Monday, June 26, 2006

ثلاثية الحلم والحزن

اهداء الى من اعطتنى معنى الحلم
المقطع الأول


لو هتحسى فى لحظة بوحشة
أوعى تقوللى..... فى يوم انا وحدى
لأ....مش وحدك
ياللى فى قلبك مالكيش زى
و أوعى تقولى انه مجاش
لأ......منساش
هيفضل فاكر
علشان بكره بتاعك جاى

لأ مش وحدك
والبنوتة الساكنة عيونك
لسه بتحلم
والفنان الساكن روحك
لسه بيرسم
لأ مش وحدك

و فرضا يعنى
مرة مشيتى فى سكة لوحدك
ولو لساعااااااات
صوتك فين......؟
دا الأحساس أندر م الماس
بيجمع ناس
ويعزف لمة
ويملى السكة الفاضية حااااااااجات
لأ.........مش وحدك
المقطع الثانى
مش لوحدك
انتى ليه
قلتهالك مرة وكان لسه مجاش
قلتهالك انتى حلم متنساش
و هتلاقيه
حلم طاير فوق يرفرف
شوق فى عينه كأنه يعرف
انه اللحظة دى هيخطف
احلى وردة تحس بيه

مش لوحدك
لسه فاكرة ؟
قلتهالك مرة من شهور
قلتهالك
شفت جوه عنيكى نور
جوه قلبك خير بحور
حلم عمره ما حاشه سور
شفت بكره
شفت غنوة تايهة منا من سنين
شفتها رجعت معاكى من يومين
عشتها
وعشنا حلمك
وانتى ليه
وانتى فيه
مش لوحدك
المقطع الثالث
شدى حيلك
واللى سافر راح يجيلك
ماشى يضحك
احلى ضحكة من عنيه
راح تقولك
انتى همسة فجر صاحى
شمس ساكنه نور براحى
انتى احلى وردة
خضرت بستان جراحى

احمد

8 comments:

radwa osama said...

البورسعيدي الجميل
احييك تحية خاصة علي المقطع الاول والثالث..اظن قلت لك قبل كدهاني بنبسط لما بدخل مدونتك

Dananeer said...

حلوه بجد اوى

أبوشنب said...

الكلام ده لحد أنا أعرفه كويس

مش عارف ليه حسيت بكده يا بو حميد

عموما نجاملك في الأفراح

hesterua said...

رضوى
مبسوط ان كلامى عجبك . وشكرا على كلامك الرقيق بجد ومنورانى دايما
دنانير
شكرا بجد اوى
))
ابز شنب
منور يا جميل
على فكرة الكلام ده لشخصية عزيزة جدا على قلبى ...وهى تستحق اكترمن كده بكتير
معتقدش انك تعرفها لأنها خارج الوسط التدوينى تماما
داليا
تانى

أبوشنب said...

بس خلاص متزعلش

أنا معرفهاش

مبسوط

Unknown said...

حلوة قوي يا احمد
والله انت شاعر جامد والثلاثية دى لو اتخطت ف قالب غنائي هتبقة حاجة جامدة
يخرب بيت البراءة اللى ف كلامك بجد

Anonymous said...

مشاعر رقيقه الى مالا نهايه

metcy said...

كلامك مسيني وحاساك بتكلمني وهنا بس اقدراقولك انك ناجح عشان بتوصل للجوا اللي قدامك..انا مالش في البلوحجات بس حتابع اكيد كلامك

واحدة حاست انك بتكلمها