Sunday, November 11, 2007

على الألفى ..مع أيامنا الحلوة ..ساقية الصاوى ..16نوفمبر

تحديث
الحفلة كانت رائعة وعلى كان مبدع كالعادة , تألق لجميع المطربين خصوصا سلمى وشريف ومحمد خلف , المفاجأة كانت على الألفى الذى يعتبر مكسب لفرقة أيامنا الحلوة بلاشك , على غنى أغنية دار يا دار , وأخد عليها سوكسيه هايل من الجمهور كان واضح جدا بعد انتهائه من مذهب الغنوة قائلا فين يا دار حيث أعطى على بأحساسه وصوته المشرق للأغنية طعما أخر, على من الناس القليلة القادرة على انتزاع كلمة الله عليك من قلبى بسهولة الموجة وده اللى عمله امبارح وهو بيقول جملة ( فى رب اسمه الكريم ) ..الله عليك يا على بجد

لتحميل أغنية دار بصوت على الألفى
اضغط
.........................................................................................................................................




ذات مساء شتوى منذ ما يقرب من عامين , كنت أشاهد قناة دريم بينما الصديقة المذيعة سلمى صباحى تعلن عن استضافتها لمطرب من العيار الثقيل , وكان ذلك اليوم هو أول مرة اسمع وأرى الصديق على الألفى والذى أصابنى بالدهشة مرتان , الأولى بسبب صوته الرائع الذى يؤثر فى وفى كل من يسمعه , والمرة الثانية عندما قال أنه من بورسعيد , حيث اندهشت كيف يكون صاحب ذلك الصوت الرائع بلدياتى ولم أسمعه من قبل , يمر يومان وتجمعنا الصدفة بعد منتصف الليل فى شارع طرح البحر وفى طقس يليق بعاشق صعلكة مثلى وفنان مثله , سألته انت على الألفى ؟...قال ..اه ...قلت ..انا شفتك فى دريم ..انت جامد يا بنى ما شاء الله , ..وافترقنا , تمر الأيام ثم تجمعنا صديقة مشتركة وهى المطربة سلمى صباحى لنصبح بعدها أصدقاء على المستوى الأنسانى.. قبل ثم نبدأ تجربتنا الجميلة والتى أعتز بها شخصيا , حيث أقمنا مجموعة من الأمسيات الغنائية الشعرية فى بورسعيد استلهمنا فيه روح بورسعيد بالأضافة لمجموعة مختلفة من الأغانى ..منها عم سليم ,بحب البحر, حكاية عادية , اللى انكسر, عدى عليا وساب.... وعرفتنى التى غنتها المطربة سلمى صباحى
على الألفى من وجهة نظرى ليس مطرب عادى , كثيرون هم من يمتلكون جمال الصوت , ولكن قليل منهم من يمتلك الحس المرهف , وعلى من وجهة نظرى من أكثر الناس امتلاكا للأحساس , من هؤلاء الذى لا تملك وانت تسمعهم الا ان تقول ..الله عليك
على انشاء الله هيغنى يوم الجمعة 16 نفمبر الجاى فى ساقية الصاوى مع فرقة أيامنا الحلوة , الفرقة اللى بتضم نجوم كتير منهم سلمى صباحى وشريف اسماعيل ونادرنور ومحمد خلف

بالتوفيق يا علوة وجايلك انشاء الله
من الحاجات اللى كتبتها وغناها على
أغنية اللى انكسر يتطوح ..بصوت على
أغنية عرفتنى ..بصوت سلمى
أغنية بره الدايرة ...بصوت على
ومن الأغانى اللى بحبها جدا بصوته
أغنية حنين

10 comments:

rosealia29 said...

علي بجد إحساس فنان لن يتكرر بمثل هذا التكثيف و التجسيد في ذات شخص واحد .. و زي ما ذكرت الأصوات الحلوة كتير .. لكن بمثل هذا الكم من فيض الإحساس .. متهيألي صعب ..

و يااسلاام لو إحساس علي بصوته بكلمات أحمد شلبي و مزاجه .. خلطة سحرية سرية من النوع الفريد .. إذا كان عم سليم و لا اللي انكسر .. و لا حتى برة الدايرة ..


بالتوفيق يا علي في حفلتك ..

كل التحية و التقدير ليك يااحمد ..

علي الالفي said...

و الله مش عارف ارد اقول ايه
ربنا يخلينا كدة على طول يا شريك الاحلام يا ابو حميش

rosealia29 said...

يعني بعد البوئين الحلوين إللي قولتهم في حقك إنت و أحمد .. تدخل تقول .. - ربنا يخليما كده على طول يا أبو حميش ؟؟؟_ و أختك دي إللي ردت أول واحدة مالهاش حاااجة ؟؟؟


ماشي يا عم .. كله عند الله ..

Anonymous said...

ههههههههههههههه
أنا داخله احط كومينت واعمل اعلان عندك لحفلة على لقيتك عامل بوست رائع بحاله
أشوفك على خير يا معلم بقى


:)

Lemonada said...

انت عند احساس جميل جدا
ومش بهلس ولا بقول اي كلام
بجد هم الي ليهم الشرف انهم اصدقاء ليك
انت انسان من الطراز الاول
عندك احساس
فكر
ثقافة
تمعن في الامور
تحليل ولا اجمل
مع كل هذا بساطة وتواضع
بس حنقول اي
يا بختك يا علي ويا سلمى
مع احترامي ومعزتي لسلمى
ولصوت علي سلمى اكيد
بس انت كمان حاجة انسانية مابقاش منها كثير
تحياتي

hesterua said...

روزا

منورة يا فندم , ثانكيووو

على

ع البركة يا لول بجد
تستاهل اكتر من كده يا فنان


روزا تانى

منورة

(:

وينكى

على خير يا نجمة انشاء الله



لمونادا

بجد بجد انا اللى مش عارف أقولك ايه
شكرا بجد , كنت اتمنى تنورى الحفلة فى القاهرة بس انا عارف انك لبنانية او اردنية تقريبا
بجد شكرا على كلامك والحمد لله بجد ان فى حد بيشوفنى كده ..ويا رب اكون كده فعلا



تحياتى

Lemonada said...

:(
شوفت مش حقدر احضر الحفلة
مش مشكلة لما انزل مصر نعمل حفلة مخصوص لليمو
:)
تحياتي ليكم كلكم وبالتوفيق

Anonymous said...

تحفه
روعه
قمة التألق
اجتمعوا عشان يوصفوا على امبارح
بجد كان يوم اكتر من رائع
واكتر ما اسعدنى بجد هو انى شفت كل البلوجرز الحلوين دول امبارح

jeen said...

انا سمعت الأغنية بصوت على الألفى

دار يا دار .. وديع الصافى .. تحدى كبير مش سهل

وكنت متوقعة اسمع حد بيغنى عادى

لكن لاقيت صوت من طبقة مختلفة عن طبقة صاحب الأغنية ومع ذلك بيغنيها بمنتهى الإستمتاع والفن والإحساس

مبروك على نجاح صديقك الفنان بجد فى الحفلة دى واتمنى اسمع اسمه بيتردد على انه مطرب عصرى مختلف جداااااا

تحياتى

hesterua said...

لموندا
انت تؤمر يا فندم
:)
منورة

وينكى
الغنوة من عندك يا فندم ولوانك بتخضينى اخرها

جين
منورانى
فعلا على احساس عالى جدا ما شاء الله
شكرا يا جين