Saturday, September 30, 2006

عدد 2 تاج

بناء على طلب المدون الجميل والعزيز محمد هشام عبية
http://nefsy.blogspot.com/
عدد 2 تاج زى الفل ومعلش ع التأخير يا عم محمد
وعلى طربقة انور وجدى ...الأول

تاج المدونات

هل انت مستكيف من مدونتك شكلا وموضوعا ؟

هو شكلا مكيف قوى بس ناقصنى اعرف اززاى احط الأسم يوصل للنك على طول وهعرفها قريب انشاء الله , لكن من ناحية الشكل مقدرش احكم وان كنت طبعا اتمنى انها تكون عروسة

هل تعلم أسرتك الصغيرة بأمر مدونتك؟

عندهم فكرة انى بقعد اكتب حاجات من اللى كنت غاوى اكتبها وارميها فى الدرج , واخدوا بالهم انى بقى ليا عن طريق المكان اللى بكتب فيه اصحاب وناس وحركات واخويا الصغير اللى هو مشروع شاعر غنائى عمل مدونة وقفلها عشان ميسرقوش حاجاته وكده


هل بتتكسف تقول لاصدقائك عن مدونتك؟

اتكسف من شو بس , هو اى نعم فى ناس بتقول دى ناس عقلها مسليها بس برضه يسلينى احسن ما يتعبنى

هل شقلبت المدونات حياتك للاحسن ؟

الى حد كبير , وكانت سبب انى اعرف مجموعة من الناس غيروا شوية فى سكة حياتى , واهم حاجة انى رجعت اكتب تانى وسواء اللى بكتبه حلو او وحش عجب او لأ الا انه فى الأخر حاجة بتحسسنى بسعادة كبيرة

هل تكتفى بفتح صفحات من يعقبون بردود فى مدونتك ؟ ولا مقضيها وسارح سواح في مدونات خلق الله؟

اول معرفتى عالم المدونات كان العدد قليل وكنت شغوف قوى بيه و كنت انا فاضى ..دلوقتى يا دوب على قد الناس اللى اعرفها واللى
بتزورنى

ماذا يعنى لك عداد المتطفلين.. هل تهتم بوضعه فى مدونتك ؟


اول مرة اسمع عنه بس طبعا اكيد الواحد هيكون مبسوط لما الناس كلها تزوره

هل حاولت تخيل شكل اصدقائك المدونين؟

لأ خالص بس اللى كنت بفكر فيه ان فى ناس شبه كتابتها قوى وناس ملهاش علاقة بما تكتبه

هل تشعر ان مجتمع التدوين مجتمع منفصل عن العالم المحيط بك ام متفاعل مع احداثه؟

مجتمع التدوين فى اوله كان معلق على احداث المجتمع , ولكن اولا واخيرا المدونات بقت زى المجتمع , فيها اللى بيكتب عن نفسه واللى بيدشن لنموزج مقتنع بيه و اللى بيعلق على اللى بيحصل واللى عاملها منتدى يظبط فيه بنات وتظبط فيه ولاد واللى بتدور على عريس واللى بينشر انتاجه القصصى والشعرى واللى بيمارس حرية ما من الأفكار اللى ميقدرش يقولها بصوت عالى

هل ترى فائدة حقيقة للتدوين؟
طبعا ..وبشكل شخصى استفدت

هل يزعجك وجود نقد بمدونتك؟ ام تشعر انه ظاهرة صحية؟
لأ طبعا لأنى عارف قصة جحا والحمار وان مش ممكن حد يرضى جميع الأطراف

هل تخاف من بعض المدونات السياسية وتتحاشاها؟ هل صدمك اعتقال بعض المدونين؟
ابدا ..واعتقال المدونين موضوع متوقعه من زمان عامة انا حاطط اسمى وصورتى واسامى اصحابى فى بورسعيد والعنوان ميتوهش

هل فكرت فى مصير مدونتك فى حال وفاتك؟
فى ناس كتير تعرفى شخصيا عن طريق المدونات وفى ناس قريبين منى اللى هما بلدياتى خوليو واحمد فوزى هما هيصرفوا , يعملوا بوست عنى وتفضل المدونة ذكرى لحد ما كان بيكتب نفسه وعن بلد كان بيحبها

آخر سؤال: تحب تسمع ايه؟
و الله الأيام دى بدور على حاجة لعمر فتحى واللى عنده يبعت و ميتكسفش
خمس مدونين يقومون بهذه العملية الجراحية بعدي
الدعوة عامة

الثانى
تاج الجوانيات

هل أنت عقلاني اكثر أم عاطفي؟
كل البنات اللى عرفونى بيقولوا انى عقلانى قوى وده طبعا هروب من تعبير تانى , لكن عن نفسى ماشى انا عقلانى لكن كتير قوى واكتر
من كتير من النحانيح بتكون دموعى قريبة فى حالات متستحقش

صف شخصيتك فى خمس كلمات

انا كما ترانى ويرانى الناس

إذا كان لكل إنسان شبيه من الحيوانات..أي حيوان يشبهك؟
عمو عمو ....ينفع طيور ؟

ماهو لونك المفضل؟
الأزرق بدرجاته

هل أنت اجتماعي أكثر أم منعزل؟
اجتماعى ولكن بحاول استغنى عن شوية خجل مش عاوزين يسيبونى

ماذا يشكل أصدقائك بالنسبة لك؟
رفقة عمر

هل أنت مرتبط بعائلتك؟
جدا ..برغم المشاكل اللى بتمر وتباعد الأفكار الا اننا كيان واحد جدا

هل أنت عصبي أكثر أم هادئ ؟
هادئ لكن بحالات ..لما بتطلب ضحك مبفصلش

هل تفضل فصل الشتاء ام الصيف؟
الشتاء عشق قديم ..وله نكهة بحسها وبتنادينى ..وشتاء بورسعيد ميتوصفش

متى آخر مره بكيت فيها؟ولماذا؟
من 4 تيام وكان موقف مسنى قوى

من يلعب هذه اللعبة مكاني؟
اللى نفسه فيها يتفضل ورمضان كريم يحب اللمة

6 comments:

islam said...

انا احب العبها
وعامة كلام جميل, ومسلى, واقدر اقول معبر
اسلام

Doaa Samir said...

أجمل حاجة إنك كتبت كده على طول.. من غير ما تضطر للتظاهر أو الاستظراف.. ومن غير ما تحسسني إنك قاعد وراء مايك ومتنشي في برنامج تليفزيوني ع القناة الثالثة
حلوة يا أبو حميد... بسيطة
((:

خوليو said...

بحب اشوف اسمى
حتى ولو كان افتراضى
!

خوليو said...

بالحق
ياريت تقول لوليد منتصر
يحترم ذاته بقى وينزل صور جديدة فى البلوج بتاعه
شجعه
..
يلا باى

hesterua said...

اسلام
اتفضل يا جميل ومنورنى
دعاء
فينك ؟
شكرا على كلامك ده مظبطانى انتى
خوليو
مش فاهم سيادتك

وينكى said...

حلوه اللعبه دى
ممكن ابقى ألعبها مع نفسى على مدونتى
بس لما حالتى النفساويه تتحسن شويه