Sunday, November 18, 2007

أول شتا ....امبارح

أول شتا
والقلب عطشان من زمن
نزل المطر
عجن التراب ريحة شجن
الصيف هرب
سحابة بيضا مروحة وسط الغيوم
رجع الشتا بالذكريات
غسل الهموم
لملم حكاوى مفتفتة
لناس وحشها الكلفتة
فى بلاطى صوف
والمشى ع الكورنيش تحت المطر
صحى الحروف
خلانى
اكتب من جديد
وأغنى للطير اللى راجع من بعيد
يم الفنار
كان للشتا واحنا صغار
أغانى فينا بتتنقش
ودعوة يدعوها الكبار
ندعى قلوبنا ترتعش
نفرح نروح فوق السطوح
نملى كفوفنا بالمطر
ونقول يا رب
الكلمة تطلع من قلوبنا للسما
طفل انما
من صغرى عاشق للشتا
كان البداية والنهاية والمكان
كان اللى كان
واشتياقى واللى باقى
من زمان مر ومضى
كان أحلى عشق وفضفضة
للشوارع الفضا ..من غير بشر
والشجر
قالع هدومه
رجع الشتا بالمطر يعلن قدومه
بالنوارس والنوة
بريحة الأرض بعد ما تخلص الشتوة
بجد عجوز على الدكة بيتشمس
بصوت فيروز مع القهوة ندى يلمس
حاجات ماتت يفوقها
تعود كراريسى وورقها
مع الجلاد
وصوت الأبلة فى الحصة يقول يا ولاد
الخريف بعديه شتا
ووراها أقول
وأكبر وأطول
أنسى الحاجات...أنسى الفصول
لكنى لسه فى السهر
بحلم أكلم القمر
واكتب قصايدى ع الشجر
وتملى مع أول شتا
قلبى بيفرح بالمطر
أحمد
الصورة ...عدسة المصور وليد منتصر

10 comments:

Unknown said...

الله عليك يا خال ورد عليك يابن الحلال
ايه الجمال ده يا شلبى تحفة والله
واحشنى يا عم احمد

Lemonada said...

يا بختكم
عندنا لسة مفيش مطر
بس المفروض انها النهاردة تمطر شوية
بس بجد كلام جميل وخصوصا
نزل المطر
عجن التراب ريحة شجن
دانا من عشاق ريحة المطر لما ينزل على التراب
بحس بنفسي كدة عايشة
على فكرة انا نازلة مصر :)

M.Shalan said...

عارف
احيانا بتحس بالحزن
جايلك من بعيد
بتحس انك
بتموت
بتحس ان الدنيا
صارت ضلام
حوليك

و فجأف
و سط الموت
و سط الحزن و الضيق
تنزل سماحة من السما
رحمة
تبدد حزننا
تصرع هموم الكون
تقتل حزننا

تخلق في قلبي
روح جديدة
مولود بريء
هيعيش حياته من جديد

وسط الشتا
كانت بدايتي
يوم ماجيت
كانت الدنيا شتا

أبوشنب said...

تسلم الايادي

Anonymous said...

أنا لمست
وحسيت
وسمعت
وشفت
وشميت
واترسمت على شفايفى ابتسامه حنين للجو ده
قد ايه عيشتنى فى لوحة شتوية رائعه حبيتها ومش عايزه اسيبها خالص
هو ده الشتا بجد

hesterua said...

روتينى
واحشنى يا خال
اخبارك ايه يا دكترة

لموندا
يا فندم تنور مصر والله

محمد شعلان
الله ينور
منور
:)


ابو شنب
بعض ما عندكم يا خال

وينكى
قشطة
منورة

hesterua said...
This comment has been removed by the author.
hesterua said...
This comment has been removed by the author.
منى said...

جميل؟مش كفايه
عجبتنى؟برضه مش كفايه
باختصار الشتا بعتنى اشكرك
شكرا

صهيل النفس said...

والقلب عطشان من زمن
نزل المطر
عجن التراب ريحة شجن