أول شتا ....امبارح

أول شتا

والقلب عطشان من زمن

نزل المطر

عجن التراب ريحة شجن

الصيف هرب

سحابة بيضا مروحة وسط الغيوم

رجع الشتا بالذكريات

غسل الهموم

لملم حكاوى مفتفتة

لناس وحشها الكلفتة

فى بلاطى صوف

والمشى ع الكورنيش تحت المطر

صحى الحروف

خلانى

اكتب من جديد

وأغنى للطير اللى راجع من بعيد

يم الفنار

كان للشتا واحنا صغار

أغانى فينا بتتنقش

ودعوة يدعوها الكبار

ندعى قلوبنا ترتعش

نفرح نروح فوق السطوح

نملى كفوفنا بالمطر

ونقول يا رب

الكلمة تطلع من قلوبنا للسما

طفل انما

من صغرى عاشق للشتا

كان البداية والنهاية والمكان

كان اللى كان

واشتياقى واللى باقى

من زمان مر ومضى

كان أحلى عشق وفضفضة

للشوارع الفضا ..من غير بشر

والشجر

قالع هدومه

رجع الشتا بالمطر يعلن قدومه

بالنوارس والنوة

بريحة الأرض بعد ما تخلص الشتوة

بجد عجوز على الدكة بيتشمس

بصوت فيروز مع القهوة ندى يلمس

حاجات ماتت يفوقها

تعود كراريسى وورقها

مع الجلاد

وصوت الأبلة فى الحصة يقول يا ولاد

الخريف بعديه شتا

ووراها أقول

وأكبر وأطول

أنسى الحاجات...أنسى الفصول

لكنى لسه فى السهر

بحلم أكلم القمر

واكتب قصايدى ع الشجر

وتملى مع أول شتا

قلبى بيفرح بالمطر

أحمد

الصورة ...عدسة المصور وليد منتصر