Saturday, March 17, 2007

وبغنى




بين فرح وحزن الدنيا طريق

بيسعنا ساعات وساعات بيضيق

وعشان ما نكمل سكتنا

الفرح صديق والحزن صديق



تعالى

نودع زمان

نسيب المكان

نسافر لبكره

على نغمة كمان


تعالى




نحط الأنين

على حزن السنين

ونرميهم ورانا

ونعيش فرحانين




وتحضننى بعنيك

بلمسة ايديك

تدوبنى فى ملامحك

تفرح روحى بيك


تعالى

احضننى بعنيك

بلمسة ايديك

دوبنى فى ملامحك

فرح روحى بيك



بين فرح وحزن الدنيا طريق

بيسعنا ساعات وساعات بيضيق

وعشان ما نكمل سكتنا

الفرح صديق والحزن صديق



هتعدى السنين

وتجينا السنين

وتبص فى عنييا

يناديك الحنين


هيقولك تعالى


ومد الأيدين

وأمد الأيدين

نتلاقى فى لحظة

ونطير بجناحين


ونوصل للقمر

لأبعد م القمر

لكل نجمة حلوة

شاركتنا السهر


وتحضننى بعنيك

بلمسة ايديك

تدوبنى فى ملامحك

تفرح روحى بيك


تعالى

احضننى بعنيك

بلمسة ايديك

دوبنى فى ملامحك

فرح روحى بيك



أحمد
وقريبا بصوت على

اللوحة من اعمال ويليم ويتكر

28 comments:

mariam said...

احلى غنا
الفرح صديق والحزن صديق
جميل انك تكتشف الحقيقة دى بس احلى حاجة انك متفائل..وجميل ورقيق وبورسعيدى

شيماء الجيزى said...

ديما بنتغير بس بنرجع لحالنا
تفائل وحياة وحزن وشجن فرح وامل
كل ده بنقوله وبنحكيه

حلوة يا احمد
الا انت فينك
مش باين يعنى
:)

smraa alnil said...

مش عارفة اقولك ايه بجد
القصيدة اكتر من روعه
ولازم الرد عليها مش يكون عادي
انا تفاعلت مع كلامك وعيشت كل كلمة قلتها
ولقتني بكتب الكلام دة ردا علي كلامك
طبعا كلامي يترمي في الزباله جنب كلامك
بس بجد حروفك استفزت مشاعري

اتيتك مهرولة اتيت من زمن يتجرع الحنين
ودرب الحياة زاد عندا لي لا فرق بيني ولا بين جنين
صادقت فرحك وصادقت حزنك ومحيت من قاموسك الانين

سأتي
مودعا زماني كما تريد وتركت ورائي امس الدفين
وسافرت في حلم ليلة علي نغماتك وداعبت عزفك الرنين

سأتي

تاركة عهودي وسنيني وايامي في كفيك الامين

تحملك اجفاني وتصبح مقلتي ولنلون عالمنا الحزين
فتسير في يدي كفارس ونختلط وماعدنا نعرف من منا السجين
قد ارتسمت في ملامحك قد ذوبتني داخلك السنين
سأسعدك بقلبي الصغير فما عاد ملكي فاصبر وبشر الصابرين

تمر ايامنا وترمينا احلامنا علي شواطئ الحياة يسارا ويمين
وسنصل لغايتنا وتملك عيوني واصبح لك من الصادقين

rosealia29 said...

نحط الأنين


على حزن السنين


الفرح صديق والحزن صديق



الحروف مستمتعة و هي بتتقال على لسانك ..


حسيتها أوي يا أحمد ..

وشوشني said...

حلوة اوي واللوحة المطوطة جميله جدا واحسن حاجه انك ملتزم في الشكل وكده يعني وشكرا لمرورك عليا

BOS BOS said...

بجد كلام جميل جدا ومعبرة بطريقة كبيرة قوى
أنا أول مرة أزور مدونتك بس عجبتنى قوى

Diyaa' said...

موهوب يا أبو حميد وكفاية ان في حاجة بحسها لما اقرا غنوتك
مش مهم اي حاجة تاني غير الاحساس والأمل
في سؤال بس
يعني ايه اسم مدونتك ؟:( hesterua ؟
دورت عليها بكل اللغات واعذر جهلي :(
بحيي احساسك اللي وصل وبحيي المعني اللي موجود والسلام ختام

أحمد سلامة said...

أولا تحياتي ليك على زوقك في الغنيه الجميله لفيروز واختيارك زكي لانه صعب جدا تلاقى حد مابيحبش فيروز
ثانيا :
ايه بقى يا سيدى الجمال والحلاوه دي
كانت فين قبل كده يا راجل ؟؟
معقول دي أول مره أزورك ؟؟
بجد أغنيتك دي جميله قوي قوي
وشوقتني اسمعها بصوت على
برافو برافو
---------
نودع زمــــان
نسيب المكـــان
نسافر لبــكره
على نغمة كمان
-----------
ممتااازه
الله عليك
وكمان على الصوره اللي ما استخسرتش تقولنا على اسم الفنان بتاعها
الله عليك كمان مره

Memo said...

في ندوه في نقابه الصحفين كل اربع
من الساعه 7 للساعه 12 باليل
طبعا لو تصادف وجودك في القاهره ممكن تشرف الندوه
كمان كتير من الجرائد بتنشر الاشعار دي في صفحاتها باسمك و في دور نشر بتنزل الاشعار في كتب مجمعه تبع مؤسسه الاهرام لشعراء شباب

اعتقد انك اكيد عارف الكلام ده بس انا حبيت اكد

الاغنيه اعلى من اي تعليق
و ابقا افتكرنا لاما توصل

عمرو غريب said...

المدونه رائعة رائعة وارجو منك كتابه المذيدمن الموضوعات علي فكرة انا بحب اهل بورسعيد ولي اهلي سكنين عند تمثال الصياد وانا علي فكرة في كلية تجارة السويس واتمني ان تراسلني من خلال التعليقات في مدونتي وانا هفعل ذلك في مدونتك الرائعة وفي النهاية سلام يا ابو العربىىىىىىىىىى

hesterua said...

مريم
منورانى يا مريم
))
شكرا يا جميل
وفعلا اخوكى بورسعيدى قوى
))

شيماء

موجود يا قمر
وبمسى
))
وفعلا دايما بنتغير ويا رب نقدر


سمراء
منورنى يا فندم
شكرا على كل الكلام الجميل ده بجد
تسلم ايدك يا قمر

روزا
ربنا ما يحرمنى منك يا عم
شكرا بجد
اخربوست ليكى تحفة قوى على فكرة

وشوشونى
العفو يا فندم
اسمك جميل كمان يا قمر

bos bos
ايه النور ده
شكرا بجد يا جميل

diyaa
منورنى يا جميل
شكرا على كلامك الجميل زيك
هيستريا ده كان اسم عملت بيه الأميل بتاعى من سنين
كان على فيلم احمد ذكى بتاع هيستريا
كنت بحبه
بس كتبتها غلط ومصلحتهاش لحد دلوقتى
))
منورنى

احمد سلامة
منورنى يا قمر
انت اجمل صدقنى وكلامك وافكارك عجبتنى
شكرا بجد


ميمو

منورانى يا فندم
قولى تانى كده

اصل دى تانى مرة تقولى ده
وعاشر مرة اسمع الموضوع ده

دا انا وصلت العاصمة ونا معرفش بقه

اتمنى تبتعيلى ميل بس تشرحى ليا الموضوع ده لو مش هتقل عليكى
hesterua@hotmail.com

عمرو باشا
منور يا فندم
وتنور بورسعيد كمان
شكرا يا جميل
واكيد نتواصل يا قمر
يا ليلو ان
حبيبى وافا
حبيبى وافا
ياليلو ان
))

Diyaa' said...

بنورك يا عسل وكلامي ده مجرد تعبير بسيط عن رأيي ميستاهلش شكر يعني
المهم صلحها بقي بدل ما تحير مصر كلها معاك

sad_doraa said...

طيب احمد وقبلنا كلامو وقلنا طول عمرو تحفة
لكن كمان على هيغنيها
لا الموضوع كبر
وانا لازم اشوفلو حل
مع تحيات
مجنونة على الالفي

هيثم ابوعقرب said...

بصراحه يا احمد مش عجباني
لان معانيها اتقال كتير قبل كده

بس تقدر تقول
انك شاطر ف اختار السنيو بتاعها
لانه بجد اجمل حته فيها
تحياتي

hesterua said...

DIYA
منور يا عم
اعتذر عن الأصلاح معلش
اعذرنى
))

SAD DORRA

طب استنيها لما تخلص بقه
شكرا يا فندم

هيثم ابوعقرب
ازيك يا شاعر

تصدق بايه
انا معاك جدا يا عمى
بس دى تجربة ليها حكاية كده
يعنى مود معين شفت ان على الألفى يقدر يلحنه ويغنيه كويس
تجربة شايفها فى اللحن والمزيكا بس ونفسى تطلع زى ما انا عاوز

بس خد بالك مش مستهلكة قوى يعنى
))

منورنى يا جميل

أنـــا حـــــــــرة said...

كنت لسه هقولك دى لازم تتغنى
يارب نسمعها قريب بقى

احمد كالعادة
اسلوبك ممتع و انسيابى جدا

فى انتظار عمل منشور ليك باذن الله

الوردة السوداء said...

حلوة

lockash said...

تعالا نحب و بس. نسيب ادينا لبعض و بس. نشوف الدنيا زي ماحنا عايزي و نشوفها صح بجد و بس. نسيب كلامنا و حاجاتنا و حمالنا لبعض و بس.
ميرسي علي الزياره و ياريت تتكرر تاني..

dandana said...

جميلة....
ويارب تبقى اغنية اجمل...مع الصوت واللحن....

اللوحة جميلة....انا من ساعة ما دخلت عالم التدوين وانا بقيت مهتمة بموضوع اللوحات دا بسبب اللوحات العبقرية اللى بشوفها على المدونات...
بجد اللوحة دا هادياااااااااااااا

كراكيب نـهـى مـحمود said...

غرقانه نغم وشجن جميلله اوي

lockash said...

انت كمان تعرف ابن خالي "جاسوور" داحنا اخر جمال اهوو..

علي الألفي said...

اتمنى انى يوم ما انزلها متلحنة يفضل احساسككو بيها كدة
و انى ما ابوظش الجمال اللي احمد عمله فيهاااااااااااا

محض روح said...
This comment has been removed by the author.
محض روح said...

رقيقه
موت يا أحمد زى العاده
صعب حد يعلق عليها
أرق تحياتى يافندم

Sampateek said...

سعيدة اني عرفت مدونتك
الى الامام
تحياتي

أحمد عيسي said...

حاسس اني شفت الكلام ده قبل كدة
تحياتي يابطل

hesterua said...

أنا حرة
شكرا يا جميل
وفعلا هى مكتوبة لصديقى المطرب الجميل على الألفى
شكرا بجد
ومنورانى

الوردة السودا
انتى احلى
منورانى


lockash
منورنى يا جميل
شكرا يا عمى
جاسر زميل قديم فى مدينة التدوين
))
سلم عليه كتير


دندنة

شكرا يا جميل
منورنى
انشاء الله تعجبك لما تسمعها


كراكيب نهى
شكرا يا صحفية يا جميلة
منورانى دايما

على الألفى

مستنى يا هندسة

محض روح
شكرا بجد ومنورنى دايما يا جميل

سمباتيك
شكرا يا فندم
))

احمد عيسى
طب فكرنى كده
منورنى يا بطل

mohammed said...

:) حبيت أحط نفس ردي ده اللي حطيته في مدونة " علي الألفي "

********************

بين فرح وحزن الدنيا طريق
بيسعنا ساعات وساعات بيضيق
وعشان ما نكمل سكتنا
الفرح صديق والحزن صديق
تعالى
نودع زمان
نسيب المكان
نسافر لبكره
على نغمة كمان

:) الله عليك .. ذكرتني بداية الأغنية بكلمات شاعرنا الجميل " صلاح جاهين " عندما كان يذكر كيف ضاقت علينا الأماكن ، التي كنا نقطن بها ، بعدما كبرنا ، هناك فقط بعد المقاطع ، مثل

نحط الأنين
على حزن السنين
ونرميهم ورانا
ونعيش فرحانين

:) شعرت أن " فرحانين " هنا جاءت فقط لخدمة الوزن لا أكثر ، فكان من الممكن القول " ونعيش " فقط لا غير ، كما أن " نحط الأنين على حزن السنين " لا أعرف ، لكني لم أستسغها مُطلقاً ..

:) على كل حال كلمات الأغنية أعجبتني جداً ، فتحية للشاعر ، وبالتالي تحية لك أنت أيضاً مُقدماً ، لأنني أتمنى سماعك تغني كلمات الأغنية

تحياتي
محمد عادل \ أوسكار
http://oscarization.wordpress.com/