Monday, July 16, 2007

هتعرفنى.....عرفتنى.....أشرف وسلمى



الأسبوع ده اتجوزت واحدة من اجمل وأجدع الناس اللى عرفتها , الأسبوع ده كان فرح سلمى صباحى , الصوت الجميل اللى بحبه , والتجربة الجميلة اللى بحترمها , وطبعا المذيعة اللى كل الناس بتحبها

سر فرحتى الكبيرة مش عشان واحدة عزيزة عليا بتتجوز بس ,

او لأن العريس صاحبى وفرحان له لأنه فعلا انسان جدع

اللى كان مضاعف احساسى بالفرحة دى انى كنت جزء من الحالة الرائعة فى مراحل كتير فيها

فى اول حفلة لسلمى من سنة ونص , طلبت منى أغنية نفسها تغنيها من زمان , وقالت ليا على الفكرة وهى انها عاوزة تعمل أغنية لحبيبها اللى لسه مجاش وتقوله انا عارفة انك موجود وهقابلك , الحمد لله ربنا وفقنى فى كتابة الأغنية ولحنها الملحن محمد خلف , كان اسمها هتعرفنى وغنتها سلمى وعملت صدى كويس ما شاء الله

وكان مدخلها بيقول

هتعرفنى......أنا عرفاك

سنين قبلك وانا رسماك فى حلمى خيال

روحين تايهين

مالينا حنين

مشفناش بعض لكن طيفنا لبكره امال

وعدت الأيام وقابلت سلمى أشرف , ولقوا بعض وحبوا بعض , وجيت وقتها وعملت لسلمى أغنية ((عرفتنى ))اللى تعتير الجزء التانى من هتعرفنى واللى بتقوله فيه انى عرفتك زى ما قلت ,المرة دى الغنوة كانت من الحان صديقنا المطرب والملحن على الألفى والغنوة الحمدلله عملت صدى كويس وحالة كويسة ,,

و كانت كلماتها بتقول

مش قلتلك انا عارفاك ؟

صدقتنى

حلمت بيك وانا رسماك

وقابلتنى

حلمت بيك لقيت عنيك نفس العيون

وعدت الأيام وقربت اكتر من سلمى وأشرف وبقينا اصحاب

يشاء ربنا انى أكمل الحالة الجميلة دى فى فرح سلمى وأشرف لما كتبت ليهم دويتو غنوه مع بعض فى بداية الفرح, الدويتو اللى اول ما شفتهم بيغنوه عنيا دمعت من الفرحة ,, وكانت سلمى بتقول لأشرف فى او الدويتو

قبل ما أشوفك

كنت بشوفك

حلم وبستناك

فيرد أشرف عليها ويقولها

وانا من قبلك

كنت بقابلك

جوه الحلم ملاك

الفرح ما شاء الله كان من أجمل ما يكون , قادة الحزب الوطنى وقادة احزاب المعارضة , أجمل موقف حصلى فى الفرح انى جالى تيلفون فطلعت أرد بره القاعة , ومكنش فى حد بره خالص غيرى خلصت التيلفون وسمعت صوت واحد داخل من الباب الرئيسى , بصيت لقيت محمد منير داخل قمت شابط فيه وداخل معاه , واول ما شاف سلمى مسك المايك وغنالها الليلة يا سمرة وكلنا بنغنيلها معاه

بارك الله لهما وبارك عليكما وجمع بينهما فى خير

أغنية هتعرفنى تحميل

أغنية عرفتنى تحميل

22 comments:

كرانيش said...

البنيئادمه دى انا بحس انها جايه من عند الملايكه


بجد

ربنا يهنيها ويهنيه يارب

Lemonada said...

ييييييييييييييياه
جامد جدا جدا
عارف انا بحبها جدا
ومش بشوف دريم الا عشان اسمعها
بحب طريقت تقديمها وكلامها
كدة كل من القلب
بجد الف مبروك
لصاحبك
ولسلمى
لازم توصل السلام
هههههه
على فكرة انا دايما بتعبك معايا بتوصيل السلامات
بجد نفسي اعيط بس من الفرحة
الحمد الله في لسة ناس طيبة وبتحب بعض بجد
عقبالك يا عم
تحياتي
مستنياك تزرني
اصلي كنت مطحونة في الشغل ومش شايفة نفسي حتى
بس النهاردة قلت كفاية لازم اشوف المدونات واكتب حاجة
ان شاء الله تعجبك

Anonymous said...

جميل جداً يا ابو حميد

عروس البحر said...

اده دي سلمي اللي في برنامج شبابيك ده انا بحبها جدا و الف مبروك ليهم هما الاتنين
تحياتي

rack-yourminds said...

احييك علي احساسك الجميل,وربنا يوفقهم ويسعدهم

وان شاء الله نشوفك كده كاتب اغاني كبير زي مرسي جميل عزيز

بوست جميل وممتع احييك عليه

Unknown said...

مبروك للعروسة والعريس
والجري طبعا للمتاعيس



بس المميز في الحدوتة

هو كلمات الاغاني


اللى حولت قصة الحب الصغيرة

لحالة جميلة

ربنا يسعد الجميع

ويوفقك يا زيفاجو يا جامد

hana said...

سلمى دى لذيذة ورقيقة جدا

ربنا يوفقها هى وعريسها


هنا

Reem said...

بارك الله لهما وبارك عليهما وجمع بينهما فى خير

ربنا يحميهم بجد سلمى من اجمل الشخصيات اللى قابلتهم فى حياتى ربنا يحميها لانها تستاهل كل الخير وحد غالى عليا شخصيا اوى وقفت معايا فى وقت كنت تعبانة فيه ربنا يحميها

وطبعا بلاشك الاغانى جميلة كتابتا وتلحينا واكيد الصوت ربنا يحميهم

مدونة كسبان said...

ربنا يبارك ليهم
سلمى من الناس
اللى ليهم اسلوب والقليلين جدا
اللى انا بأعتقد ان هيبقى لها مستقبل اعلامى جميل
خالص تحياتى

Unknown said...

السلام عليكم

أخي العزيز أحمد البورسعيدي :

ممكن إيميلك

أريد أن أكلمك بموضوع مهم وضروري

تحياتي

Amany said...

حلو اوى ما شاء الله عليك

tar7elba7r said...

ياااااااااااااه يا احمد


فكرتنى بالذى مضى

بسمه عبدالباسط said...

بجد حكايتهم رائعة ولفته جميلة منك قوى
مليون مبروك ليهم
ربنا يسعدهم
تحياتى لك

مريم said...

متعرفش قد ايه الواحد بيفرح لما يشوف حدوتة بتكمل على خير
عقبالك يا ابو حميشو

david santos said...

BELO!
Congratulations.
Have a good future.

do3aa said...

انا عرفت سلمى من احمد

بجد انسانة جميلة اوى وحبتها اكتر لما شفتها فى برنامج شبابيك ربنا يحميها يارب

Yasmine Adel Fouad said...

انا كنت بدخل البلوج هنا من فتره للتانيه
و اول ما دخلت يمكن من سنه الا حاجة بسيطة
لحظت العلاقة اللى بتجمعك بسلمى و على الألفى و جيرونيمو

و اول ما سمعت سلمى كانت فى اغنية هتعرفنى
ساعتها صممت اجمع كل اغانيها
بس مكنتش عارفه انك انت اللى كاتبها

ايا كان يعنى ربنا يباركلهم
سلمى مش بس حد جميل كفنان لكن اعتقد انها جميله كانسانة
و ربنا يباركلها هى و اشرف

و هحمل عرفتنى و اسمع
شكل فى امل بقى

:)

ميرسى اوى ع الذبذبات الجميلة اللى وصلتنى م البوست دى

jeen said...

الف مبروك على الفرحة

والف مبروك على الأغنيتين ولو انها متأخرة لأن دى اول مرة اسمعهم

صوت حالم وكلمات رقيقة ولحن حنون

عقبال الأعمال القادمة

hesterua said...

كرانيش

فعلا هى من النوع الشفاف ده
ربنا يهنيها فعلا


لمونادا
السلام يوصل يا قمر
سلمى تستحق كلامك الجميل فعلا
بالتوفيق



الأقطش
انت الأجمل يا احمد
بعض ما عندكم يا قمر


عروس البحر
اه هى عقبالك


واحد
شكرا يا قمر
منور



جيرو
شكرا يا باشا
عقبالك
شكرا ع الأطراء
واكيد انتى عارفة انك اول حد قرا وسمع الكلام ده


هنا
يا رب يا هنا
منور


ريم
فعلا سلمى من اجمل الناس اللى ممكن حد يقابلها
قوليلى
هو انتى ريم بتاعت بورسعيد اونلاين


كسبان
منور
شكرا يا قمر


معتز
تحت امرك يا قمر
hesterua@hotmail.com



امانى
شكرا يا قمر

طرح البحر

فاكر يا واد
الساقية والشتا واول ما سمعت من زمان وانا عايزة اقولك ولا ساعة ما سلمى غنت هتعرفنى
ايام جميلة فعلا


بوسبوس
منور يا قمر
شكرا


مريوم اجميل
اخبار اسكندرية ايييييييه
عقبالك انت وعقبال ما نكتبولك فى فرحك يا قمر


سانتوس
شكرا ليك


دعاء
ازيك يا بنوتة
فينك
ربنا يوفقها فعلا



انا حرة
منورانى بجد
فينك
شكرا على كلامك الرقيق وبالتوفيق


جين
شكرا يا قمر
نورتينى
عقبالك

beroo said...

ازيك انا بحب سلمي اوي ومتابعة برنانجها وصاحبك لايق عليها اوي وما شاء الله عليك مخلص جدا لاصحابك قولهم الف مبروك عايزة اشوف زيارتك ليا وعقبالك يا قمر

حدوته مصرية said...

مع انى متأخر اوى بس الف مبروووك ليهم و انا بحب سلمى مطربة ومذيعة هى جميلة

اما بقى موضوع منير ده فانا بحسدك جدا عليه ياااه

هانى المصرى said...

ازيك يا احمد ..يااخى انا بعتلك قبل كدا وقلتلك عايز نمرة على الالفى علشان نتعاون مع بعض انا بكتب اغانى وعندى مدونه فيها بعض اللى انا كاتبه
ياريت يا احمد تهتم
ومنتظر ردك
وكل سنه وانت طيب
هانى