.jpg)
كنت صغير
وكان فى شارعنا موجود بيت
بيخافه منه
ويبعده عنه
وبعد المغرب يفضلوا يحكوا عليه حواديت
كانوا بيقولوا فيه عفاريت
جوه البيت كان موجود واحد
دايما قاعد
واسمه سليم
وانا من صغرى كنت لئيم
كنت أعدى جنب البيت
أحدف طوبة وأقول يا سليييييم
وأطلع أجرى
يطلع يجرى
أجرى ويجرى
وعمره ما كان يقدر يلحقنى
عدت بيا سنين وسنين
تاخدنى الدنيا شمال ويمين
ولسه فى بالى عم سليم
ولسه حاجات لزمان تندهنى
برجع اعدى جنب البيت
وأحس فى قلبى حاجات تتحرك
القى عيونى بفرحة بتضحك
والقى لسانى لوحده بينده
بس فى سرى
يقول يا سليم
أحمد
الصورة من عدسة العبد لله
15 comments:
يا عم سلييييييييييييم
حاسب فى طوبه فى البيت
حلوة اوى بجد يا احمد
ودى حاجة مش جديدة عليك
انك تكتب بأحساس حلو وجميل زيك
الى الامام بجد يا احمد
انت حاجة جامدة اوى
وربنا معاك
قول يارب
بس اوعه مسكنى
ماشى
بص وراك
وقولى هتشوف ايه ؟؟
عم باسم
منور يا جميل
وشكرا على كلامك بجد
يا رب يا عم باسم
الله ..
بجد الله عليك ..
:) عرفت مدونتك بالصدفة من مدونة " علي الألفي " ، وكنت ناوي أدخل أعلق في قصصك اللي فاتت ، بما إني قاص ، بس بجد لما شفت النص ده بجد مقدرتش أقاوم
:) فكرتني بنص ل " حمدي خلف " قريته في مجلة " كَتَبَ " لو كنت تعرفها ، دي من إنتاج مسرح الروابط ..
:) على العموم أنا هرجع أكيد للتعليق على القصص في مدونتك ، واللي عجبني جداً فيها - في مدونتك - التشكيل الجمالي ، واهتمامك بوضع صورة مُعبرة بالنسبالك لكل بوست
:)وصباحك سكر على رأي كاظم الساهر ..
تحياتي
محمد عادل \ أوسكار
http://oscarization.wordpress.com/
تعالى
نودع زمان
نسيب المكان
نسافر لبكره
على نغمة كمان
-------------------
هو كده
زى الخبطة
تك.....حصل
هوبة.....راح
قدر
------------------
القى عيونى بفرحة بتضحك
والقى لسانى لوحده بينده
بس فى سرى
يقول يا سليم
-------------------
شعرك بجد مش لاقي كلام اقوله عليه...رائع
بحس دايما ان الذكريات صعب ان الواحد يعلق عليها
ممكن الواحد يقول لنفسه
فاكر .......ده انت كنت شقى وانت صغير.
ومش بيستنى تعليق حد لانه أكيد مش هيرجع صغير
تعرف انا اول ما شوفت الصورة قولت جاب صورة لايقة اوي على الكلام ازاي
و بعدين طلعت من عدسة العبد لله
لا يسعني غير اني ارفع القبعه ليك ولبيت عم سليم
تحفة ورائع
يخرب بيت كدة .. إنت إيه يابنى .. جسمى قشعر و انا بقرأ .. انت يابنى بنى أدم و للا بنى إيه بالظبط .. إنت عقدتنى.
انت عارف يا صاحبي
اجمد من اي تعليق
هو ايه عم سليم
مسك ايدك ... ولا كسر الاقلم .... ولا قطع الكراسة ؟؟؟
فينك يا عم ايه كفاية غيبه بقا
بس تعالى بحاجة جامدة
سلام يا فنان
حلوةة موت
مش عارفه كل اما اجي هنا اللاقيني تنحت وبلمت
الكلام والاحساس يعني ..
تسلم ايدك
انت رائع يا واد
انا عايزة اقولك حاجة..انت ساعتنى من غير ما تحس ..انا ىقريت قصيدتك الاكتر من رائعة اللى انكسر يتطوح ومقدرش اقولك اثرت فيا ازاى ولقيت فيها حل لذكريات كانت بتؤرقنى وعايزة اتخلص منها ومن ورقها وبسبب كلامك قررت انى اطوحها واطوح ورقها للبحر عدل
شكرا يا احمد
محمد
شكرا يا باشا على كلامك الجميل
انت تعلق براحتك
))
منورنى
ارتعاشات
شكرا بجد
ومنورنى
بياترتس
الذكريات الحلوة بنحب نفتكرها دايما فعلا
منورنى
توتة توتة
شكراومنورنى يا جميل
سمراء
منورنى يا عم وشكرا بجد
ساهر
والله ما كنت اقصد يا عمى
))
على
انت الأجمد يا لول يا جامد
أجدع واحد
انت تأمر يا بسوم
وانت واحشنى برضه
بجابيجو
انتى احلى
منورانى
ميمو
تسلميلى انتى وكلامك الجميل
فين يا عم الميل اللى فيه تفاصيل الندوات
مريم
يا عم والله دى حاجة تفرحنى
انا برضه طوحت كل الحاجات اللى مزعلانى فى البحر
اتمنى تكونى سمعتى الغنوة بصوت على الألفى
http://www.4shared.com/file/10882795/4f9dda8f/_2_online.html
ياه ياا سليم كل واحد مننا جواه سليم بتاعه
بس المشكله ان
ان سليم بتاع الانت
عرفت تعبر عنه بصوره هايله
عقبال الباقي يا رب
عارف
انت يمكن تكون اول حد
في حاجه ايه هيا انا لسه معرفتش
؟؟
Post a Comment