Tuesday, October 02, 2007

سفر

ولأنى واخد ع الفراق
قلبى خلاص معدش فيه الا السفر
حتى ان قدر
يرجع ويسكن فى الصفوف
مبقاش يشوف
غير صورة باهتة متربة
فوق كل رف مسربة طعم الرحيل
ليه كل ليل مكتوب عليا انقسم
قد الخطاوى واترسم طول الطريق مشوار شجن
بزيادة توهة فى الزمن
ايه التمن علشان اخاصم دنيتى
بكره تميل الشمس ترسم سكتى
وبضحكتى
هلضم خيوط الحلم فى ديول الفراش
ولو يوم مجاش
هعرف طريقه بالحنين
صلاح جاهين
قال من سنين ساعات أقوم الصبح قلبى حزين
وانا من سنين يوماتى أقوم مليان ألم
فأمسك قلم
وأرسم بيوت
أرسم بنات
أرسم قلوع..فوق مراكب وأمشى بيها للرجوع
أرسم خيوط شمس اللقا
أحلام كتير متشوقة على كل شط
وصوت خطايا على الأسفلت ملانى فراق
مرصوف طريقى دايما اشتياق
ومفيش حبيبة فى الوداع بتقوللى عود
حتى خلود راحت كمان
حتى الكمان معدش صوته يهزنى
وبنحنى
اكتب على رمل الطريق كسبتنى
لكنى عمرى ما هنحنى
وهنتصر
وبنكسر
وأقول زمان جدى خسر وقال مفيش
وأقول مفيش ومشتكيش
وأحلم أعيش
لحد الدنيا ما تقفل أخر صفحة فى دفتر سفرى
وأسكن فيها ومتسعنيش
أحمد
الصورة ..للعبد لله...بعدسة الفنان وليد منتصر

16 comments:

rosealia29 said...

بكره تميل الشمس ترسم سكتى
وبضحكتى
هلضم خيوط الحلم فى ديول الفراش
ولو يوم مجاش
هعرف طريقه بالحنين

_______

جميلة .. و جمالها في صدق إحساسها .. وصلت و من غير استئذان و و فتحت و دقت على 100 باب من أول الكلام لاآخر الكلام ..


تسلم يابن عمي ..

Anonymous said...

عوده قويه جدا يا باشا
ماقدرتش اقاوم انى اقراها اكتر من مره
جو الشجن العام ممزوج بالامل الخفى
ماتبقاش تغيب كده تانى

Casper said...

بسم الله ما شاء الله

جميلة أوى يا أحمد

وشكلها كمان مدونة متميزة

ألف لفة وأرجعلك

Unknown said...

قصيدة حلوة قوي

مش قادرة اقولك قد ايه ؟؟!!

فيها كذا جزء جميل

بس قفلتها مش حساها

بس بدايتها والفكرة حلوين موووت

يسلموا ايديك ياعم احمد

Reem said...

بكره تميل الشمس ترسم سكتى
وبضحكتى
هلضم خيوط الحلم فى ديول الفراش
ولو يوم مجاش
هعرف طريقه بالحنين

بجد جميلة اوى الكلمات دى ربنا يوفقك

محمد فاروق said...

حاله عالية وحاسسها قوى

فوكيره said...

مممم...

دائما

ما ترسم كلماتك مع صور وليد منتصر

حاله صعبه النسيان بداخلنا

تحياتى يا احمد

sara... said...

جميله جدا
كل سنه وانت طيب

بيتنا القديم said...

العيد فرحة
يا سلام
واجمل فرحة
يا سلام
تجمع شمل بعيد وقريب
سعدنا بيها
سعدنا بيها
بيخليها
بيخليها
ذكري جميلة لبعد العيد
غنو معايا غنو
غنو
وقولوا ورايا قولوا
قولوا
كتر يا رب في اعيادنا
واطرح فيها البركة وزيد
جانا العيد اهو جانا العيد
جانا العيد اهو جانا العيد
.........................
من مأثورات صفاء ابو السعود
قبل الزواج من الشيخ صالح كامل
اللي خلي كل ايامها عييييييييييد
وعجبي
ـــــــــــــــــــــــــــــــــ
كل عام وانتم بخير

LAMIA MAHMOUD said...

تسلم
فعلا جامدة

Lemonada said...

يعني مش عارفة اقول اي
اولا ارحمنى من كلامك الجامد دة
يجي مليون مرة فتحت المدونة بتاعتك وقرءات البوست دة
مش كدة والله حرام
و وليد حيجنني عندو عين ما شاء الله الصورة جامدة جدا
عارف انا متاسفة نسيت اني اكتب في البوست بتاعي اني افتكرتك انت ووليد في سفرتي
افتكرت وليد عشان بحب التصوير جدا جدا
وفي السفر بصور الناس ومش بلاقي حد يصورني زي مانا عاوزة
وافتكرتك عشان كان نفسي اكون في بورسعيد مش في اسوان والاقصر
بس ان شاء الله الزيارة الي جاية حتكون بورسعيد
تحياتي

Haitham Abu Akrab said...

فوق كل رف مسربة طعم الرحيل


.
.
.

.
.
.
عارف ان دي لخصت كتير من وصف الموضوع
وتحسها كده طالعه متربه بجد
من كتر واقعيتها
تحياتي يا فنان
اخبارك ايه

jeen said...

دكتور زيفاجو

طال الغياب .. ياترى رحت فين؟؟

هو البوست دا كان بداية رحلة سفر جديدة؟؟

hesterua said...

روزا
شكرا يا قمر
منورانى دايما يا بنت عمى

وينكى
منورانى يا جميل
شكرا

كاسبر
منور وتنور يا قمر
شكرا

جيرو
تسلمى يا قمر
منورة يا صديقتى

ريم
انتى الأجمل يا قمر

الشاعر الجميل محمد فاروق
شهادة اعتز بيها يا محمد

فوكيرة
شكرا يا هندسة
منور


سارة
انتى اجمل
كل سنة وانتى طيبة


بيتنا القديم
كل سنة وانت طيب
منور

لمياء محمود
منورة تسلمى انتى


لموندا
منورة وبتنورى دايما وتنورى بورسعيد فى أى وقت
حمد لله ع السلامة


هيثم
منور يا قمر
شكرا يا جميل
انا تمام الحمد لله انت اللى فين


جين
الغريب انى خلصت البوست الجديد لقيتك تعليقك شكرا بجد
ومنورة
موجود اهه
:)

فبركة said...

جامد موووووووووووووووووووت

صهيل النفس said...

وبضحكتى
هلضم خيوط الحلم فى ديول الفراش
ولو يوم مجاش
هعرف طريقه بالحنين