Thursday, November 30, 2006

قلم

حبيبتى

حبيبتى
فى وسط الحزن تتبسم
أشوف فى عنيها أحلى كلام
فى عز الجرح تتحزم
وترقصلى
أقول يا سلام..جميلة حبيبتى فوق الوصف
تعاندها ظروف وظروف
تخطيها متزعلشى
يقابلها بحور م الخوف
تعديها ولا تخافشى
وترجع تحضن الدنيا
تقوم الصبح من بدرى
تفتح عينها ع الأحلام
لسه الحلم جواها
ساكن روحها عمره ما نام
وتجرى تطل م الشباك
تصاحب أحلى عصفورة
وتبعتلى فى ديلها سلام
تنادى لنسمة مولودة
وتكتبلى معاها كلام
بنتواعد تملى ساعات
ونتباعد كتير أوقات
لكين دايما
بنتلاقى
وراح نكتب كتير حكايات
مكنتش تعرف
مكنتش تعرف
أنه يعرف
أنه فاهم كل حاجة
أنه رغم البعد بينهم
كان كاشفها
وهى ما بتعرف كسوف
هو خوف اللى ماليها
تنكشف قدامه اكتر
وكل خطوة تبديها
كان بيضحك من بعيد
وهو شايف النهاية
اللى جاية من جديد
فصول
قالوا
يمكن عشان تغير الفصول
حاول يصدق
لكنه كان حاسس بنفسه
كات غريبة
انه يربط دى بدى
قلم
كقبلة طفل رطبة
تترسخ فى العمق
مثل رائحة بيوت الجمعة
وعبق أستيكة عتيقة
أتشبث بلحظة خريفية محتبسة
أتوافق مع اللغة
سلام داخلى
لرؤية متزنة
تعانق التئام الروح
أتجرد من معنى ما
من رواسب حقد قديم
أتطهر من هالات العشق
وأترك القلم
يأخذ مساره
بينما اتشبث بالحافة
تارة مثل نباتات الضل
وتارة مثل دوار الشمس
أحمد

9 comments:

nour said...

انا اول تعليق اشطاااط
بحب كده اوى و خصوصا فى اول زيارة ليا للبلوج بتاعك..
عجبنى اسلوبك جدا جدا جدا و التعبيرات الجديدة اللى فيه..تتحزم و ترقصلى
حلوة اوى اوى

Unknown said...

انا برضه عجبتني قوي تتحزم وترقصلي دى
بصراحة الجزء بتاع حبيبتي
جامد وفيه تعبيرات حلوة جدا
كمان مكنتش تعرف أشبه برصاصة منطلقة هدفها نوع من كشف الاقنعة
الجزء التالت مفهمتش بصراحة قصدك ايه
الجزء الرابع بقة حساه تماهي شبه بتاع سولو اللى محيرنا بيه اليومين دول

ساعه الغروب said...

جميله اوى كلماتك يا أحمد

الجزء بتاع حبيبتى كلماته بسيطه جدا
الجزء بتاع مكنتش تعرف كلماته معبره جدا و صريحه
والجزء الأخير رغم انى حسيت فيه بحزن الا ان كلماته كما عودتنا دائما رقيقه ومعبره عن كل اللى جواك

علي الالفي said...

بو حميد يا جااااااااااااااااااامد
استنى قريب مني لحن مكنتش تعرف

Dananeer said...

بنتواعد تملى ساعات
ونتباعد كتير أوقات
لكين دايما
بنتلاقى
وراح نكتب كتير حكايات

حلوه يا احمد

واضح ان الشتا بتتغير فصولنا معاه!

الحلو انك توصل لشط السلام النفسى

Anonymous said...

أول جزء حبيبتي من أحلى الأجزاء
حاجه فيه لمستني
كلماتك معناها عميق و في نفس الوقت بسيط توصل للقلب

تحياتي :)

حدوته مصرية said...

جميل يا احمد موهبتك حلوة

Anonymous said...

الله عليك
يعنى بسمع سلمى و هى بتغنى فى حفلة عيد ميلاد فيروز و بقرأ شعرك
الله أوى
حبيبتى جميل اوى
و مكنتش تعرق قوى


كل الكوكتيل حلو بس دول اللى علقوا معايا أكتر


بالتوفيق

hesterua said...

نور
منورة يا نور ...وشكرا غلى كلامك ده وانتى كلامك رائع على فكرة
جيرو
الحمد لله انه عجبك
))
اصل بثق فى ذوقك جدا
ساعة الغروب
منورة يا رودى وشكرا على كلامك ده
على
عبش يا لول
ظبط عشان نتظبط
دنانير
منور يا جميل
وفعلا الشتا حكاية معايا
تامر الفنان
وصل يا مغملم وليك وحشه
كارول ومحمد ياسر وحرة
بجد شكرا قوى
ومنورينى بجد