Thursday, August 09, 2007

متنفعلكش

متنفعلكش
كلمة وقالوهالى فى كل مكان
مفيش انسان شافنى معاها
الا نادانى وقاللى انساها
متنفعلكش
انت برئ...ولسه رقيق
وقلبك ورده بتفتح
وهى سنين...دموع وأنين
من قلب لقلب تتفسح
متنفعلكش
مصدقتش...مدققتش
مشيت وياها موقفتش
لحد ما جه عليا الدور
وهنت عليها مصعبتش
قالولى كلام وهتقولوا
وميت واحد قالتهولوا
عايشة الحب بتجرب
وعمر فى يوم ما هتطولوا
قالولى بس تنساها
وابعد لحظة تلقاها
فى ثانية عايشة حب جديد
وواحد تانى وياها
مصدقتش ..مدققتش
مشيت وياها موقفتش
لحد ما جه عليا الدور
وهنت عليها مصعبتش
أحمد

9 comments:

غمض عينيك said...

حلوة اوي ياباشا وواقعية جدا

ياترى حصلت معاك بجد؟
لو كده يبقى مبروك تجربة مفيده جدا واستفدت منها

ولو من ابداعاتك يبقى تقبل اعجابي وتحياتي

محمد سمير

همسة شذا said...

ازيك يا دكتور زيفاجو

عاوزه أقولك ان بغض النظر عن اي الحلاوه اللي في شعرك انت زعلتني

انت عارف اني متابعه مدونتك استمر

الله ينور

بس برده زعلتني

Lemonada said...

جامد زي دايما يا محمد
تحفة والله
عارفة لو دة بجد حصلك ماتزعلش
كل تجربة بتخلي الواحد يقوى اكثر ويتعلم اكثر ازاي من نظرة واحدة تعرف الواحد او الواحدة على حقيقتها
اسأل مجرب
ههههه
مش نظرة واحدة يعني بس بجد ماتندمش على حاجة حتى لو كانت جرحتك
الدنيا بتلف يا ميدو
والي في يوم جرحك بكرة في حد حيجرهو وينسى

تحياتي

Lemonada said...

عارف في حاجة ناقصة البوست الرائع دة
صورةمن صور وليد
اي رايك

أسوور said...

عجبتنى جدا
انت قوى جدا على فكرة فى الشعر العامى

تحياتى

hesterua said...

شكرا لكل من اهتم بالرد

Haitham Abu Akrab said...

نغمتها لذيذه قوي يا احمد
.
.
.
.
.
ربنا يكرمها بلحن حلو

Anonymous said...

جميله موووووووووووووووت
كتبتلك تعليق
قااااااااااااد كده عند على
تبقى تعدى وتشيك عليه يا مان
انت عامل ايه بقى؟؟
سلام

محمد فاروق said...

جميله قوى الفكره يااحمد
وحلوه مفردة ماتنفعلكش وجديدة
الله ينور ياابو حميد
تحياتى ليك