Monday, January 01, 2007

مسكون

مسكون من صغرى بجنية
ومصاحب مليون عفريت
وبربى حمام فى البلكونة
وبزرع نعناع تحت البيت
و كتبت الشعر فى كشكولى
وحلمت كتير
ورسمت قلوب فوق الحيطة
بصباع طباشير
لفيت من كسرى لأوجينا
و بواكى التلاتينى تعرفنى
واحلى بنوتة فى المينا
ساعة ما تشوفنى بتندهنى
مندوه للبحر وللموجة
ومسمى عجلتى كمان نوجة
وبحب الضحكة تكون صافية
متكونش حزينة ومعووجة
بطلت الكورة وحكاويها
وفضلت اشجع فى المصرى
اكمن بلدنا وحواريها
منقوشة فى قلبى من بدرى
وبحب الشعر اما يكون
مكتوب بالصدق ومعجون
ولاعمرى قلت اانا واد شاعر
ولا عمرى قلت انا مجنون
قريت من بيرم لنزار
وعشقت جاهين فى الرباعية
وبحب اسمع لموزار
وبموت فى احمد عدوية
صحبجى وبموت فى الضمة
على ضربة سمسمية
بروح للجامع اوقات
وساعات مبروحش وبتأخر
وبصلى التراويح والسنة
وساعات مبصليش واستغفر
جوايا كتير
و حلمت كتير
وبسابق بكره فى منامى
و الصبح بكمل احلامى
وفى يوم هقابلها
الاقيها بتضحك قدامى
اضحك واناديلها
وتاخدنى معاها لو ترضى
او ترضى انا اخدها
أحمد

9 comments:

ماشى الطريق said...

حلوة

ساعه الغروب said...

طبيعيه
وبسيطه
و رقيقه اوى يا أحمد

أنـــا حـــــــــرة said...

احمد انت مانشرتش اى ديوان
ولا ناوى حتى
علشان بجد حرام

شجره الدر said...

حقيقى جميله اوى
رقيقه وبسيطه
و...ألا قولى صحيح هو العجله بتاعتك اسمها نوجه بجد
ياشاعر يامجنون

Geronimo said...

يا جمال التفاصيل

وانت بتجمع كل الحاجات الصغيرة الحلوة دي مع بعضها

كأنك بتعمل عقد صدف تحفة وتديه هدية لحبيبتك بورسعيد

شوف تعالى نجمع الحاجات الحلوة سوا
حمام - نعناع - الشعر -الحلم -قلب - احلى بنوتة - البحر - الموجه - العجلة - النوجة - الضحكة - الكورة -البلد - الحواري - الصدق - بيرم - نزار - جاهين - موزار - عدوية - الضمة - السمسمية - الجامع - بكرة
كل دي حاجات حلوة فيك وف قصيدتك وف تجربتك العنصرية جدا ف حب بورسعيد
بجد جامدة مووووووت

3asfortels7ab said...

جميله وصافيه شوفتك من غير ما اشوفك ويارب تقابلها وتخطفها وتخطفك
تحياتي لك

zordeak said...

الله عليك


حلوة بجد


على فكرة انت شاعر جامد

sea fairy said...

وبحب الشعر اما يكون
مكتوب بالصدق ومعجون

و انا كمان علشان كده حبيت شعرك

arab girlscool said...

This is such a nice addition thanks!!!
عرب كول
شات صوتي
شات مغربي
إنحراف كام
شات عرب كول
صوتي
دردشه صوتيه
سعودي كول