انتظار

أحلام غرقى

والحلم تبعثر فوق صخور العمر

كعدو نهار

الحب رسالة

فى قلب زجاجة الى بحار

قد يصبح يوما مرفأ عشق

قد يصبح دار

أمنية أنثى

تدنو برفق من اعصار

وما بالقلب حيلة

سوى الأنتظار

الأنتظار

أحمد

عدسة....أيمن نصار

فليس سوى أن تريد

هى أشياء لا تشترى

فليس سوى أن تريدْ

من قصيدة ..لا تصالح

أمل دنقل

على الألفى...مع أيامنا الحلوة...ساقية الصاوى 7مارس

يوم الجمعة القادم 7 مارس 2008 ولثانى مرة مع فرقة أيامنا الحلوة سيغنى صديقى وبلدياتى على الألفى على مسرح ساقية الصاوى , الفرقة التى تضم أصوات جميلة مثل سلمى صباحى وشريف اسماعيل ومحمدخلف ونادر نور ومجموعة جميلة من الشباب , على الألفى وكما أقول عليه دائما ليس مطرب جميل الصوت فحسب , فكثيرون هم من يمتلكوا جمال الصوت , لكنه يمتلك من الأحساس ما يجعله من اكثر المطربين قدرة على ايصال المعنى الى بسلاسة , مشوار طويل انتقل فيه على بين عدة أماكن بحثا عن فرصة محترمة فى الغناء , ومن مسرح الجامعة الى مسارح بورسعيد ثم القاهرة ,وحاليا انتهى من وضع الحان غنوة فيلم (( ماشين بالعكس ))والتى ستغنيها المطربة سلمى صباحى ,, اشتهر على فى بدايته بأداء أغنية (( تلات سلامات )) وقدم العديد من الأغانى من الحانه وكلمات اصدقائه , على الألفى بالنسبة لى رفيق رحلة وتجربة جميلة,, أقمنا خلالها العديد من الندوات والأمسيات الشعرية والغنائية فى أغلب مسارح بورسعيد , غنى لبورسعيد والبحر والحلم والناس , هذه الحفلة بالذات ...سيغنى فيها على الألفى مفاجأة ,, أسعدتنى بشكل كبير جدا وانتظرها بكل شغف....بالتوفيق يا علوة

من أجمل الأغانى التى احبها بصوته (( تلات سلامات )) للرائع محمد قنديل .........تلات سلامات

أغنية وحشانى كتير

ومن الأغانى التى كتبتها وغناها على الألفى .........اللى انكسر ,, بره الدايره ,, عرفتنى بصوت سلمى صباحى

حبل الكلام

حينما كان يأتى مبكرا , كانت تأتى مبكرا , وعندما كان يضع بين راحتيها تحية الصباح المشبعة برائحة البحر , كانت تترك صباحاتها الفرنسية النكهة تنعش روحه , وعندما كانت الحياة تسرق كل منهم من عينى الأخر , كانا يتذكران بعضهما على فترات متباعدة من اليوم بكلمة أو ابتسامة , تحكى له عن قطتها , ويحكى لها عن مدينته , وعندما تناقصت صباحتها الفرنسية , تضائلت صباحاته الدافئة , ولكنهما لم يكفا عن التواصل اليومى , فى شكل وردة , اعتاد أن يعطيها اياها مع كل تعامد يومى للشمس على الأرض , وعندما كان يتأخر فى اعطائها الوردة اعتادت ان تطلبها بأثر رجعى, وبمرح جعله يجعل الوردة وردتين وثلاثة أحيانا , وعندما كفت عن التواصل من جديد , لم يكف عن اعطائها الوردة وان تناسى فى بعض الأحيان , ولم تطلبها هى فى أحيان أخرى , نضب الكلام , وصار اليوم طويلا والحياة أبطئ , بدأت ملامح كل منهم تتلاشى فى عيون الأخر , فجأة ..سألها عن مصير الورد المتكوم عنده لها من ايام طوال , لم ترد , لم يعرف لماذا , ولكنه أخيرا,, كان قدعرف شئ واحدا فقط

عشاق قدامى

قال...نحن أرواح قديمة قدم العشق , متقلبة تقلب البحر الذى نشبهه فى هدوئه ويشبهنا فى ثورته , نعرف بعضنا البعض من النظرة الأولى , فى مرحلة النداء الأول تبدأ الشوارع العتيقة فى الأعتياد على نقرات خطانا المتمهلة , بينما تنطبع ملامحنا على زجاج البيوت الخشبية , يعتاد البحرعلى مواعيدنا المتفاوتة ما بين ليل ممطر ونهار بكر , نختار الشتاء لنتلون بلونه بينما نلون باقى الفصول بألواننا المختلفة , ومثلما اجتمعنا على وعد , نفترق على وعد , ويبقى رباط الروح وثاقا للمحبة يجمعنا للأبد , فلا تسألنى كيف عرفتك , فانت الأخر عرفتنى , تتناص العيون وتتوافق وتتكامل لتحل المسألة الأذلية , أنظر هناك , أترى ذلك الطفل , انه منا , عيناه الحائرتين بين أجنحة النوارس وأنامل الصياد العجوز ستخبرك بأنه منا ,, نحن الذين نعيش بقلوب أطفال , وعقول باحثين وأجساد رحالة , نمر كالعطر , ننصح كمعلم ونتعلم كتلاميذ , نخطط كقادة ونهجم كفدائيين وندافع كشهداء , نحن المتأنقين كلوردات المتبسطين كبحارة , نمتلك خيال الشعراء , وعيون مصورين , نعرف أن أقرب الطرق بين نقطتين هو الخط المستقيم , ونعرف أنه من الممكن الوصول من طرق أخرى , نحن الذين أدمنا الفرح والحزن والدهشة , نعرف أن الجمال جمال الروح , والروح من أمر الله , والله جميل يحب الجمال , والجمال فى كل شئ , فابحث عنه...تجده

عدسة ...وليد منتصر

زوربا البورسعيدى

موجود ومش موجود

وسمعته سبقاه

بنطير نعدى حدود

نلاقى ناس عارفاه

سلطان ولو معهوش

والضحكة متفارقوش

وصعب متحبوش

لو عشت لحظة معاه

...........

فى كل شارع ولد

متسمى على اسمه

وفى كل حتة وبلد

ينادونا وباسمه

لاعمرنا شفناه

لكننا عشقناه

قبطان كتير نلقاه

منتهش يوم عنه

..........

قالوا بتاع حكايات

قالوا كلام ظلمه

عدا وخط وفات

ولا عمر شئ همه

طول عمره ابن البلد

ولا عمره خاف من ولد

والعشق فينا اتولد

لبورسعيد منه

أحمد

عدسة..وليد منتصر

لأنى وعدتك.....أسف

لأنى وعدتك

أنى هكون..أول تيلفون

هيجيلك وانتى بتطفى شمعة جديدة

فى سكة عمرك

ورغم نهاية الخط الواصل بينى وبينك

سبت ايديا

الحاضنة موبايلى الطارح اسمك

تلضم كل حروفى المتسرسبة

فى رسالة أخيرة

كل سنة وانتى طيبة

..................................

وأسف

عشان خطيت بأحلامى لأحلامك

بدون اذنك

صحيت من نومى على حسك

بيجرح فيا ويقطع

وخفت أرجع تقولى جبان

وأنا جوايا الف حصان

بيتسابقوا عشان ترضى

ومش راضية

لكن فاضية

تقوللى عليا بتلكك

وأنا الساكت ..بقيت ساكت

لكن ماتت حاجات فيا كانت ليكى بتتكون فى حلم وليد

وكنت خلاص هقولهالك.. وأمد الأيد

لقيتك حد تانى بعيد مبعرفهوش

وأنا اللى يبعنى مشتريهوش

لكنى بقيت على حلمى وقلت نعود

رسمت طريق رسمت وعود

وقلت أحلم ومش هخسر

صحيت من حلمى متأخر

وقلت نسيت اكيد ناسية

لقيتك قاسية مش ناسية

فضلت وراكى ميأستش

وعشت الدور كأنى حبيب

لقيتك حد تانى غريب كأنه ما كان

فاكرة زمان ؟

طلبتى أقول فيكى ولو بيت شعر

ادينى اهو عشان خاطرك

كتبت قصيدة تقريها

وانا بشطب حروف اسمك من الأوراق وبمحيها

وجوه عيونى.. فى دمعة حنين وفراق

حرام تنزل...لكن نزلت

بخبيها

أحمد

أه يا بنت حلوة جدا.....ديوان أحمد فوزى الأول

صدر منذ أيام عن دار ميريت ديوان (( أه يا بنت حلوة جدا )) وهو الديوان الأول لشاعر العامية والمخرج أحمد فوزى ,, أحمد فوزى شاعر ومخرج له فيلمان تسجيليان الأول بعنوان (( كل يوم )) والثانى بعنوان (( موكا )) ,, كما عمل كمساعد مخرج فى العديد من الأفلام التسجيلية ,, أحمد من مواليد بورسعيد 1982 ,, حاصل على بكالوريوس تربية وهو يدرس فى معهد السينما قسم سيناريو ,, وهو أحد أهم الأصدقاء الذين خرجت بهم من تجربة الجيش ,, حيث قابلته لأول مرة بعد منتصف ليلة صيفية فى الصحراء ,, وسافرنا فى نفس الليلة سويا عائدين لبورسعيد ,, ورغم اختلافنا الجزرى فكريا الا اننى ارى فيه موهبة نادرة لا ينكرها كل من تعامل معه...ع البركة يا أبو فوزى

حلم ولا علم

شارع خالى , طرق ليلية مغطاة بسكون ما بعد منتصف الليل , أمارس دورى فى سيناريو رحلة عودتى اليومية من العمل , الميكروباص القابع على يمين الطريق يغرينى بالتخلى عن صعلكتى فى الشوارع البادرة هذه الليلة , من الشارع الجانبى تظهر فتاة فى ثوب أصفر كلاسيكى وكأنها خارجة لتوها من افلام الستينات , تدلف للميكروباص فى سكون , نظرة فى المرأة الجانبية بينى وبين السائق أدركت منها أنه ينتظرنى , خطوات سريعة كنت بعدها فى مقعدى المفضل أخر السيارة على اليمين , وما أن جلست الا ولاحظت عدم وجود الفتاة , نظرت أمامى , ثم بجانبى , ثم بجانب السائق الصامت الذى بدأ بالتحرك فلم أجدها , راودتنى أفكار تجاه الفتاة ثم تجاه السائق ثم تجاه الأثنين معا , ثم أرجعت الأمر الى الظلام وارهاقى الفترة الماضية , تناسيت الأمر بسرعة بينما سمح لى تمهل السائق فى القيادة من التمعن فى المدينة النائمة وكأنى أراها لأول مرة , كأننى عاشق يتأمل جسد محبوبته النائمة أمامه فى دلال , عند نهاية الخط توقف السائق فى صمت , تحركت لأنزل معطيا اياه الأجرة فى صمت أيضا , تحركت خطوتان للأمام وبدأت سيرى على يمين الطريق بينما صوت محرك الميكروباص من ورائى يعلن انطلاقه من جديد , مر بجوارى فألقيت نظرة أخيرة عليه , لأجد السائق الصامت متمهلا كما هو بينما تجلس ورائه فتاة فى ثوب أصفر كلاسيكى كأنها خارجة لتوها من أفلام الستينات

راجل فريد

منذ عامين , هنا فى نفس المكان , كتبت بوست بعنوان دنيا , حيث رحل وقتها شخص من أقرب الأشخاص لى , الأن وبعد مرور عامين , كنت فى مكان طالما أخذنى اليه , وطالما ذهبت اليه وحدى

ولسه فلوكتك ع الرملة

بتنادى العدة المتخبية فى بطن سريرك من سنتين

وكأنك هتقوم الفجر

وترمى شباكك جوه البحر النايم لسه فى حضن الليل

لساها بتحلم تركب موجه العالى

زى ما كنت زمان بتريسها

وبعد العصر ترقع غزلك

المنصوب على حيطة قديمة

رسمت عليها زمان وأنا عيل وردة ومركب

لساها بتحلم ترجع يوم

وأنا يوم ورا يوم بفتكرك كل ما أروح البحر لوحدى

وألمح مجدى فى نفس مكانه أخر الحارة

وضحكتك لما تناديه

وشخطتك فى البت سارة

تنكسف.. تقوم عاطيها أوام جنيه

لسه فلوكتك بره البحر بتحلم بيه

لساها بتحلم يوم تلقاك

ولا تعرفش ان انت هناك ..وخلاص مش جاى

والبحر خلاص بقه موج نساى

ولا عدش الغزل فى قلبه يفيض

ريس بالفطرة فى علم الصيد

بفلوكة ومدرة وخليوة

حطيت البحر فى غنيوة..وفى قلبى النونو رميتها زمان

لفيت وكبرت بقيت انسان

والغنوة فى بالى مفارقتنيش

لسانى بحب البحر وطيشه ومن دراويشه

وكل ما أروحله أقرالك الفاتحة

ولسه فلوكتك ع الرمل بتستنى الطرحة

أحمد

عدسة ..وليد منتصر

اليها فى عيد نصرها....احلى سلام مربع

بورسعيد

وكمان مرة بورسعيد

مليون مرة بورسعيد

يعنى بلدى

اللى ساكن فيها وساكنة فيا

يعنى كسرى والحميدى

بورفؤاد والمعدية

يعنى الكنال

وأجدع عيال بتشجع النادى المصرى

وبيعرفوا يقولوا لأ

المبدعين أه

المدعين لأ

والبحر

كمان مرة البحر

ألف مرة البحر

والشتا ع البحر

والسهر ع البحر

وانا والبحر

وانتى

كمان مرة انتى

أول وتانى وتالت.. انتى

حبيبتى

اللى لسه بتشاور عقلها

وبقولها

بينى وبينك كتيييير

بورسعيد

والبحر وبكره

الشتا

فيروز ومنير

وقلبى

كمان مرة قلبى

اللى بيقول هى

وتانى وتالت ورابع

حاجات كتير فيكى......حاجات كتير فيا

أحمد

عدسة ...الفنان وليد منتصر

شكلك كده

حاجات كتير فيكى

حاجات كتير فيا

يا هلترى انتى

ممكن تكون هى ؟

نصى اللى بتمناه

ومن عمر بستناه

والقى كمان شايلاه

نفس الشعور ليا

بينى وبينك روح

علامات بترسم حلم

من غير كلام بنبوح

فنطقنا نفس الأسم

حتى اللى بتخبيه

هو اللى أنا بداريه

حساه وحاسس بيه

بيقول أكيد هى

شكلك كده ليا

أحمد

صباحين وحتة

صباحين وحتة…متعاصة قشطة
واسرج نور
لأجدع صحبة بتلالى ولا البنور
ومهما أدور
ما يملى عيونى غير بلدى
وناس بلدى
قلوب ليها بحن وأميل
ولو أجه عليا الليل
عمره فى يوم هيجعزنى
ولا فى برده هبات سقعان
ما دام سرحان فى نور عينها
كأنى فى جوبية وأسيرها
وعنها ما أغيب
ولد حبيب
بقول فيها كلام يهبل
وبطبل مع البكاش
مفيش حارة مبعرفهاش
مفيش ضمة مبحضرهاش
وعندى المبى ع البسطة
ورق وقماش
يعود رمضان اجيب بطة
ومدبحهاش
وبنزل أعس بالفتاش
لجل ما انتش الحواديت
ولو حبيت ميلزمنيش
ولا البوهية ولا الورنيش
ولا الموضة ونصايبها
سايبها تيجى لنصيبها لحد البيت
ولد عفريت
وحلمى بسيط
لكنى غويط كما بحرى
كما النوة فى عز الليل
تشوف فيا اللى فات مواويل
وهفضل اميل واغنيلها فى كل زمان
صباحين وحتة يا حبايبنا فى كل مكان

أحمد

عدسة...وليد منتصر

الأفرنج ...رواية سامح الجباس الأولى

صدرت مؤخرا عن دار العين رواية ( حى الأفرنج ) للكاتب البورسعيدى الصديق سامح الجباس , وهى تتناول حى الأفرنج أحد أعرق أحياء بورسعيد , سامح الجباس طبيب بورسعيدى شاب عرفه الوسط الأدبى بمجموعته القصصية الأولى ( المواطن المثالى ) والتى صدرت عن دار ميريت هذا العام ولاقت رد فعل كبير من الجمهور حيث كتب عنها كثير من النقاد وتناولتها كثير من الندوات الأدبية

أول شتا ....امبارح

أول شتا

والقلب عطشان من زمن

نزل المطر

عجن التراب ريحة شجن

الصيف هرب

سحابة بيضا مروحة وسط الغيوم

رجع الشتا بالذكريات

غسل الهموم

لملم حكاوى مفتفتة

لناس وحشها الكلفتة

فى بلاطى صوف

والمشى ع الكورنيش تحت المطر

صحى الحروف

خلانى

اكتب من جديد

وأغنى للطير اللى راجع من بعيد

يم الفنار

كان للشتا واحنا صغار

أغانى فينا بتتنقش

ودعوة يدعوها الكبار

ندعى قلوبنا ترتعش

نفرح نروح فوق السطوح

نملى كفوفنا بالمطر

ونقول يا رب

الكلمة تطلع من قلوبنا للسما

طفل انما

من صغرى عاشق للشتا

كان البداية والنهاية والمكان

كان اللى كان

واشتياقى واللى باقى

من زمان مر ومضى

كان أحلى عشق وفضفضة

للشوارع الفضا ..من غير بشر

والشجر

قالع هدومه

رجع الشتا بالمطر يعلن قدومه

بالنوارس والنوة

بريحة الأرض بعد ما تخلص الشتوة

بجد عجوز على الدكة بيتشمس

بصوت فيروز مع القهوة ندى يلمس

حاجات ماتت يفوقها

تعود كراريسى وورقها

مع الجلاد

وصوت الأبلة فى الحصة يقول يا ولاد

الخريف بعديه شتا

ووراها أقول

وأكبر وأطول

أنسى الحاجات...أنسى الفصول

لكنى لسه فى السهر

بحلم أكلم القمر

واكتب قصايدى ع الشجر

وتملى مع أول شتا

قلبى بيفرح بالمطر

أحمد

الصورة ...عدسة المصور وليد منتصر

على الألفى ..مع أيامنا الحلوة ..ساقية الصاوى ..16نوفمبر

تحديث

الحفلة كانت رائعة وعلى كان مبدع كالعادة , تألق لجميع المطربين خصوصا سلمى وشريف ومحمد خلف , المفاجأة كانت على الألفى الذى يعتبر مكسب لفرقة أيامنا الحلوة بلاشك , على غنى أغنية دار يا دار , وأخد عليها سوكسيه هايل من الجمهور كان واضح جدا بعد انتهائه من مذهب الغنوة قائلا فين يا دار حيث أعطى على بأحساسه وصوته المشرق للأغنية طعما أخر, على من الناس القليلة القادرة على انتزاع كلمة الله عليك من قلبى بسهولة الموجة وده اللى عمله امبارح وهو بيقول جملة ( فى رب اسمه الكريم ) ..الله عليك يا على بجد

لتحميل أغنية دار بصوت على الألفى

اضغط

دار يا دار

.........................................................................................................................................

ذات مساء شتوى منذ ما يقرب من عامين , كنت أشاهد قناة دريم بينما الصديقة المذيعة سلمى صباحى تعلن عن استضافتها لمطرب من العيار الثقيل , وكان ذلك اليوم هو أول مرة اسمع وأرى الصديق على الألفى والذى أصابنى بالدهشة مرتان , الأولى بسبب صوته الرائع الذى يؤثر فى وفى كل من يسمعه , والمرة الثانية عندما قال أنه من بورسعيد , حيث اندهشت كيف يكون صاحب ذلك الصوت الرائع بلدياتى ولم أسمعه من قبل , يمر يومان وتجمعنا الصدفة بعد منتصف الليل فى شارع طرح البحر وفى طقس يليق بعاشق صعلكة مثلى وفنان مثله , سألته انت على الألفى ؟...قال ..اه ...قلت ..انا شفتك فى دريم ..انت جامد يا بنى ما شاء الله , ..وافترقنا , تمر الأيام ثم تجمعنا صديقة مشتركة وهى المطربة سلمى صباحى لنصبح بعدها أصدقاء على المستوى الأنسانى.. قبل ثم نبدأ تجربتنا الجميلة والتى أعتز بها شخصيا , حيث أقمنا مجموعة من الأمسيات الغنائية الشعرية فى بورسعيد استلهمنا فيه روح بورسعيد بالأضافة لمجموعة مختلفة من الأغانى ..منها عم سليم ,بحب البحر, حكاية عادية , اللى انكسر, عدى عليا وساب.... وعرفتنى التى غنتها المطربة سلمى صباحى

على الألفى من وجهة نظرى ليس مطرب عادى , كثيرون هم من يمتلكون جمال الصوت , ولكن قليل منهم من يمتلك الحس المرهف , وعلى من وجهة نظرى من أكثر الناس امتلاكا للأحساس , من هؤلاء الذى لا تملك وانت تسمعهم الا ان تقول ..الله عليك

على انشاء الله هيغنى يوم الجمعة 16 نفمبر الجاى فى ساقية الصاوى مع فرقة أيامنا الحلوة , الفرقة اللى بتضم نجوم كتير منهم سلمى صباحى وشريف اسماعيل ونادرنور ومحمد خلف

بالتوفيق يا علوة وجايلك انشاء الله

من الحاجات اللى كتبتها وغناها على

أغنية اللى انكسر يتطوح ..بصوت على

أغنية عرفتنى ..بصوت سلمى

أغنية بره الدايرة ...بصوت على

ومن الأغانى اللى بحبها جدا بصوته

تلات سلامات فيديو

أغنية وحشانى كتير

أغنية حنين

فوق الشوق

بينى وبينك

جبلين شوق

وبحر غميق

بينى وبينك

قصيدة شعر

وحلم رقيق

لكنى جرئ

وهعديلك ..وهعدلها

قالوا زمان لو عاوز حاجة

راح تعملها

وهنعملها

أحمد

عمار يا بورسعيد

وسط طوفان الضياع والأستهلاك , وفى ظل انعدام الهوية وفقدان الهدف , وسط زحام الموضة وصعود ثقافة الأدعاء وسعار المادة , وفى الوقت الذى أصبح فيه الأنتماء بدعة عند البعض وعنصرية عند البعض الأخر , جائت مبارة المصرى والزمالك اليوم والتى الغاها الحكم قبل نهايتها احتجاجا منه على احتجاج جمهور بورسعيد عليه لعدم احتسابه ضربة جزاء للمصرى , بمثابة سحابة شتوية غسلت روحى من لزوجة الصيف وسماجة أشياء كثيرة مررت بها الفترة الماضية , ولتثبت أن جمهور بورسعيد العظيم ما زال هو الأول فى الأنتماء , عكس ما حاول البعض اشاعته عن ذلك الجمهور .. فذلك الجمهور لا يستمد عشقه للمصرى من كرة القدم فقط , بل أن عشقه للمصرى نابع من عشقه لبورسعيد أولا وأخيرا .....ذلك الجمهور الذى لا يملئ عينه فرق ضخمة مثل الأهلى والزمالك وما زال يعشق ناديه رغم قلة انجازاته فى حالة غاية فى التفرد والخصوصية والجمال ....ففى الوقت الذى تجد فيه الأهلى يلعب مع فرق المنيا وسوهاج ودمياط والشرقية والمنصورة والأسكندرية على أرضها وتجد جماهير تلك المدن تشجع الأهلى ضد فريقها .....تجد بورسعيد تلك المدينة الصغيرة حجما والكبيرة قدرا والتى تعتبر أصغر مدينة من حيث المساحة وعدد السكان تجد مدرجاتها بالكامل تشجع ناديها اى كان منافشه , تجد المدينة رجالها وشبابها ونسائها على قلب رجل واحد

تلك المدينة التى استطاع جمهورها اليوم أن يقول (( لا )) لدرجة جعل الحكم يلغى المبارة فى سابقة نادرا ما تحدث فى المباريات المصرية , تلك المدينة التى ما ان هاجمها بعض الصحفيين قائلين ان بورسعيد لا يوجد بها جمهور فامتلأت شوارعها فى ظرف يومان بلافتات فى كل مكان تقول ان بورسعيد لا تعرف غير المصرى .. لافتات فى كل مكان تحمل أسامى الشوارع والحارات والعائلات تقول اللى مالوش خير فى بلده مالوش خير فى وطنه

اليوم وانا أسير فى شوارع بورسعيد أستمتع ببشائر الشتاء بينما أشاهد جمهور بورسعيد العظيم الشباب والكبار والأسر وهم يتكلمون بدفئ

وانتماء عن المباراة والحكم لم أملك نفسى الا أن أبتسم فى راحة قائلا....عمار يا بورسعيد

جمهور بورسعيد العظيم.....شكرا

فى بورسعيد

لسه الناس ع الشط سهرانة

رغم القلق والحزن

رغم القلوب اللى حيرانة

لسه العجوز ع الشط مجربش السكات

ولسه الشباب ع البحر

منساش الحاجات

أحمد

سفر

ولأنى واخد ع الفراق

قلبى خلاص معدش فيه الا السفر

حتى ان قدر

يرجع ويسكن فى الصفوف

مبقاش يشوف

غير صورة باهتة متربة

فوق كل رف مسربة طعم الرحيل

ليه كل ليل مكتوب عليا انقسم

قد الخطاوى واترسم طول الطريق مشوار شجن

بزيادة توهة فى الزمن

ايه التمن علشان اخاصم دنيتى

بكره تميل الشمس ترسم سكتى

وبضحكتى

هلضم خيوط الحلم فى ديول الفراش

ولو يوم مجاش

هعرف طريقه بالحنين

صلاح جاهين

قال من سنين ساعات أقوم الصبح قلبى حزين

وانا من سنين يوماتى أقوم مليان ألم

فأمسك قلم

وأرسم بيوت

أرسم بنات

أرسم قلوع..فوق مراكب وأمشى بيها للرجوع

أرسم خيوط شمس اللقا

أحلام كتير متشوقة على كل شط

وصوت خطايا على الأسفلت ملانى فراق

مرصوف طريقى دايما اشتياق

ومفيش حبيبة فى الوداع بتقوللى عود

حتى خلود راحت كمان

حتى الكمان معدش صوته يهزنى

وبنحنى

اكتب على رمل الطريق كسبتنى

لكنى عمرى ما هنحنى

وهنتصر

وبنكسر

وأقول زمان جدى خسر وقال مفيش

وأقول مفيش ومشتكيش

وأحلم أعيش

لحد الدنيا ما تقفل أخر صفحة فى دفتر سفرى

وأسكن فيها ومتسعنيش

أحمد

الصورة ..للعبد لله...بعدسة الفنان وليد منتصر

أخر ايام الصيفية

للنهايات شجن عذب , مؤلم ومحبب فى نفس الوقت , النهايات دائما ما يصاحبها شعور مسبق بالحنين لتلك اللحظات فيما بعد , أخر يوم فى المدرسة , أو الكلية , أو الجيش , أو الحب , أو الصيف...ذلك الأخير الذى ارتبط فى وجدانى بأخر أيام الصيف وأول أيام شهر سبتمبر , حيث الأختفاء التدريجى لأصوات الأطفال فى الشارع وقت العصر بينما يظهر صوت بائعى البلح والجوافة , فى حين تتكدس امام المكتبات اكوام الكتب المدرسية الموضوعة للتجليد , وتبقى رائحة الممحاة الجديدة هى جرس انتهاء الصيف بالنسبة لى . ورغم ان بورسعيد تعد مصيف من المصايف الا ان نهاية الصيف مختلفة فيها نوعا ما , ففى حين يختفى الزحام من على الشواطئ فانه يظهر بكثافة فى الأسواق

والمحلات حيث نوعا اخر من المصطافين القادمين لتوديع الصيف وشراء احتياجات العام الدراسى الجديد
لظروف ما , كانت الأسرة تفضل أخر الصيف شهر سبتمبر بالتحديد لقضاء اجازة الصيف , كل عام نجتمع فى مكان ما مع تلك المجموعة

القديمة من أصدقاء الأسرة , تلك المجموعة التى جمعها العمل يوما منذ سنوات ثم فرقهم , فوحدتهم الصداقة رغم ان كل أسرة منهم من بلد مختلفة , كانت اجمل لحظات حياتى تلك التى نجتمع فيها فى المصيف , نأتى من بورسعيد بينما يأتون هم من القاهرة والأسكندرية والغربية والصعيد , عشرة أيام أو اسبوعين نقضيهم معا ثم يفترق كل الى بلده وحياته على وعد بلقاء فى العام القادم , ولهذا ارتبط سبتمبر معى بالفراق , حيث نودع الصيف والأصدقاء وحقبة جميلة انفصلنا فيها عن حياتنا وذهبنا لعالم ما عشنا فيه يوما منذ سنوات , ومثلما يحدث فى الحلم , نستيقظ فى الصباح على حقائب مغلقة وسيارت تنظر الوداع الأخير

نهاية الصيف ايضا هى نهاية لأشياء اخرى وليدة , قصص الصداقة والأعجاب , والحب , فقصص حب المصايف قصيرة مثل حياة المصايف , دائما تلك البنت التى احمرت وجناتها من الشمس بينما تقشر جلد كتفيها من ملوحة البحر , دائما هى البساطة فى الملابس والطعام وحتى الصداقة والحب , اعجاب متبادل سريع , يعقبه تبادل لأسماء والعناوين ثم السهر على الشاطئ حتى الصباح , وكالعادة الوداع عند الغروب مع تبادل ارقام التيلفونات ووعود بمحاولة التنسيق باللقاء العام القادم

سنوات مضت انقطعنا فيها عن تلك العادة وانقطعت باقى الأسر , بينما اقتصرت العلاقة على زيارة فردية وتبادل المكالمات التيلفونية على فترات متباعدة ...الأطفال أصبحوا شبابا , والبنات أصبحن أنسات , رحل من الكبار من رحل , والباقى ما زال يصارع مشاغل الحياة , ولأول مرة منذ سنوات , يجمعنا الصيف مرة أخرة , ولكن ليس فى مصيف هذه المرة , بل فى ليل القاهرة , حيث قاعة الأفراح الخاص بذلك الفندق الضخم الذى أقيم فيه حفل زفاف أميرة أبنة أحد اقرب اصدقاء والدى , كان مشهد رائعا عندما تجمعنا فى ساحة الفندق بعد غياب سنوات , تبادل للأحضان والضحك والتعليقات , من القاهرة والأسكندرية وبورسعيد والغربية وقنا , جلسنا جميعا على منضدة واحدة اسماها والد اميرة منضدة الحرس القديم , بينما ابدى احدهم ملاحظته على ان اليوم يوافق اوائل سبتمبر وهو الوقت الذى تعودنا على التجمع فيه يوما ما ,
تذكرنا ذلك اليوم البعيد فى أوخر التسعينات , أخر مصيف جمعنا فى مدينة فايد , كنا مجموعة من الشاليهات المتراصة على الشاطئ , بينما بينما كانت اقامتنا اليومية شبه الكاملة فى شاليه والد أميرة , الكبار يجلسون فى التراث بينما نحن على الشاطئ الرملى او على السلم الخلفى , تذكرنا عندما بكت أميرة عند انتهاء فترة المصيف وكأنها كانت تشعر أننا لن نتجمع مرة أخرى حيث كان ذلك الصيف اخر تجمع لنا انطلق بعده الجميع الى كلياتهم ومشارعيهم الحياتية , يومها كان الوداع مهيب , لم يكن قد تبقى على بدئ العام الدراسى الا يومان , وانطلقنا فى قافلة واحدة الى اول طربق مصر اسماعيلية ,ثم تفرق كل الى طريقه , لم نلتقى بعدها كلنا الا فى ذلك الحفل , الذى وقفنا بعد انتهائه اكثر من ساعة نتكلم ونتبادل العناوين والوعود بلقاءات اخرى , ثم الوداع كالعادة , والتلويح بالأيدى قبل ان تتوه السيارت فى زحام ليل القاهرة