مشاهد

احيانا اشعر انى من هؤلاء الذين اختصهم القدر بمعايشة لحظات من تلك الفاصلة فى حياة البشر , وكأن سينما الحياة تأبى الا ان تجعلنى ارى لقطات الماستر سين فى شريط حياة مجموعة متنوعة من ابطالها , مشاهد تولد فيها اشياء وترحل اشياء , ثمة مؤامرة بين سينما الحياة ووسائل المواصلات أجد نفسى بسببها فى مكان ما ولحظة ما اشاهد حدث قد لا يستغرق ثانية ولكنه ينهى سنوات قبله او يكون بداية لمشهد جديد من مشاهدها , اكم من مرات يقف فيها لقطار لحظات او يهدئ سائق السيارة من سرعته ليهدينى زوم كاميرا الحياة مشهدا او لقطة مسروقة من احد ايام البشر , مرة ارى اثناء وقوف تاكسى استقله فى احد الأشارات لثوانى كانت كفيلة تلك الثوانى لأرى فتاة تخلع دبلتها وتعطيها لشاب يواجهها وتنطلق وينطلق وانطلق فى مشهد كلاسيكى , مرة اخرى اثناء بطولة افريقيا بينما استقل اتوبيس بورسعيد القادم من رمسيس واثناء مروره فوق احد الكبارى بالعباسية امام احد شبابيك المنازل لثانية واحدة رأيت فيها من الشباك هدف مصر ثم اكمل الأتوبيس رحلته فى هدوء , لحظات اخرى عاصرتها من تلك التى يميل القدر على اذنى ليخبرنى ان ثمة شئ بين هذا وتلك , اكم من مرات رأيت فيها شاب وفتاة يلتقون لأول مرة وكأن الحب اراد ان يشاركنى ولادة قصة جديدة من قصصه لأسمع بعد فترة خبر زواج وخطوبة وما شابه , منذ ايام واثناء ركوبى اتوبيس القاهرة من بورسعيد , جلست جانبى فتاة فى عقدها الثانى يقف بجانبها والدها حاملا زجاجات المياه والعصائر والمجلات وقلق كبير فى عينيه , يشرح لها للمرة الخامسة كيف تنزل فى محطة الماظة وتركب تاكسى الى ميدان الحجاز , وهى تطمئنه مرة بابتسامة واخرى بضغطة على يديه , قبل تحرك الأتوبيس قبلها الرجل وذهب , عندما تحرك الأتوبيس واثناء دورانه من احد الشوارع رأيت بطرف عينى الرجل مسجى على الأرض فى اغماءة بينما عدد من المارة ملتفين حوله

حبيتى كام ؟

حبيتى كام الأسبوع ده ؟

وسبتى كام

ضيعتى كام قلب معاكى

فى طريق اوهام

قلبك ده ولا محطة

مليانة وشوش

رجالة تتخانق جوه

وعيال بتحوش

واكمنى حاجز من بدرى

واصحابى مجاوش

انا قلت انجز واحبك

واهه كله فاشوش

أحمد

سلمى صباحى....ساقية الصاوى ...الجمعة 4 يوليو

بعد نجاح حفلها الأول والثانى تقيم الصديقة العزيزة المطربة سلمى صباحى حفلها الثالث يوم الجمعة الموافق 4 يوليو على مسرح قاعة الحكمة بساقية الصاوى ,, سلمى صباحى والتى تعمل مقدمة برنامج شبابيك على قناة دريم تعتبرمن اجمل الأصوات الشابة التى ظهرت مؤخرا على الساحة ,, من جانب اخر سلمى صديقة عزيزة على المستوى الأنسانى والفنى حيث قدمت معها مجموعة من الأغانى كانت بداية

من اغنية (( هتعرفنى )) فى حفلها الأول حلم ,, تلاها مجموعة من الأغانى اخرها اغنية .. خد بس قرار

سلمى صباحى ....الجمعة 4 يوليو ....على مسرح الحكمة بساقية الصاوى ..الزمالك

..........

فى قلبى انكتبلك شهادة ميلاد

يا ريحة الفانيليا

يا صوت الكمان

قابلت وعرفت ولفيت بلاد

تروح الأسامى

ويفضل.........؟

صور

مثل أميرة من أميرات الأساطير اقتحمت حياتى , ومثل غجرية اسبانية غيرتها , رأيتها فى أحد الكرنفالات الثقافية , قدمها الى صديق مشترك , تم التعارف المعتاد وكالعادة فى مثل تلك المواقف تطورت العلاقة سريعا , ما بين تيلفونات واميلات ومقابلات فى بعض الأحيان , مضت بين طرقات عالمى الصامت بصخب , فتحت شبابيك قلبى القديمة وجعلت رياح الحنين تنعشها من جديد , وكعادة تلك العلاقات ايضا ومثلما بدأت بقوة ضعفت بقوة ثم استقرت على وتيرة واحدة , وأثناء تنظيمى لبعض ملفاتى الشخصية على جهازالكمبيوتر وجدت ملف صور لمعرض صديقى الرسام , معرض يرجع تاريخه لعام مضى , واذا بصورة ضمن صور الأفتتاح أجدنى واقفا اتأمل احدى اللوحات بينما تقف هى جانبى تتأمل لوحة اخرى , كل منا ينظر تجاه الأخر ولا يراه , وعندما عرضت الصور عليها اندهشت جدا من الصدفة والنصيب الذى جعل كلانا لايرى الأخر ولا يتطرق لموضوع معرض صديقنا المشترك , ولأنها كانت تتعامل من منطلق أميرة أسبانية ولأننى كنت اتعامل من منطلق شعبى بحت فقد أخذت العلاقة فى الخفوت تدريجيا مثل النار الى ان خمدت تمام وانقطعت الصلة للأبد فى شجن يشبه رحيل طائر مهاجر على أنغام أخر أغانى الشتاء , أمس وبعد ان قابلت أحد الأصدقاء واخذت منه صور احتفال بورسعيد بشم النسيم , وبينما استعرض الصور فاذا بى اجد صورة عامة للأحتفال اظهر فيها اتكلم مع احد الأصدقاء بينما نفس الفتاة تقف مع صديقاتها متابعة مظاهر الأحتفال , لم ارها ولم ترانى , وكأن مكتوب على كلانا الا يرى الأخر.. ولو لمرة واحدة

زحام عاطفى

شارع قلبك الضيق

ساع مية

وما كفانى

لكنى يا قمرى مستنى

عشان خاطرك

صف تانى

أحمد

على الألفى...مع أيامنا الحلوة...ساقية الصاوى 9 مايو

على الألفى...مع أيامنا الحلوة...ساقية الصاوى 9 مايو

حمل بصوت على الألفى فيديو أغنية : ع السمسمية +بتغنى لمين يا حمام

أخر شتا

مليت عيونى بالمطر

لما الشتا

سلم عليا برختين

وقال مسافر

لما النوارس

سابت شطوطنا وبحرنا

وطيرى خاصم حينا

لبلاده هاجر

أحمد

خد بس قرار....دويتو جديد بين سلمى صباحى وشريف...من كلماتى

الصديقة العزيزة المطربة سلمى صباحى قامت بعمل أغنية جديدة فى اطار حملة ( حماية ) الأغنية الجديدة بعنوان ...خد بس قرار...وهى دويتو بينها وبين المطرب شريف اسماعيل....الأغنية من كلمات العبد لله أحمد شلبى ومن الحان شريف اسماعيل وتوزيع احمد المليجى

تم تسجيل الأغنية اليوم الجمعة 4 ابريل تحت اشراف مهندس الصوت المايسترو محمد عثمان

الأغنية للتحميل ...خد بس قرار

انتظار

أحلام غرقى

والحلم تبعثر فوق صخور العمر

كعدو نهار

الحب رسالة

فى قلب زجاجة الى بحار

قد يصبح يوما مرفأ عشق

قد يصبح دار

أمنية أنثى

تدنو برفق من اعصار

وما بالقلب حيلة

سوى الأنتظار

الأنتظار

أحمد

عدسة....أيمن نصار

فليس سوى أن تريد

هى أشياء لا تشترى

فليس سوى أن تريدْ

من قصيدة ..لا تصالح

أمل دنقل

على الألفى...مع أيامنا الحلوة...ساقية الصاوى 7مارس

يوم الجمعة القادم 7 مارس 2008 ولثانى مرة مع فرقة أيامنا الحلوة سيغنى صديقى وبلدياتى على الألفى على مسرح ساقية الصاوى , الفرقة التى تضم أصوات جميلة مثل سلمى صباحى وشريف اسماعيل ومحمدخلف ونادر نور ومجموعة جميلة من الشباب , على الألفى وكما أقول عليه دائما ليس مطرب جميل الصوت فحسب , فكثيرون هم من يمتلكوا جمال الصوت , لكنه يمتلك من الأحساس ما يجعله من اكثر المطربين قدرة على ايصال المعنى الى بسلاسة , مشوار طويل انتقل فيه على بين عدة أماكن بحثا عن فرصة محترمة فى الغناء , ومن مسرح الجامعة الى مسارح بورسعيد ثم القاهرة ,وحاليا انتهى من وضع الحان غنوة فيلم (( ماشين بالعكس ))والتى ستغنيها المطربة سلمى صباحى ,, اشتهر على فى بدايته بأداء أغنية (( تلات سلامات )) وقدم العديد من الأغانى من الحانه وكلمات اصدقائه , على الألفى بالنسبة لى رفيق رحلة وتجربة جميلة,, أقمنا خلالها العديد من الندوات والأمسيات الشعرية والغنائية فى أغلب مسارح بورسعيد , غنى لبورسعيد والبحر والحلم والناس , هذه الحفلة بالذات ...سيغنى فيها على الألفى مفاجأة ,, أسعدتنى بشكل كبير جدا وانتظرها بكل شغف....بالتوفيق يا علوة

من أجمل الأغانى التى احبها بصوته (( تلات سلامات )) للرائع محمد قنديل .........تلات سلامات

أغنية وحشانى كتير

ومن الأغانى التى كتبتها وغناها على الألفى .........اللى انكسر ,, بره الدايره ,, عرفتنى بصوت سلمى صباحى

حبل الكلام

حينما كان يأتى مبكرا , كانت تأتى مبكرا , وعندما كان يضع بين راحتيها تحية الصباح المشبعة برائحة البحر , كانت تترك صباحاتها الفرنسية النكهة تنعش روحه , وعندما كانت الحياة تسرق كل منهم من عينى الأخر , كانا يتذكران بعضهما على فترات متباعدة من اليوم بكلمة أو ابتسامة , تحكى له عن قطتها , ويحكى لها عن مدينته , وعندما تناقصت صباحتها الفرنسية , تضائلت صباحاته الدافئة , ولكنهما لم يكفا عن التواصل اليومى , فى شكل وردة , اعتاد أن يعطيها اياها مع كل تعامد يومى للشمس على الأرض , وعندما كان يتأخر فى اعطائها الوردة اعتادت ان تطلبها بأثر رجعى, وبمرح جعله يجعل الوردة وردتين وثلاثة أحيانا , وعندما كفت عن التواصل من جديد , لم يكف عن اعطائها الوردة وان تناسى فى بعض الأحيان , ولم تطلبها هى فى أحيان أخرى , نضب الكلام , وصار اليوم طويلا والحياة أبطئ , بدأت ملامح كل منهم تتلاشى فى عيون الأخر , فجأة ..سألها عن مصير الورد المتكوم عنده لها من ايام طوال , لم ترد , لم يعرف لماذا , ولكنه أخيرا,, كان قدعرف شئ واحدا فقط

عشاق قدامى

قال...نحن أرواح قديمة قدم العشق , متقلبة تقلب البحر الذى نشبهه فى هدوئه ويشبهنا فى ثورته , نعرف بعضنا البعض من النظرة الأولى , فى مرحلة النداء الأول تبدأ الشوارع العتيقة فى الأعتياد على نقرات خطانا المتمهلة , بينما تنطبع ملامحنا على زجاج البيوت الخشبية , يعتاد البحرعلى مواعيدنا المتفاوتة ما بين ليل ممطر ونهار بكر , نختار الشتاء لنتلون بلونه بينما نلون باقى الفصول بألواننا المختلفة , ومثلما اجتمعنا على وعد , نفترق على وعد , ويبقى رباط الروح وثاقا للمحبة يجمعنا للأبد , فلا تسألنى كيف عرفتك , فانت الأخر عرفتنى , تتناص العيون وتتوافق وتتكامل لتحل المسألة الأذلية , أنظر هناك , أترى ذلك الطفل , انه منا , عيناه الحائرتين بين أجنحة النوارس وأنامل الصياد العجوز ستخبرك بأنه منا ,, نحن الذين نعيش بقلوب أطفال , وعقول باحثين وأجساد رحالة , نمر كالعطر , ننصح كمعلم ونتعلم كتلاميذ , نخطط كقادة ونهجم كفدائيين وندافع كشهداء , نحن المتأنقين كلوردات المتبسطين كبحارة , نمتلك خيال الشعراء , وعيون مصورين , نعرف أن أقرب الطرق بين نقطتين هو الخط المستقيم , ونعرف أنه من الممكن الوصول من طرق أخرى , نحن الذين أدمنا الفرح والحزن والدهشة , نعرف أن الجمال جمال الروح , والروح من أمر الله , والله جميل يحب الجمال , والجمال فى كل شئ , فابحث عنه...تجده

عدسة ...وليد منتصر

زوربا البورسعيدى

موجود ومش موجود

وسمعته سبقاه

بنطير نعدى حدود

نلاقى ناس عارفاه

سلطان ولو معهوش

والضحكة متفارقوش

وصعب متحبوش

لو عشت لحظة معاه

...........

فى كل شارع ولد

متسمى على اسمه

وفى كل حتة وبلد

ينادونا وباسمه

لاعمرنا شفناه

لكننا عشقناه

قبطان كتير نلقاه

منتهش يوم عنه

..........

قالوا بتاع حكايات

قالوا كلام ظلمه

عدا وخط وفات

ولا عمر شئ همه

طول عمره ابن البلد

ولا عمره خاف من ولد

والعشق فينا اتولد

لبورسعيد منه

أحمد

عدسة..وليد منتصر

لأنى وعدتك.....أسف

لأنى وعدتك

أنى هكون..أول تيلفون

هيجيلك وانتى بتطفى شمعة جديدة

فى سكة عمرك

ورغم نهاية الخط الواصل بينى وبينك

سبت ايديا

الحاضنة موبايلى الطارح اسمك

تلضم كل حروفى المتسرسبة

فى رسالة أخيرة

كل سنة وانتى طيبة

..................................

وأسف

عشان خطيت بأحلامى لأحلامك

بدون اذنك

صحيت من نومى على حسك

بيجرح فيا ويقطع

وخفت أرجع تقولى جبان

وأنا جوايا الف حصان

بيتسابقوا عشان ترضى

ومش راضية

لكن فاضية

تقوللى عليا بتلكك

وأنا الساكت ..بقيت ساكت

لكن ماتت حاجات فيا كانت ليكى بتتكون فى حلم وليد

وكنت خلاص هقولهالك.. وأمد الأيد

لقيتك حد تانى بعيد مبعرفهوش

وأنا اللى يبعنى مشتريهوش

لكنى بقيت على حلمى وقلت نعود

رسمت طريق رسمت وعود

وقلت أحلم ومش هخسر

صحيت من حلمى متأخر

وقلت نسيت اكيد ناسية

لقيتك قاسية مش ناسية

فضلت وراكى ميأستش

وعشت الدور كأنى حبيب

لقيتك حد تانى غريب كأنه ما كان

فاكرة زمان ؟

طلبتى أقول فيكى ولو بيت شعر

ادينى اهو عشان خاطرك

كتبت قصيدة تقريها

وانا بشطب حروف اسمك من الأوراق وبمحيها

وجوه عيونى.. فى دمعة حنين وفراق

حرام تنزل...لكن نزلت

بخبيها

أحمد

أه يا بنت حلوة جدا.....ديوان أحمد فوزى الأول

صدر منذ أيام عن دار ميريت ديوان (( أه يا بنت حلوة جدا )) وهو الديوان الأول لشاعر العامية والمخرج أحمد فوزى ,, أحمد فوزى شاعر ومخرج له فيلمان تسجيليان الأول بعنوان (( كل يوم )) والثانى بعنوان (( موكا )) ,, كما عمل كمساعد مخرج فى العديد من الأفلام التسجيلية ,, أحمد من مواليد بورسعيد 1982 ,, حاصل على بكالوريوس تربية وهو يدرس فى معهد السينما قسم سيناريو ,, وهو أحد أهم الأصدقاء الذين خرجت بهم من تجربة الجيش ,, حيث قابلته لأول مرة بعد منتصف ليلة صيفية فى الصحراء ,, وسافرنا فى نفس الليلة سويا عائدين لبورسعيد ,, ورغم اختلافنا الجزرى فكريا الا اننى ارى فيه موهبة نادرة لا ينكرها كل من تعامل معه...ع البركة يا أبو فوزى

حلم ولا علم

شارع خالى , طرق ليلية مغطاة بسكون ما بعد منتصف الليل , أمارس دورى فى سيناريو رحلة عودتى اليومية من العمل , الميكروباص القابع على يمين الطريق يغرينى بالتخلى عن صعلكتى فى الشوارع البادرة هذه الليلة , من الشارع الجانبى تظهر فتاة فى ثوب أصفر كلاسيكى وكأنها خارجة لتوها من افلام الستينات , تدلف للميكروباص فى سكون , نظرة فى المرأة الجانبية بينى وبين السائق أدركت منها أنه ينتظرنى , خطوات سريعة كنت بعدها فى مقعدى المفضل أخر السيارة على اليمين , وما أن جلست الا ولاحظت عدم وجود الفتاة , نظرت أمامى , ثم بجانبى , ثم بجانب السائق الصامت الذى بدأ بالتحرك فلم أجدها , راودتنى أفكار تجاه الفتاة ثم تجاه السائق ثم تجاه الأثنين معا , ثم أرجعت الأمر الى الظلام وارهاقى الفترة الماضية , تناسيت الأمر بسرعة بينما سمح لى تمهل السائق فى القيادة من التمعن فى المدينة النائمة وكأنى أراها لأول مرة , كأننى عاشق يتأمل جسد محبوبته النائمة أمامه فى دلال , عند نهاية الخط توقف السائق فى صمت , تحركت لأنزل معطيا اياه الأجرة فى صمت أيضا , تحركت خطوتان للأمام وبدأت سيرى على يمين الطريق بينما صوت محرك الميكروباص من ورائى يعلن انطلاقه من جديد , مر بجوارى فألقيت نظرة أخيرة عليه , لأجد السائق الصامت متمهلا كما هو بينما تجلس ورائه فتاة فى ثوب أصفر كلاسيكى كأنها خارجة لتوها من أفلام الستينات

راجل فريد

منذ عامين , هنا فى نفس المكان , كتبت بوست بعنوان دنيا , حيث رحل وقتها شخص من أقرب الأشخاص لى , الأن وبعد مرور عامين , كنت فى مكان طالما أخذنى اليه , وطالما ذهبت اليه وحدى

ولسه فلوكتك ع الرملة

بتنادى العدة المتخبية فى بطن سريرك من سنتين

وكأنك هتقوم الفجر

وترمى شباكك جوه البحر النايم لسه فى حضن الليل

لساها بتحلم تركب موجه العالى

زى ما كنت زمان بتريسها

وبعد العصر ترقع غزلك

المنصوب على حيطة قديمة

رسمت عليها زمان وأنا عيل وردة ومركب

لساها بتحلم ترجع يوم

وأنا يوم ورا يوم بفتكرك كل ما أروح البحر لوحدى

وألمح مجدى فى نفس مكانه أخر الحارة

وضحكتك لما تناديه

وشخطتك فى البت سارة

تنكسف.. تقوم عاطيها أوام جنيه

لسه فلوكتك بره البحر بتحلم بيه

لساها بتحلم يوم تلقاك

ولا تعرفش ان انت هناك ..وخلاص مش جاى

والبحر خلاص بقه موج نساى

ولا عدش الغزل فى قلبه يفيض

ريس بالفطرة فى علم الصيد

بفلوكة ومدرة وخليوة

حطيت البحر فى غنيوة..وفى قلبى النونو رميتها زمان

لفيت وكبرت بقيت انسان

والغنوة فى بالى مفارقتنيش

لسانى بحب البحر وطيشه ومن دراويشه

وكل ما أروحله أقرالك الفاتحة

ولسه فلوكتك ع الرمل بتستنى الطرحة

أحمد

عدسة ..وليد منتصر

اليها فى عيد نصرها....احلى سلام مربع

بورسعيد

وكمان مرة بورسعيد

مليون مرة بورسعيد

يعنى بلدى

اللى ساكن فيها وساكنة فيا

يعنى كسرى والحميدى

بورفؤاد والمعدية

يعنى الكنال

وأجدع عيال بتشجع النادى المصرى

وبيعرفوا يقولوا لأ

المبدعين أه

المدعين لأ

والبحر

كمان مرة البحر

ألف مرة البحر

والشتا ع البحر

والسهر ع البحر

وانا والبحر

وانتى

كمان مرة انتى

أول وتانى وتالت.. انتى

حبيبتى

اللى لسه بتشاور عقلها

وبقولها

بينى وبينك كتيييير

بورسعيد

والبحر وبكره

الشتا

فيروز ومنير

وقلبى

كمان مرة قلبى

اللى بيقول هى

وتانى وتالت ورابع

حاجات كتير فيكى......حاجات كتير فيا

أحمد

عدسة ...الفنان وليد منتصر