Sunday, December 17, 2006

مش عارف ليه.....للشاعر البورسعيدى طارق على

مش عارف ليه بفتكرك ديما وانتى بتبكى
وانت بتشكى الصدفه همومك
وبترميها ف وسط البحر ف تيجى الموجه ف غفله تبل هدومك
واضحك ...... تبكى
اضحك .........وابكى واخدك بين دراعاتى واقولك انى بحبك
لكن حزنك عود قلبك انه يخاف م الكلمه الحلوه
انه يغنى الغنوه المره وينسى الحلوه
انه يروح للبحر ف يأسه
ويحبس روحه ف اوضه بعيده ف اخر نفسه كأن الفرحه حرام يحكيها
نفسى اقولك مره بحبك وترديها
ببقى شايفها ف عينك لكن كتر دموعك بتخبيها
كأنك لو قولتيها هتبقى نهايه الكون جواكى
نفسى افتكرك مره بضحكه تكون فكراكى
نفسى افتكرك يوم مش ضدك تبقى معاكى
نفسى اشوفك مره بترمى الحزن وراكى وبتبصيلى
نفسى اغمض وتغنيلى
نفسى افتح الاقى الحزن ف قلبك ارضه بعيده
نفسى افتكرك وانتى بتبكى
بعدما اكون مليت افتكرك وانت سعيده

5 comments:

ساعه الغروب said...

بجد جميله جدا جدا جدا

وكل كلمه فيها وصلتنى صح
شكرا طارق

واحمد بجد شكرا ليك لانتقاءاتك الرائعه اللى بتمتعنا بيها من وقت لاخر

أجدع واحد في الشارع said...

بجد بجد يا احمد انت فنان كبير اوى
وان شاء الله هتشوف اللى انت عايز تشوفة
وربنا معاك يا فنان

وينكى said...

لمستنى فى الصميم
بجد رائعه
خلتنى أسرح معاها, أبحر فى كلماتها
رحساسها العالى الرقيق
ودا مش جديد عليك
دعواتك ليا بقى عشان خلاص هابتدى امتحانات التيرم
كل سنه وانت طيب يا فنان
ممكن أطلب منك خدمه
عاوزه لينكات أغانى سلمى .. الحفلتين القديمه والجديده
أصلى بصراحه تهت فى بور سعيد دوت كوم وماعرفتش أسلك فيه
شكرا

شجره الدر said...

تفتكر ليه
احنا دايما بنحب الحزن؟
مش عارفه .عن نفسى انا بشوف ان الحزن فى حد ذاته حاله رومانسيه جدا
اكيد
بس حلوه قوى

Dananeer said...

حلوه اوى اوى يا احمد بجد

اتمنى تكون بخير

اول مره اسمع عن
طارق

و كل سنه و كل البورسعديه بخير
بجد وحشتنى بورسعيد