Monday, January 14, 2008

لأنى وعدتك.....أسف

لأنى وعدتك
أنى هكون..أول تيلفون
هيجيلك وانتى بتطفى شمعة جديدة
فى سكة عمرك
ورغم نهاية الخط الواصل بينى وبينك
سبت ايديا
الحاضنة موبايلى الطارح اسمك
تلضم كل حروفى المتسرسبة
فى رسالة أخيرة
كل سنة وانتى طيبة
..................................
وأسف
عشان خطيت بأحلامى لأحلامك
بدون اذنك
صحيت من نومى على حسك
بيجرح فيا ويقطع
وخفت أرجع تقولى جبان
وأنا جوايا الف حصان
بيتسابقوا عشان ترضى
ومش راضية
لكن فاضية
تقوللى عليا بتلكك
وأنا الساكت ..بقيت ساكت
لكن ماتت حاجات فيا كانت ليكى بتتكون فى حلم وليد
وكنت خلاص هقولهالك.. وأمد الأيد
لقيتك حد تانى بعيد مبعرفهوش
وأنا اللى يبعنى مشتريهوش
لكنى بقيت على حلمى وقلت نعود
رسمت طريق رسمت وعود
وقلت أحلم ومش هخسر
صحيت من حلمى متأخر
وقلت نسيت اكيد ناسية
لقيتك قاسية مش ناسية
فضلت وراكى ميأستش
وعشت الدور كأنى حبيب
لقيتك حد تانى غريب كأنه ما كان
فاكرة زمان ؟
طلبتى أقول فيكى ولو بيت شعر
ادينى اهو عشان خاطرك
كتبت قصيدة تقريها
وانا بشطب حروف اسمك من الأوراق وبمحيها
وجوه عيونى.. فى دمعة حنين وفراق
حرام تنزل...لكن نزلت
بخبيها
أحمد

6 comments:

jeen said...

حرام تنزل .. لكن نزلت .. بخبيها

فكرتنى اللوعة بلوعة عبد الحليم حافظ فى فيلم الوسادة الخالية

نفس المرارة .. ومحاولات الصبر والنسيان

مش بشبه قصيدتك بفيلم .. لكن بحاول اوصف احساس مستعصى كتيير على الوصف

حبة حاجات (ايمان) said...

انا اول مره اجى وازور المدونه دى
لكن الواضح انها ان شاء الله مش اخر مره

كلام حلو اوى
هى وكلام صباحين وحته

ربنا يوفقك

Lemonada said...

انا قبل ما شوفت البوست دة رديت على الكومنت بتاعك عندي
وكنت قايل حاجة عن الاحلام اتمنى انك تمر عندي وتشوف الرد
عشان حيكون هو نفس الي حكتبو عندك بعد ما شوفت انت كاتب اي
بس بصراحة
عمرك ما تتأسف لحد الا لو كنت غلطان وغلطان بجد
ولو كنت غلطان اتأسف بسرعة او ماتتأسفش بعد فوات الاوان عشان كدة هي حتبقى قاسية
تحياتي

hesterua said...

جين
ازيك
:)
شكرا على كلامك الحلو


ايمان
منورة
شكرا على اهتمامك

لمونادا
شكرا على كلامك
شفت ردك الجميل وانشاء الله تبقى سنة حلوة عليكى
يمكن اكون غلطان بس مع نفسى
:)

mariem_mero said...

السلام عليكم ورحمة الله وبركاته

حلوة اوي والكلمات تتصدق لاني حسيتها جدا معقول في حد كده ساعات بحس ان شدة الحب لما الدموع تبكي من شدة الآه اللي بتوجعنا ونفسنا نصرخ ونقولها لكن ألمنا رافض يسمعنا فعشان كده بتنزل دموعنا
بجد جميلة اوي يااحمد تسلم ايديك

arab girlscool said...

This is such a nice addition thanks!!!
عرب كول
شات صوتي
شات مغربي
إنحراف كام
شات عرب كول
صوتي
دردشه صوتيه
سعودي كول