Sunday, February 19, 2006

الساعة ستة

الساعة ستة
والجو عيد
ولازمنى حاجة
أى حاجة
ومبقاش وحيد
وأنا ماشى عادى
والقلب فاضى
بنوتة قمر
والسن خطر
فتحت لى نفسى
لمشوار جديد
وفضلت أقول
شكلها بيقول
وعايزة تقول
وقلبى يقول
اجمد يا واد
خليك حديد
فى قلبى رهبة
وفى عنيها رغبة
واللحظة عمر
والشوق يذيد
ضحكت شوية
هدت شوية
ما البنت بنت
والتقل غية
خطوة ورا
وخطوة قدام
محتار انا
مين هيبدأ
ويرمى السلام
لما فجأة
بدأ الكلام
كانت مفجأة
لما قالت
والنبى يا عمو الساعة كام...؟
وأنا قلت ستة
عمو أحمد

12 comments:

Alexandra said...

حلوة قوي. قلبي معاك

احمد فوزى said...

حلوة
بالحق انت ليك عندى 40 جنيه

Tamer Atef said...

بنوتة قمر
والسن خطر
فتحت لى نفسى
لمشوار جديد
وفضلت أقول
شكلها بيقول
وعايزة تقول
وقلبى يقول
اجمد يا واد
خليك حديد
فى قلبى رهبة
وفى عنيها رغبة..^_^ يا وااد عايز اشوفك :) بقا في عنيها هيا الرغبة و في قلبك انت الرهبة!! أيو يا جدعان عالزمن :P
سلام

Gazzer said...

ya 3einy yabny:( m3lesh

adhm said...

انت ممكن تكون ضيعت عمرك ماشى وراها من غير ما تاخد بالك ان السنين بتجرى وانت لسة ما اخدتش خطوة
تلا قيش ماشى وراها من ايام ما كنت احمد بس من غير عمو
نصيحتى خد الاربعين جنية بسرعة

islam yousef said...

ازيك يا عمو
ممكن تعرفنى على الأموره اللى انت كنت ماشى وراها


ازيك ياحمد انا جيت بس ماشى يوم السبت25

radwa osama said...

لقطة حلوة قوى يا احمد ..اكتشفت انى بقالى كتير ما دخلتش عندك ..بجد مفتقدة طزاجة بلوجك

hesterua said...

اسكندرية
شكرا وعدت خلاص
فوزى
عيب يا غالى
ووقت كتابة هذه السطور هما وصلوا خلاص
تامر
جيتلك المقر يا فنان
جاسر
يا فاهمنى
ادهم
اخدت بالنصيحة
اسلام
حمد لله ع السلالالالالالالالالالالامة يا بلد
حاسس بلخبطتك الأولانية دى
هتعدى يا جميل...وهتكتسب تجربة حلوة
متنساش يومياتك التفصيلية
رضوى
منورانى على طول
جميلة جدا كلمة طزاجة
يمكن عشان بتبقى انتاج اليوم بجد

rubyeldaly said...

حلوة اوىىىىىىىىىىى

aggressive said...

excellent. intensed words for big meanings

yara said...

جامدة جدا عجبتنى موت ... خيرها فى غيرها يا عمو

roza said...

:):):)