العبد لله.... يوم 3-7-1987
وهفضل أحضن الدنيا
وأفتح صدرى للأيام
أحب الشط والمية
وأقول فى البحر أحلى كلام
أدوب أحلام
وعمرى ما امل
بريحة الفل أفتكرك
برنة عود
بضحكة طفل متبسم يدوب مولود
بزقزقة الطيور الصبح جنب الشيش
بشتاقلك ومعرفكيش
لكن بكره هنتقابل
أكيد بكره هنتقابل
وبمشى وأعيش
وأتكعبل ولا ازعلشى
هتفضل ضحكتى فى وشى سنين وسنين
فى قلبى حنين
لحاجة لسه معرفهاش
لحلم بعيد
لشوق طاير
فيونكة حمرا فى ضفاير
لمعنى ولسه متغناش
وهغنيه
هكتب عنه وأكتب ليه
وأغنيلك
وأغنيلها وأدوب احساس
حاجات من صغرى حبيتها
فحبيتك
بيوت أهلى.....صديق راجع
وشوش الناس
ريحة المطرة فى الشارع
وطعم البحر والمواويل
فى عز الليل
أحن وأقوم اصلى الفجر
أشوف العمر زى الطيف
يروح الصيف
ويجى الصيف
وانا فى الدنيا زى الضيف......جيت وهفوت
حاجات بتعيش
حاجات بتموت
ناس تنسانى وانساها
وناس تخطفنى جواها
وبلقاها
بتتغير فى كل طريق
ولسه برئ...وقلبى رقيق
تضيق الدنيا مهما تضيق
أموت فيها وأطير وأفوت
لحد ما أموت
عمرى ما هبكى لو ثانية
وهفضل أحضن الدنيا
وأضحك تضحك الأيام
ولما القاكى والقانى
هكتب فيكى احلى كلام
وهلقاكى
أحمد
الصورة ...عدسة أبويا... ربنا يخليه
11 comments:
كل سنة و إنت طيب .. و إنت أجمل .. و إنت أقرب .. و إنت أعمق ...
و تفضل تحضن الدنيا بحروفك .. و هي تحضنك بحبها و حنانها ..
كل سنة و إنت طيب يا بن عمي ..
قوي قوي قوي قوي، ايه الحلاوة دي يا ابو حميد، عقبال 100 سنة
كل سنة وانت طيب يا احمد
وتسلم عين الوالد الي صورتك
وربنا يخليكم لبعض
بس عندي سؤال هو انت لسة
لما تلاقيها حتكتب فيهااحلى كلام
هو في اجمل من كدة كلام؟!؟
allah 3la el klam
kol sana w enta tyb
انت فنان جامد اوى يا احمد
وانت حد جميل يستهل كل خير
وان شاء الله الدنا هتفتح ليك جنحتها
وانت فاتح ايدك وطير يا فنان
احساسك جميل جدا يا احمد
الله جميل اوي وعذب جدا تسلم ايدك
رغم انه الكلمت كلها عجبتنى بجد الا انه الكلمه دى فضلت تتردد فى راسى لحد ما خلصت كل الكلمت
بشتاقلك وما اعرفكيش
حلوه اوى بجد
وكل سنه وانت طيب وبخير ومحق كل حلم حلمته
عارفه انها متاخره اوى بس معلش
مش تزعل باه
ميرسى ليك
:)
هتفضل ضحكتى فى وشى سنين وسنين
فى قلبى حنين
لحاجة لسه معرفهاش
لحلم بعيد
لشوق طاير
لمعنى ولسة ما اتغناش
الله
لخصت التوهة والإحساس بانتظار شىء ما
حقيقى الله
بجد بجد
شكرا لكل من اهتم بالرد والتعليق
تحياتى
جميله القصيدة قوي قوي قوي يا احمد
تسلم ايد اللي كاتبها
:)
عارف يا احمد
دايما كل ما بدخل عندك
بحس بان انت عندك كمية امل
تفيض
رغم الوجع اللى اكيد موجود
بس انت لسه حابب العيشة
و بتضحك
و بتحضن الدنيا
بحس كمان ان خسارة انى معرفش بنى ادم زى ده فى الحياة
ده كله على جنب و على بعد انسانى
اما عن البعد الفنى
فكتاباتك لازم الواحد يتنفسها
و بعدين يغمض عينيه و يحلم
ربنا يخليك دايما انسان اوى كده
Post a Comment