمال , بالقرب من مدينة مرسى علم وبالقرب من الجزيرة يقف لنشان سياحيان

على شاطىء الجزيرة يلتف عدد من السائحين حول النار اثناء اقامة حفل شواء , وكل فرد يضع امامه زجاجة البيرة المدفون نصفها فى رمال الشاطىء الناعمة ,احد السائحين يغنى وهو يعزف على الجيتار اغنية هوتل كاليفورنيا

وعلى بعد عدة امتار يجلس شابان مصريان احدهما سيد والأخر العبد لله

قلت..كويس انى قابلتك عشان انا ماشى بعد اسبوع

السيد .. خير

قلت..امتحان التخلفات بعد اسبوعين

السيد .

.عامة انا راجع بورسعيد بعد شهرين واكيد اقابلك هناك , وهحاول اسلم عليك قبل ما تسافر

المشهد الثالث

الزمان : نوفمبر 2001 التاسعة مساء

المكان: الغردقة ..مقهى السكرية

اجلس وحيدا فى انتظار قدوم سيد ,متأملا صورة نجيب محفوظ الموضوعة اعلى واجهة المقهى , واسفل قدمى شنطة السفر , على الجانب الأخر من الطريق يقف احد الميكروباصات وينزل منه سيد ويتجه ناحية المقهى

يقول.. على فكرة احتمال لما ارجع بورسعيد مرجعش الغردقة تانى

قلت ..خير

قال.. قدامى كذا فكرة , لما اقعد معاك فى البلد هحكيلك...ثم قال

عارف..ممكن اكون فى فرنسا خلال شهر بس مش قادر اعملها ..رغم كل المشاكل الا ان فى حاجة بتشدنى لهنا , حتى الغردقة اللى مجيتهاش الا السنة اللى فاتت حبيتها وعشقت الشوارع والجبال وحفظت البحر شبر شبر

المشهد الرابع

الزمان : يناير 2002 الساعة التاسعة مساء

المكان : بورسعيد , مقهى امواج بشارع طرح البحر

السيد ..مش راجع تانى يا ابو حميد...تربست خلاص

قلت..طب ناوى على ايه

قال .. اول حاجة اخطب , البنت تعبت قوى معايا , والشغل يتدبر ..مش اول مرة يعنى

المشهد الخامس

الزمان :مارس 2002

المكان : بورسعيد

قلت :ايه يا سيد , فينك دلوقتى؟

سيد : أهو يا احمد , خطبت وشغال على فرش فى الحميدى

المشهد السادس

الزمان : مارس 2004

المكان : بورسعيد

قلت : ازيك يا سيد , فينك

سيد : اهو يا احمد , شغال على تاكسى بتاع واحد صاحبى

المشهد السابع

الزمان :يناير 2005

المكان : بورسعيد

قلت : ازيك يا سيد , فينك دلوقتى

سيد : فى مصر يا احمد , شغال فى اركيديا مول

المشهد الثامن

الزمان : ديسمبر 2005

المكان : بورسعيد

قلت : ازيك يا سيد , فينك دلوقتى

سيد : اهو يا احمد مريح شوية

المشهد التاسع

الزمان : فبراير 2006 ليلا

المكان :شاطىء بورفؤاد بداخل احد السيارات

رنين متواصل من تيليفونى المحمول , يأتينى صوت سيد

سيد : ازيك يا احمد , عايز اشوفك بكره عشان مسافر المانيا بعد يومين , قابلنى بكره الساعة 9فى قهوة عبد الواحد

قلت : تمام , بالتوفيق يا سيد

المشهد العاشر

المكان : بورسعيد , ميدان المنشية , قهوة عبد الواحد

الزمان : فبراير 2006 التاسعة مساء

سيد يجلس مع 12 شخص من اصدقائه

سيد : انا مسافر بكره الفجر مصر , هبات عند واحد صاحبى وتانى يوم هكون فى المانيا, احتمال كبير انى مجيش تانى يا ابوحميد ,رجعت الغردقة من شهر واتجوزت واحدة المانية ....ومش جاى تانى

قلت : وخطيبتك

سيد : راحت

قلت : وامك

سيد :ماتت

قلت : لا حول ولا قوة الا بالله...وانا معرفش

سيد : الدنيا تلاهى يا ابو حميد , وبعدين انت كنت فى الجيش.........ثم قال

شوف يا احمد , هو غالبا انا مش جاى تانى , عقلى بيقوللى كده , لكن قلبى بيقوللى انى اكيد راجع , انا لميت اصحابى كلهم , الناس دى خلاصة العشرة يا احمد , عشرة الشارع والمدرسة والكلية , كل واحد منهم حكاية ....عايز اتصور معاكو يا احمد , عند البحر ,عند ديليسيبس , عند المينا و فى التجارى وبورفؤاد , عايز اصور بيتنا القديم فى العرب وسور المدرسة الثانوى .....فاهمنى

اليوم التالى

اقف فى موقف بورسعيد الجديد المقام فى اطراف المدينة

اتبادل النظرات مع سيد قبل رحيله للقاهرة , التظرات الصامتة تحمل الكثير

سيد :انت بالذات مكتش صاحبى قوى , مش اللى عيشنا مع بعض , أو اتربينا مع بعض , بس بجد انت من اكتر الناس اللى فهمتنى وفهمتها

أنا :..................صمت

سيد :افتكرنى بالخير يا ابو حميد , وادعيلى , يمكن منتقابلش تانى , ويمكن نتقابل بعد يومين

وعندما استقل سيد السيارة , وعندما كانت السيارة البيجو تجتاز جمرك بورسعيد ,كان أذان الفجر قد بدأ فى الأنطلاق من مأذن المدينة , حاملا معه نسمات الفجر الباردة التى اجبرتنى على احكام ربط الكوفية الصوف وانا ارفع عنقى عاليا لتصطدم عيناى بأنوار المدينة البعيدة الممتزجة بأبواق السفن المارة بالقناة وهدير القطارات المارة من بعيد راسمة فى شجن مشهد النهاية

سيد صاحبى....واحد عادى

زيى و زيك

نفس الضحكة

ونفس الحلم

ونفس النظرة فى العينتين

بتشر شقاوة

خضرة وطيبة جوه القلب

ماشافتش عداوة

سيد صاحبى ....ليسانس اداب

وحلم بسيط

مالى عيون قروا الف كتاب

ومش غايب

ودايما دايب فى ملامحنا

بيعرفها ويعرفنا

ومهما الدنيا ما تعمل فينا

وبتفرق وبتباعد

بنتواعد

وشبابيكنا بتفضل مفتوحة

على بكره

لا تخاف من ريح ولا شتا بارد

ولما الدنيا كانت بتخبط

عمره ما يهبط

أو بيهاجر

وفيها يعافر

ودايما قادر يثبت ليها

انه الأبسط

وكان فنان

اجدع واحد يرسم

شط وبحر ومركب

ويصور ناس

وكان انسان

قلبه برىء مليان احساس

زى عنيه

واحلى هدايا فى عيد الحب

من صنع ايديه

سيد صاحبى قاللى مسافر

لم الناس وهات الشلة

انا مش راجع

قلت يا سيد انا مش سامع

قال مش راجع

اخر ليلة يا اعز الناس

وكانت ليلة بطعم الذكرى

وهو يصور شط البحر

وركن القهوة

وسور مدرسته وارض الساحة

وكل خطاوى مشيتها حبيبته

وقاللى يا واد لم الناس

وقولوا تشيز

دى اخر صورة بلون ايامنا

وقفوا الناس

وقالوا تشيز

وقلت فسيخ بطعم فراقنا

سيد صاحبى طار مش راجع

وحط هناك

و انا مستنى

فجرى الطالع

يمكن ييجى

و يمكن مرة السيد يرجع

ويمكن اطيره انا م الشباك

احمد

قمر وناس

قمر وناس

مدونة جديدة للشاعر الجميل خالد توفيق

خالد توفيق شاعر جميل و أنسان أجمل جمعتنا الظروف للعمل فى أحد المخازن الكائنة بأحد أقدم مناطق بورسعيد

عندما امتدت جسور الكلام بيننا اكتشفت اننى امام شاعر ومؤلف ومخرج مسرحى من الصف الأول

http://amarelkalam.blogspot.com/

قطرات خريفية

لا أدرى لماذا شعرت بذلك الأنقباض عندما وصلتنى نغمة الرسالة فى تيلفونى المحمول , لا أدرى كيف شعرت أنها منكى , رغم مرور أكثر من 3 سنوات على لقائنا الأخير , و رغم مرور الأعوام التى تخللتها اتصالاتك المتباعدة , الا اننى شعرت بطريقة ما أنه انتى
رسالة حزينة من رقم مجهول تدعيين أنه رقم أختك تهنيئينى فيها بأنهائى فترة الجيش , رسالة أكدت لى أننى ما ذلت اشعرك وأذكرك
و كأن صلاح جاهين يتكلم عنى عندما يقول....ليه يا حبيبتى ما بينا دايما سفر
أتذكر الأن رائحة ذلك الشتاء البعيد فى الأسكندرية , رائحة الشتاء تملأ كيانى وتجتاح روحى كلما أتذكر سيرنا لساعات بلا هدف أمام البحر , وكأننا نقتنص كل ثانية من الساعات القليلة السريعة التى نقضيها سويا كل عدة أسابيع

ما ذالت رائحة عطرك الممتزجة برائحة البن البرازيلى و رائحة الكتب القديمة التى ابتعناها سويا من شارع النبى دانيال تذكرنى بمشروعاتنا الكثيرة وأحلامنا المشتركة وقصائد بدر شاكر السياب التى تحبينها

أتذكرين ذلك الخريف البعيد...حينما شهدت شوارع القاهرة أخر لقاء بيننا , أتذكرين أخر تبادل للهمسات بيننا فوق كوبرى أكتوبر , و نحن نستمتع بالنيل الذى ما ذال يجرى خاطفا معه لحظاتنا الهاربة من بين أيادينا المتشابكة , أتذكرين سؤالك يومها
هل تعرف ماذا أتمنى الأن؟
قلت ..أعرف ..تتمنين أن تجود علينا السماء بحبات المطر الخريفى الذى نعشقه
أتذكرين كيف قبل أن أكمل ردى رأيت حبة المطر الرقيقة المتجمعة فى أناقة فوق زجاج عويناتك البسيطة ......أتذكرين شعورنا وقتها و نحن نهبط من أعلى الكوبرى تحت مظلة من قطرات المطر الخريفى الحنونة فى بداية رحلتنا المعهودة و الأخيرة مرورا بميدان التحرير حيث مترو الأنفاق سبيلنا لمحطة رمسيس حيث النهاية المتوقعة والمرسومة لطريقنا الملىء بالسفر والفراق
ما ذلت أشتاق لذلك الشعور حين كنتى تتقمصى شخصية الأم و أنتى تضعى يدك على شعرى لأعادة خصلة منه لمكانها , أو تهندمى من وضع ملابسى وأنت تتأكدين فى نفس الوقت من أرتدائى ملابس ثقيلة
بعد تلك الأعوام....ما ذلت أشتاق اليك

لما يرجع الخريف
والمطر بيكون خفيف
بفتكر أنا كل يوم
والعواطف والغيوم
وارجع أشتاق
للحنين
للطريق وللدروب
وريحة البالطو العتيق
والأيدين جوه الجيوب
مدفيين
وأفتكر عمر وسنين
فى الشتا بتاع زمان
لما كنا هناك زمان
متجمعين
وكنا نشتاق للحاجات
ولسهرنا بالساعات
ولبحرنا تحت المطر
أبو لون غريب
لون عيونك
لما كنا جنب بعض
لحزن صوتك
لما قلتى ليا وعد
متنسانيش

كنتى عارفة
ان اللى بنا ما أنتهاش
وميبتديش
بس ما رضيتى أقول بلاش
وقلتى عيش

وكنت عارف
ان بكره مش بتاعنا
ولو جمعنا هتبقى لحظة
وتبقى ذكرى
فى ذكرياتنا

كنا عارفين
أن لحظتنا محطة
وان السكة سكتين
أنا رايح
وانتى جاية
ومستحيل بين البنين

كالعادة

كالعادة انتهت الرحلة , رغم طولها ومفرداتها المختلفة , واحاسيسها المتناقضة الا انها انتهت مثل كل شىء فى رحلتى, وجاء اليوم الذى لم يبقى لى منها الا الذكريات , عندما بدأت فى اعداد حقيبتى -للمرة الأخيرة-اكتشفت عمق هذا الشعور أدركت ذلك الحنين النامى لتلك الذكريات المبعثرة و الوجوه المتناثرة هنا وهناك , أدركت انى -ورغم انتظارى ذلك اليوم-انى افارق جذىء عزيز من ذكرياتى التى تكونت هنا يوما بعد يوم والتى ارتبطت بشكل ما بمفردات الحياة اليومية هنا , تجربة غريبة مرت فى حياتى ترتب عليها أشياء كثيرة , قد اكون أعدت أكتشاف نفسى بشكل ما , قد أكون قد اكتشفت أخرين أو أكتشفونى هم , رغم مرور عام كامل الا اننى لم أنسى ذلك الشعور بالضياع الذى اجتاحنى فى فجر أول يوم من تلك التجربة , عندما تزامن شروق الشمس مع مرور القطار الحربى فوق كوبرى امبابة بادئا رحلته للغرب حيث صحراء دهشور , انعكاس ضوء الشمس المولود فوق مياه النيل وامتزاجه ببقايا الضوء القادم من البنايات الكبيرة المحيطة بالنيل صنعا داخلى معنى ما للمدينة والمدنية والمستقبل والمجهول , اورثنى كل هذا شعورا بالضياع لازمنى طيلة ذلك اليوم الطويل وما لبث ان ذاد حينما رأيت من جديد تلك الشمس المسائية الغاربة والتى تنعكس أشعتها تلك المرة على رمال الصحراء الصفراء

الأن أنا فى أخر يوم من تلك التجربة , و لا أدرى لماذا اجتاحنى نفس الشعور من جديد

ودعت العام بالكامل , ودعت أصدقائى وفى عيوننا دموع الفراق , تبادلنا العناوين والتيلفونات و الأمنيات , ودعنا المكان الذى عشنا فيه يوما , ودعنا أياما تركنا فيها مشاكلنا التى تحتوينا فى زحمة المدينة لتحتوينا الصحراء بكل مفرداتها

ودعنا وجوه الفناها وكانت جذىء من حياتنا فترة ما , ودعت نور ذلك الشاب الأسوانى البسيط , والذى لم يحصل على قدر كافى من التعليم الا انه لا ينطق الا ليعلمنا شىء جديد أو حكمة ما أو موال من مواويله الجميلة , ودعت عبد العزيز عمدة القاهرة والذى لم يمل من دعوتى لزيارته فى منطقته التى يعشقها والتى تسمى حكر أبودومة لكى يرينى -على طريقة بلال فضل- مصر التى لم يعرفها أحد , ودعت الصحراء المجاورة والحقول القريبة وأصوات السيارات المارة على الطريق السريع المقابل , ودعت سهرات الصيف وتزويغات اسماعيلية والقاهرة ليلا

كالعادة انتهت مرحلة وبدأت مرحلة وها أنا أحجز مقعدى بجدارة فى الطابور