Wednesday, November 28, 2007

صباحين وحتة

صباحين وحتة…متعاصة قشطة
واسرج نور
لأجدع صحبة بتلالى ولا البنور
ومهما أدور
ما يملى عيونى غير بلدى
وناس بلدى
قلوب ليها بحن وأميل
ولو أجه عليا الليل
عمره فى يوم هيجعزنى
ولا فى برده هبات سقعان
ما دام سرحان فى نور عينها
كأنى فى جوبية وأسيرها
وعنها ما أغيب
ولد حبيب
بقول فيها كلام يهبل
وبطبل مع البكاش
مفيش حارة مبعرفهاش
مفيش ضمة مبحضرهاش
وعندى المبى ع البسطة
ورق وقماش
يعود رمضان اجيب بطة
ومدبحهاش
وبنزل أعس بالفتاش
لجل ما انتش الحواديت
ولو حبيت ميلزمنيش
ولا البوهية ولا الورنيش
ولا الموضة ونصايبها
سايبها تيجى لنصيبها لحد البيت
ولد عفريت
وحلمى بسيط
لكنى غويط كما بحرى
كما النوة فى عز الليل
تشوف فيا اللى فات مواويل
وهفضل اميل واغنيلها فى كل زمان
صباحين وحتة يا حبايبنا فى كل مكان
أحمد
عدسة...وليد منتصر

13 comments:

Unknown said...

صباح الجمال والإبداع
بس حلوة متعاصة
مش ممكن شاعر
يقدر يجيبها ف قصيدة
غير واحد جريء

tota_fm said...

بجد كلامك حلو اوى انا عجبنى اوى اسرج نور لاجدع صحبه بتلالى ولا البنور ومهما ادور ما يملى عيونى غير بلدى وناس بلدى الكلام حلو اوى ،انا عجبتنى جدا اول شتا...امبارح بجد تحفه اوى انا عجبانى جداجداجداوالصور حلوه

ابو العربى said...

الف تحيه يا ابن بلدى

بجد رائعه قوى وفيها لغتنا الاصيله الى مبزعلش لما بسمع حد بيقلدها

تحياتى

something like love said...

حلو اوى والله كلامك يدخل القلب بسهولة

بحب اوى الكلام البسيط الناعم اللى بيحمل معانى كلماتك الجميلة دى

اسمحلى اهنيك عليها

hesterua said...

ابو امل
صباحك مندى
يا عم بعض ما عندكم
احنا بنجرب

توتا
منور يا فندم
شكرا بجد

ضد الظلم
ابن بلدى الجميل
منور يا خال


something like love

شكرا على الكلام الرقيق ده
منورنى

mahmoud said...

ياخى وليد منتصر يستاهل تمثال على إبراز جمال بورسعيد بالشكل ده
احلى صباحين و حتة
:)

Lemonada said...

يا بخت مصر بيك
يا بورسعيدي بيك
حندور في المكاتيب
ونلاقي صور ليك
وليد منتصر واخدها ليك
**************
حاجة كدة مش عارفة طلعت ازاي
يا رب تعجبك
تحياتي

هيثم محفوظ said...

جميل قوى اللى انتا كتبه يا احمد
حاسس فيها بروح بورسعيد بشكل كبير لدرجة ان فى كلمتين مش هارف معناهم الجوبية والفتاش ياريت بجد تجاوبنى
فين يا استاذ الحاجات اللى قولتلك ابعتهالى على الايميل
جميل يا احمد وبالتوفيق

Anonymous said...

صباحك سكر يا أجمد شاعر فى جمهورية مصر العربية
ياللى كلامك من قلبك وقلبى وقلب كل مصرى
وصورك حيه بتتحرك وتنقلنى لكل شبر فى البلد الجميله وأقعد مع ولادها الطيبين
الواحد يقول ايه بس؟
:)

last knight said...

صباحين وحتة
---------
ما شاء الله عليك يا ابن مصر
بجد كلماتك رائعة

hesterua said...

مودى
صباحك ورد يا جميل
منور

لمونادا
يا فندم تسلم ها الأدين
شكرا بجد
منورة


هيثم محفوظ
ازيك يا صديقى منور
الجوبية هى أحد أدوات وطرق صيد الأسماك المستعملة فى بحيرة المنزلة وهى شبه مصيدة بتتحط فى المية ويخشها السمك ميطلعش.......الفتاش هو الكشاف او البطارية الحجارة
والله هظبط وابعتلك انشاء الله بس ربك يبعت


وينكى
يا فندم انا مش قد الكلام الجامد ده
منوريا فندم

hesterua said...

last knight

الف شكر يا فندم
منورنى

صهيل النفس said...

ومهما أدور
ما يملى عيونى غير بلدى
صباحين وحتة