بتغنى لمين يا حمام.......لبورسعيد اون لاين

ايدين بتحضن ايدين تحى اللى مات من سنين
على الفور استعدت انغام اغنية منير الجميلة عندما دخلت معرض الفنان وليد منتصر داخل قصر ثقافة بورسعيد وتمتعت بهذه اللحظات التى لن انساها و المتمثلة واهفى هذا المزيج من المتعة البصرية و المختلطة بمتعة الشعر من احد عتاولة الشعر فى بورسعيد و هو الشاعر محمد عبد القادر الحاصل على جائزة الدولة التشجيعية هذا العام ....واهم ما فى الموضوع هو هذه المجموعة من شباب بورسعيد المكونين لموقع بورسعيد اونلاين ومنهم شباب خارج بورسعيد من 10 سنوات
الموضوع بدا عندما كنت اتصفح بريدى الألكترونى ووجدت رسالة من احد الأشخاص و يدعى شادى العربانى ووجدته يشيد بمدونتى المتواضعة ويقول لى انه من المسؤلين عن موقع اسمه بورسعيد اون لاين
و انه دخل مدونتى بالصدفة و ينصحنى بزيارة الوقع و المشاركة فيه
حقيقة لم اكن عمرى من مرتادى مواقع الأنترنت ولا من انصار الشات ولكنى دخلت هذا الموقع وفعلا اعجبت بهذا النظام وبالمشاعر الجميلة المخلصة لبورسعيد
قرات داخل الموقع عن حفل ختامى لمعرض الفنان وليد منتصر (بورسعيد فى عيون وليد منتصر)والمصاحب له ندوة شعرية للشاعر محمد عبد القادر
قررت ان اذهب هذا المعرض لحضور الندوة و مشاهدة المعرض و التعرف على هؤلاء الشباب
ولكن بمجرد ذهابى للمعرض و رؤية المجهود الرائع فى التنظيم والجهود الذاتية فى اقامته ذهلت عندما علمت ان هناك من تبرع بمبالغ كبيرة و هناك من ارسل البراويز من الأمارات وهناك من قام بتكبير الصور فى القاهرة.... و ان الفكرة كلها هى اقامة شىء لبورسعيد فى فترةالصيف
رايت كيف جعل هؤلاء الشباب المحافظ يزور المعرض وكيف جائت القناةالرابعة لتصورهم
لمست فيهم الخلاص للعمل الأجتماعى وحب بورسعيد
رايت قبل احساسهم للنجاح تشوقهم لأقامة شىء اخر لبورسعيد والرغبة فى الأنتاج لمجرد الأنتاج
لن انسى الفرحة فى عيون المهندس احمد و الذى جاء من كندا خصيصا لحضور المعرض
لن انسى شادى العربانى سبب معرفتى بهذا العالم الصغير و الذى يعيش من 10 سنوات فى كندا والذى تمتلىء رسائله لى بحب بورسعيد و الشوق لها و رغبته فى انضمامى لعالم بورسعيد اونلاين
لن انسى الفرحة بل و الدموع فى عيون الشباب عندما غنى شعراء بورسعيد الكبار للبحر و الصيادين والناس ولشوارع بورسعيد لن انسى ذلك التفاعل بين اناس لم يعرفوا بعضهم الا من ايام
فشكرا لبورسعيد اونلاين على هذه اللحظات الجميلة المليئة بالأنتماء وشكرا لشادى العربانى الذى كان سبب لمعرفتى بهذا العالم الجميل .....
طازة وعال يا ام الخلول
نعمة وناعمة يا ام الخلول

العزف على اوتار ماضى

يا ابو كف رقيق و صغيروعيون فنان محتار

لا ادرى لماذا هذا الشعور الذى ينتابنى عندما افتح مدونة الفنان عمر مصطفى و ارى هذا الثناء الرقيق على المدونة البسيطة و الجديدة خاصتى. شعور من الخجل من هذه اللفتة الرقيقة اللى متجيش الامن فنان
يعنى ثناء و نصائح واعلانات مجانية ايه ده كله يا عم عمر
اشعر انى اريد ان اقول له اكتب اى حاجة بقى يا عم عمر عشان الأحراج ده
عمر انا عمرى ما شفته بس حسيت بيه و بكلامه و كان نفسى احس بلحنه و اغانيه اللى مسمعتهمش ...بس ملحوقة

بس اسمحللى يا عمر تكون من اولى محاولاتى المتواضعة ليك ممكن تكون مدح او تشجيع معرفش
بس اللى اعرفه انى حاسس بيها و كتبتها فى خمس دقائق ....سلق يعنى

عمر مصطفى
بلمسة قلم
تقدر تذيد
وممكن تعيد
وتقدر تغزل غنوتك
وتطير بعيد
تغزل خيوط الأمل
للعيون
تفرد جناح لللأمل
ومش مكسور
جناح يضلل علينا ما يمنع نور
عمر مصطفى
بضربة قلم
ممكن تلون كل الحاجات
تحى اللى فات
وترسم لبكره طريق
وتصحى الولاد
بهمسة قلم
فى ودن الغريق
تنقذه
ويرجع برىء
بصوت القلم اللى بيجرى
على الورق الأصفر
تقدر تغنى وتكتب
حروف تعبر
موال يصبر
وتقدر تنده على الأمل
تقوله يحضر
بدمعة قلم
ممكن تنوح زى الحمام
تفصل كلام
تجمع خيوط القصايد
و تنسج غرام
للأرض
للزرع
للولاد لغناوى السلام
بلون القلم تقدر ترسم
خضرة بلادنا
سمار ولادنا
على الرض الشراقى وغرس البذور
وخشب شجرنا
اللى فى السواقى بيدور
بلمسة قلم

و اخير الف شكر يا عمر
بس خلاص

انا كنت فين لما هنتى انا هنت لما انتى هنتى

لا اعرف كيف ابدا الكلام فى هذا الموضوع . اعرف انه قد يكون سبب فى كره الأخوة من ابناء الخليج لى ....موضوع حساس وشائك وممكن ان يفهم على اكثر من معنى.
لا اجد تعبير مناسب لهذا الموضوع افضل من المد الخليجى...يعنى احسن من تعبير السيطرة النفطية او ثقافة البترول و البداوة
ايضا احب ان اوضح حبى للدول العربية كافة و لكل اغانى الأتحاد ووطنى حبيبى....الخ
ولكن الذى يقلقنى هو هذا الطوفان من الثقافة الخليجية والذى يصب تحديدا على ام الدنيا و المتمثل فى ابسط الشياء مثل الطعام حتى ان اسماء مثل الكبسة و الملفوف والكبة السعودى اصبحت مفردات عادية فى مطاعمنا و برامجنا وحتى فى مطابخنا
ناهيك عن العبايات الخليجى و انتشارها الشديد فى مختلف الأوساط الأجتماعية المصرية و حرص كثير من السيدات على اظهار بلد المنشا سواع السعودية او دبى
الى ان نصل الى الشياء الكبيرة مثل حب بعض الناس لملوك هذه الدول و سياسيها اكثر من ابناء مصر....حتى فى كرة القدم لاحظت هذا
واذا تحدثنا عن الدين فحدث و لاحرج.....منذ عدة سنوات كنت اقف عند احد المحلات المجاورة امنزلى اشترى بعض الأحتياجات للمنزل وكانت الموضة فى هذه الأيام الحديث عن عمرو خالد و لنتشاره السريع..لم اكن مشارك فى الحوار و لكنى وجدت احد الزبائن بكل بجاحة و ثقة فى النفس و بلكنة من عاش يعمل فى وظيفة وضيعة فى دول البترول يقول..... والله يا اخى مصر ما تسوى شى وشيوخها ما يعرفوا شى انبقالى 15 سنة فى ابها البلد نضيفة و الناس نضيفة و الشيوخ احسن من هنا و الأزهر خاين....
طبعا مصريتى نقحت عليا و عرق ابن البلد اتنطط فى رقابتى و قلتله سهرتك عندى يا عم ابها انت........طبعا قلت له هل تعلم كل هؤلاء الشيوخ الذين تتشدق باسمائهم كلهم تعلموا على ايدى شيوخ مصريين ؟ هل تعلم ان كل المقرئين الذين تتحفنى بهم من اول الحزيفى انتهاء بمشارى راشد اخذوا اجازتهم فى القران من مصر؟ هل تعرف ان امام الحرميين المكى و المدنى حتى الأربعينات كانوا من مصر و من الأزهر؟هل تعرف ان هذه الدول قامت على اكتاف جيش من المصريين فى بدايتها؟
هل تعرف ان اغلب شيوخ مصر نفيوا الى السعودية فى الستينات وكل مثقفى السعودية من تلاميذ هؤلاء؟.....نظر لى الرجل نظرة من لم يفهم او يقتنع و اخذ اشيائه و انصرف و هو يرمينى بنظرة معناها تيجى ايه انت امام الشباب الحلوين اللى راكبين عربيات بورش هناك

طبعا لم اجد الوقت لأحكى له عن واحد اسمه جمال حمدان قال عن مصر
(ان ريادة مصر للدول العربية نوع من التقليد و التكليف تقليد من الجغرافيا وتكليف من التاريخ)...وقال ايضا (اذا كان العرب قد عربوا مصر لغويا فان مصر قد مصرتهم حضاريا و فكريا)... واللى مش مصدق يقرا التاريخ حيث قال(الجغرافيا تاريخ ساكن و التاريخ جغرافيا متحركة)
نكمل المد الخليجى و لكن فى ميدان اخر و هو الفن فالملاحظ من طوفان الفضائيات و الأغانى الشبابية هو الضغط على كثير من المطربين و المطربات للغناء بالخليجى
والمسلسلات الخليجى العجيبة التى من راى ان المسلسلات المكسيكى افضل منها
(( او ماريا ساخبر العم خوسيه انك تخونيه مع فرناندو لو علمت ايزابيلا ستقتلك))

عندما حاولت ايجاد اسباب و مصدر لهذه الظاهرة استبعدت منها العمالة المصرية فى الخليج لأنى و اثق من عدم تاثرها هذا التاثير الذى حدث لأناس لم يغادروا مصر
ولأنى لم ولن انسى موقف حدث من 6 شهور و كنت ما زلت فى مركز تدريب و كان يزاع مباراة مصر و السعودية و اعطانا القائد راحة اثناء المباراة لنشاهدها لن انسى ما حدث لى عند دخولى الكانتين و مشاهدة التيلفزيون ورايت كمية الجماهير المصرية من جاليتنا الحبيبة فى السعودية و هى تشجع بجنون و تغنى نشيد بلادى
قلت لنفسى لأ لسى فى امل
لن انسى ايضا الفترة التى استلمت فيها قناة الجزيرة مصر من 8 سنوات ولم تكن تهاجم نظام او اخطاء او شخص لا كانت تهاجم شعب و بلد و تاريخ ومكانة
لن انسى رد فعل كل شباب الصحفيين سواء صحف حكومة و مستقلة و حتى روز اليوسف و الصحف الصفراء قاموا بالرد بشرف وزكاء و تلميح الى حبر البترول

لن انسى ايضا رد فعل ابى وهو الظابط المصرى الذى حارب اليهود وعرف ماذا تعنى الأرض و ماذا تعنى الحرب و اهمية توازن القوة....لن انسى رد فعل الرجل الذى اصيب فى العبور و استشهد اعز اصدقائه لن لنسى رد فعله عندما قال له اخى الصغير عبارة سمعها فى الجزيرة عندما ساله هو صحيح يا بابا احنا ماحربناش و كان اسمها حرب تحريك و مش تحرير سيناء؟
لم يستطيع الصغير ان يفهم معنى ان الجنود المصريين كانوا فى احتياج الى رغيف خبز ورصاصة بينما المناضلين من وراء الميكروفونات يصرفوا الملاييين فى اوروبا
لم يفهم انهم لم يرفعوا سلاح البترول الا بعد تأكدهم التام من نجاح العبور
لم يفهم ان الذى دعا لمقاطعة مصر بعد كامب ديفيد و هم المللك حسين و صدام الأثنان عملالالالالالالالالالالالالالالالالاء عملالالالالالالالالالالالالالاء للغرب و الصهيونية
لم يفهم الا عندما شاهد الملك حسين بعينه و هو يهبط بطائرته فى اسرائيل ليخبر جولدا مائير ان مصر ستحارب و تعبر القناة
لم يفهم الا بعد ان شاهد تورطات صدام و شاهد عرفات و هو يقبل نتنياهو
لم يعرف الا عندما عرف من مذكرات السعدنى كيف كانت تحاول الأنظمة العربية استمالته ليهاجم مصر وليس السادات
ما علينا ...اذن الثقة فى انفسنا كيف نحصل عليها و ننميها فى انفسنا و اصدقاءنا و اولادنا
كيف نرى كل هذا الكم لأغانى ميادة الحناوى وجورج وسوف ولا تجد الشباب يعرف قيمة كلام واحد زى منير
لماذا السىء هو الذى يظهر ونتجاهل نمازج جميلة من ابناء هذا البلد


اخر حدود العشق و التباريح
قلم مقصوف
وكام حزمة ورق مخنوقة من الركنة
كانوا اذا اتفرعن جفاف الروح
حليب المطرة والسكنى
وفرخ وليد بيستطعم اغانى الرفرفة
ويعاكس المشاوير
دلوقتى مش قادر تطعم نظرتك بالدمع
او تكسى السطور

الشاعر محمد عبد المحسن مطر

واحد بورسعيد

كانت الساعة قد تجاوزت الثانية عندما جائنى الصول و اعطانى تصريح الأجازة......تقدر تمشى دلوقتى يا احمد لو عاوز بس الحسن تستنى للصبح عشان تلاقى مواصلات.......اخذت التصريح و اعددت الشنطة و تممت على كل الأشياء
و ذهبت لأودع اصدقائى وخرجت من الوحدة لأقف فى الطريق الصحراوى وحيدا ابحث عن اى شىء اصل به الى الأسماعيليةحت اركب الى بورسعيد
وجدت سيارة ربع نقل مليئة باشياء لا ادرى كنهها و قبل الرجل مشكورا اخذى فى طريقه الى الأسماعيلية
وانا معلق فى ظهر السيارة اصارع هواء الطريق الصحراوى فاذا بسيارة مرسيدس عيون موديل 2005 تمر بجانبى و يقودها 3 فتيات لا يتعدين 25 عاما وعندما حازت سيارتهم السيارة التى استقلها او بمعنى اصح مدلدل منها وجدتهم ينظرون لى بكل بجاحة و يغرقون فى الضحك
كان واضحا تماما اننى موضوع هذا الضحك او هذه المهزلة
رغم ثقتى المفرطة فى نفسى اللى بتخلينى اخد مقلب كبير جدا فى نفسى واللى سببها انى عندى قناعة تامة ان انا واحد متربى جدا و ان ابويا اللى كان عميد فى الجيش المصرى وحارب اليهود و معاه نجمة سينا و كمية انواط تجهز عروسة واللى معاه دكتوراه فى الدراسات الأسلامية ربانى احسن تربية و علمنى احلى حاجة فى الدنياو هى حب ربنا وبلدى والناس و القراءة.....و اززاى اكون ابن بلد بجد.
المهم فى هذه اللحظة بالذات احسست انى شيوعى من الذين يظهرون فى الأفلام الرديئة
كنت عاوز اقول لهم باعلى صوتى انتوا مش احسن منى دا انا و انا وانا شعور سريع وغريب وخاطف استمر لحظات و سرعان م تلاشى بعد ان تجاوزتنا السيارة
بعد ربع ساعة وصلت الأسماعيلية وذهبت لموقف البيجو..... واحد بورسعيد يا ريس
ركبت البيجو الليلى الى بورسعيد و وجدت مجموعة متباينة من الأفراد منهم من نائم ومن يدخن فى ملل انتظارا للتحرك وفى الخلفية صوت ام كلثوم المنبعث من التسجيل القديم للبيجو.....نظر لنا السائق الذى كان من بورسعيد و قال لسى واحد بالصلاة على النبى نشيلو ونتكل على الله ..بتلقائية نظر الجميع له وقالوا له اتكل على الله يا اسطى
وعندما انتظم البيجو على اول طريق بورسعيد قال السائق التعبير المصرى الأزلى فى مثل هذه المواقف اقروا الفاتحة يا جماعة.....قرات الفاتحة فى سرى ثم اتبعتها بدعاء السفر ثم بدات امارس هوايتى العتيقة فى متابعة الطريق من شباك السيارة...اشجار المانجة المشهورة بها الأسماعيلية مع اعمدة النور مع السيارات المسرعة واضواء كشافات السيارات فى الأتجاه المقابل مع الست النبعث من المسجل القديم بالحان لا تخطاها الأذن لسيد مكاوى هذا العبقرى الجميل
(مخطرتش على بالك يوم تسأل عنى)
تمر السيارة من تحت كوبرى السلام العملاق انواره الليلية الممتزجة بانوار السيارات االمارة عليه تشعرنى ببانوراما ممتعة ..الأن اصل الى نقطة الكارتة الخاصة ببورسعيد ونتجاوزها و هذا معناه ان ما زال ربع ساعة فقط لدخول بورسعيد التى افتقدها كثيرا
الأن تظهر على يمينى قناة السويس و السفن المارة بها بأنواره القوية ومن بعيد تظهر انوار بورسعيد الحبيبة و المنفذ.....(امال غلاوة حبك فين وفين حنان قلبو عليا
لم اكن قد ذقت طعم النوم من 48 ساعة وعندما غفوت عيناى افقت على صوت السائق
حمدلله على السلامة يا جماعة الأجرة الله يصلح حالكو
عندما غادرت البيجو كان اول ما فعلته استنشاق هواء بورسعيد الحبيب هذا الهواء المشبع باليود و رائحة البحر ...عامة اعشق بورسعيد ليللآ
اخذت اول تاكسى وجدته امامى ......المعدية يا اسطى ..ماشى......ركبت التاكسى فؤجت بطوفان الأعلانات واللوح الخاصة بأنتخابات الرئاسة
بورسعيد انقسمت نصفان نصف للرئيس مبارك ونصف لنعمان جمعةو حزب الوفد باعتبار بورسعيد اشهر مدينة وفدية فى مصر
سالت السائق الذى من الممكن ان يوضع فى القاموس المصور وعليه سهم(ابو العربى) اخبار الأنتخابات ايه يا ريس قال لى ايمن نور كان هنا و نعمان جمة عمل ندوة كبيرة فى جنينة سعد
طيلة عمرى هادى و راسى ومحترم و لكن لا ادرى لماذا قلت له و انا اغنى تلك الأغنية الغريبة للمطرب الأغرب ....سعد سعد يحى سعد.... المهم الراجل ظن اننى شارب حاجة على اخر الليل ثم قال الرجل لى انت شكلك مش بورسعيدى انت متعرفش ان بورسعيد كلها وفدية ولكنى لا ادرى لماذا هذا الرد البذىء منى عندما قلت له نعم انا خواجا
ولم اسكت كررت كلامه كالسكران بورسعيد كلها.......ملوخية
عندما وصلت الى المعدية قابلت احد الأصدقاء وعندما سالته عن احوال البلد فقال لى البلد والعة فقات له اه الأنتخابات فقال لى لأ والعة حريم......المهم ركبنا المعدية (المجانية)على راى الفنان عمر مصطفى اسمع قرأن الفجر ياتينى من احد المازن البعيدة و تواشيح النقشبندى الذى اعشقه تاتينى من مكان اخر لا ادرى لماذا اشعر بالقشعريرة فى هذا الوقت بالذات و خاصة عندما يصاحب تلك المؤثرات صوت صفير قطار من بعيد او صوت نفير سفينة تغادر ميناء بورسعيد
الأن اصل للمنزل لأحضان الحبايب لللأصدقاء للجزور و اخيرا مثل ما قال مارسيل خليفة و محمود درويش
الى خبز امى واكل امى وسمك امى وسلطة امى

من الشباك

مش عارف ايه خلانى اللحظة دى عاوز ابص من الشباك ...المهم قمت و فتحت الشباك وبصيت على لا شىء . المنظر اللى شفته مخدش ثوانى و رغم بساطته اثر فيا جدا المنظر هو ولد صغير جاى من بعيد ماشى بعبثية و لا مبالاة و بمجرد ما وصل تحت الشباك بتاعى امام كابينة الرينجو قام ماسك السماعة و معلقها فى الهواء.......بس
من الناحية التانية جاى ولد فى نفس سنه راكب دراجة و معاه كتاب و كراسة و رايح درس تقريبا المهم الولد تخين و ضعيف و عرق الصيف مغرق جبهته و النضارة بتاعته بس الولد كلف نفسه و نزل من الدراجة و راح لحد الكابينة و وضع السماعة مكانها و اكمل طريقه..........بس
المشهد على بعضه مخدش ثوانى و مهما حكيت مش هقدر اوصف التناقض اللى فيه
بس مش عارف لى بعد ما شفت تصرف الولد الطيب اذا اصطلحنا تسميته بالطيب جه على بالى ادندن مع منير يا ابو كف رقيق و صغير
المشهد دا بقيت اقيس عليه حاجات كتيرة قوى من التناقضات اللى فى حياتنابس باردو الولد خلانى اقول لسىالأغانى ممكنة

عجوز بورسعيد

فى بورسعيد
لسه الناس على الشط سهرانة
رغم القلق و الحزن
رغم القلوب اللى حيرانة
و العجوز على البحر
مجربش السكات
على الشط قاعد
بسنارته
مانساش الحاجات
مانساش فلايك
على الرمل نايمة
عينه على مراكب
فى الكنال
عايمة
ولسه العجوزمجربش السكات
ويقوللى
يا احمد يا ولدى
بلدك حتة من لحمك
شوف الشماسى على البحر
مرمية
و الولاد لبورفؤاد كل يوم
معدية
ولسه العجوز ماسك
الودع يكلمه
ويحكيلو
ويحب الموج ويسمعه
وييشتم النادى المصرى
ويروح يشجعه
ويحكى العجوز و يقول
عن فدائى وظابط
عسكرى وصول
حاربوا على الشط ده
ماتوا عشانو وعشانك
دمهم نزل على الرمل ده
ويقوللى العجوز
مادام بورسعيدى
عارفك
اعرف جدك و عمك
طب اقوللك اسم امك

وعجوزنا عمره ما خاف
من حد يخونه
يمشى فى بورسعيد
مغمض عيونه
عارف شوارعنا
من ريحتها
صوتها
و يمكن غسيلها
ولسه العجوز عالشط بسنارة
والناس عالبحر سهرانة


اهداءالى
بورسعيد
اسلام العربى
عم حامد
عمر مصطفى

شعر احمد البورسعيدى

اسلوب هذا الرجل

عشقت كتابات هذا الرجل منذ طفولتى منذ 12 عام كان بمثابة الشباك اللى بصيت منه على
جميع انواع الثقافات شعر و نثر و كتابات مصرية و اجنبية تعليقات مريرة على معاناتنا و اخطائنا وحياتنا كلها
رغم انه اسما يعتبر كاتب اطفال و مراهقين الا انى ارى انه لو كتب للكبار رواية تواكب احداث هذه الآمة لكان عندنا محمد عفيفى و نجيب والسباعى بس موديل 2000
هو خلاصة عصارة تجارب كل من كتب عن الشارع المصرى و المصريين عموما
رغم انه بيكتب فى الخيال و الأساطير الا انى ابصم بالعشرة انه من احسن الكتاب اللى بيرصدو مش بس الارع المصرى و الشخصية المصريةلأ ده بيرصد التغير اللى حاصل فيهم و فى البيت المصرى عموما
مطلع على كل كتابات الغرب وامريكا اللاتينية و احداثها
التبعبير اللى اقدر اوصفه بيه انه وصصاف ايوه بيوصف و يصور كل حاجة لدرجة انى بسمع و اشم الحالة اللى بيرسمها فى كلمه
الراجل ده هو الكتور احمد خالد توفيق عبارة عن حارة نجيب محفوظ بس اللى فيها ناس يوسف السباعىاللى بيعملوا زىابطال ابراهيم اصلان بس بخفة دم حركات محمود السعدنى
بس اهم حاجة ان ده كله فى عالم احمد خالد توفيق

ناس بتحب مصر

فى ناس بتحب مصر وناس
بيحبوا مصر..... وفيه
وكل واحد له فى الحب اغنية
وكل واحد بيعشق حاجة فى بهية
وياسينها ياما ....لكين
مين هو ويط الناس
فيه ناس بتحب مصر
وناس بيحبوا مصرو فيه
وياما ليها مصر من عشاق
وياما فيها بس اه يا رفاق
فيه ناس بتعشق مهيش باينة فى البرواز
مع انها العكاز
والعدة وقت الشدة و المهماز
فيه ناس و ناس مش ناس
و ياما فيها مصر و ياما فيه
و انا اللى عاشق وعشقى لف بيا وبيه
شرققنا و غرربنا ولا تهناش
قبلنا و بحرنا ولا ضعناش
دوخنا فى حوارى الصعيد و الدلتا ما زهقناش
لفينا متعبناش...كسبنا مخسرناش
قابلنا ياما و شفنا مصر ولادة
والطلق كالعادة حامى بزيادة
وعرفت يا سادة وفهمت يا سادة
انا اللى عاشق و عشقى لف بيا و بيه
راجع انا وعشقى
منحاز انا طبقى
راجع و فى دراعى ضد ناس مع ناس
و معايا ايضا ناس


شعر ذكى عمر

فى البدء كان لون ولف

مش هقدر انسى اول يوم اكتشفت فيه هذا العالم الساحر المسمى عالم المدونات .عمرى ما كنت سمعت عن التدوين
و المدونين اليوم ده كان اخر شهر 10سنة 2004 و كنت لسه مدخلتش الجيش و راجع من الشغل الساعة 11 بالليل
يعنى امسية خريفية من النظام اللى بحبه و انا واقف فى المعدية فى طريقى لبورفؤاد قلت لنفسى اروح السيبر بتاع اسلام صاحبى اهه منه اشوفه ومنه اعمل سيرش على حاجات لفؤاد حداد كنت بدور عليها
المهم السيرش بتاع جوجل دخلنى فى كذا حاجة لغاية ما خبطت فى مدونة لون ولف
ماكنتش فاهم ايه ده موقع ولأايه المهم بدأت ادعبس هنا وهنا وكل يوم اكتشف مدونات جديدة لناس مثقفة جدا و لذيذة و مزجانجية و شعرا........و كانت عجبنى بعد كده
عمر مصطفى جدا ورحاب بسام ويسرا و دينا و الست نعامة وحمكشة وناس تير جدا
عمر مصطفى ده حقيقى فناااااااان و احساسه و طريقة حكيه جميلة قوى و وصلالى بسهولة
فنان فى احساسه و كلامه و تصويره الشعرى و حتى تصويره الفوتغرافى
رحاب بسام مشروع اديبة ناجحة جدا من الطراز التقيل مثقفة جدا معرفش بتجيب الكلم ده منين
عنده الموهبة المهنية و الموهبة الفطرية اللى هيا ان تكون قصاصة و حكاية
لون ولف ده بقى عين الصقر الواد الأسكندرانى المثقف اللى عينه بترصد كل حاجة فى المجتمع و ينقدها صح و ان كنت اختلف معه فى وجهة نظره لللأسلاميين
اخر حاجة كنت اتصورها انى اكون مدون وعندى مدونة يمكن عشان علاقتى بالكمبيوتر مش حلوة
بس بعد 10 شهور من اليوم ده رحت لأسلام صاحبى خبير الكمبيوتر واللى لم يسمع يوما عن المدونات
وفتحت الشامل فى المدونات و قلتله بص انا عاوز واحد زى ده قاللى ايه ده و ازاى
قلتله بس دعبس فيه كده وقللى و كانت ودخل ابو حميد اولى خطواته فى عالم التدوين

شط اسكندرية يا شط الهوا

اغنية من اجمل اغانى الست فيروز و رغم انى من عشاق فيروز و اغانيها ليها مكان خاص فى قلبى بس الأغنيى دى رغم بساطتها بحبها جدا يمكن عشان بسمعها من و انا صغير قبل حتى ما ابقى مدمن فيروز و يمكن عشان عشقى لللأسكندرية اللى قضيت فيها سنتين من اجمل ايام حياتى جايز المهم انى فرحان جدا عشات هتكلم عن البلد دى او بلدى التانى بعد بورسعيد زى ما بقول من زمان
اسكندرية ماريا و ترابها زعفران يعنى اجدع ناس يعنى احلى و اشيك و اجدع شباب
اسكندرية البحر و الكورنيش وبنات بحرى والسهر على الشط للصبح و الشقاوة فى المنتزه و الصياعة و التزويغ عند بير مسعود
مش عارف اتكلم عن البلد دى و اديها حقها بس هو دايما ان بشوف الشخصية السكندرانية انه شاب دماغ و دمه خفيف جدع جدا جدا ويحب يخدم و تلاقيه دماغ و مزجانجى ويموت فى محمد منير وعاشقين لبلدهم اسكندرية قوى
اسكندرية اللى عاوز اتكلم عنها اسكندرية الشتاء جنة يا جدعان
منظر الموج العالى و هو بيضرب الكورنيش و يغرق الشارع مع المطر اللى نازل خفيف والناس المزجانجية بالبلاطى و الشماسى بيتمشوا على الكورنيش و لا هممهم
و الزحمة فى محطة الرمل والناس بتجرى و اصوات الباعة بنص جنى نص جنى
ولا يا سلام على فرحتى لما الاقى كتاب بدور عليه من زمان مرمى عند اى بياع فى شارع النبى دانيال و اخد الكتاب و اتمشى من حنب المعبد اليهودى لحد ما اوصل لمطحن البن البرازيلى و اخد النسكافيه بتاعى من عند الراجل النوبى ابو بدلة......حاجة ايه اخر الاجة
ويا عينة بقى على سندوتشين طعمية بالشطة من عند محمد احمد اه اسف فلافل
و لا سمك اددورة ....يا بوى اخر عظمة و الله
اسكندرية البحر والتاريخ و اصحابى القدامى واغانى سيد درويش وصوره فى الشوارع و سنتين فى سان استيفانو من احلى سنين العمر وكبر كمية اغانى اتغنت لبلد فى تاريخنا المصرى
مش هنسى ايمن صاحبى الأسكندرانى الجدع اللى كان شغال معايا فى الغردقة و كان يعدى عليا ويقوللى تعالى اسهر معايا فى اليخت اقولله مش فاضى يا مونة يقوللى يا راجل تعالى نتكلموا و نرغو ونجيبو فى سيرة الناس شوية
و اخيرا ..... اقروا الفاتحة لأبو العباس يا اسكندرية يا اجدع ناس


كأنى كلمة من قلب بيرم
كأنى غنوة من قلب سيد

محمد منير و احمد فؤاد نجم

عايز اصرخلك و عاجز

ايدى واحدة و انتى ايدك باردو واحدة
مدى ايدك ويا ايدى
امسحى دمعة وليدى
عاااااااااايز اصرخلك و عاجز
اسمعك او تسمعينى
شىء عجيب حسيته لما كنتى مرة
كنتى مرة بتحضنينى
يا بلدنا يا بلد
هو من امتى الولد
بيخاف من امه لما
فى الضلمة تضمه
نفسى
بس اه اه اه اه
اه لو تفهمينى


ايمان البحر درويش

ايوه نفسى اقول حاجات كتير للبلدى و عن البلدى و ناسها و ولادها الكويسين و الوحشين
عنى وعنك وعن ابويا وابوك و صاحبى وصاحبك الهم واحد و الظروف واحدة و المعاناة المشتركة بس المشكلة ان انا مش كاتب ولا فنان ولا من الناس اللى يطلق عليهم مثقفين
وفى جمعية كذا و كذا بس انا عاوز افضفض و احاول اصلح لأ مش اصلح انا حتى مش عارف اصلح نفسى انا عاوز ادى نور لحد يقدريصلح و عنده النيا انه يساعد البلدى دى
و عشان كده بكتب على اددى مش هتكلم كتير عن الأنتخابات و لا السياسة
مش هكتب كتير من اساسه لأن انا بطىء فى اى حاجة فا الكمبيوتر
بس فى حاجاااااااااااااااات كتيرة وناس اكتر عاوز اتكلم عنهم علماء و شيوخ و شعراء وفنانين وولاد بلد و اصحابى كتير يا جدعان بلدن مليانة خير
عن اجدع شباب و احلى بنات عن بذور الخير اللى جوا الناس و مش حاسيين بيها
مين يعرف الشيخ محمد رفعت وعشق الصوت اللى جاى من السما ده
مين اده محمد فوزى قدره كعبقرى مزيكا احنا مش حاسيين بيه مين يعرف محمد عفيفى و يحى الطاهر عبدالله و محمود السعدنى و ابراهيم اصلان
مين يعرف زكريا الحجاوى اللى لف مصر كلها على رجليه عشان يجمع تراث الأغنية الشعبية مين يعرف عباس الأسوانى و انور المعداوى وعبد الحميد قطامش
مين سمع كلام سيد درويش و بيرم والشيخ امام و محمد منير و احمد منيب و نجم وفؤاد حداد وجاهين و عفيفى مطرو اروى صالح
مين كان عاشق لعيون احمد زكى وهو بيعمل عبقرية البساطة المصرية
مين سمع يحى غنام و عشق ضربة عود الشيخ امام
اكيد فى كتير انا و انت وكتير من ابناء القاهرة بس الحقيقى ان سبعين فى المية مننا ميعرفش مين الناس دى يا ناس لازم نتغير و نثق فى نفسنا عشان البلد تعدى


كل الشجر اخويا والنيل ابويا
منديل حبيبتى بقويا
و انا مصرى مصرى جدا

جلد النفس

مش عارف الموضوع اللى هتكلم عنه ده عقدة نقص فينا كشعوب عربية
و مصريين باللأخص و لا نوع من الفلسفة الفارغة عند بعض الناس
الموضوع بأختصار هو ان فى اى مكان فى مصر مهما كان مستوى هذا المكان
و مستوى رواده اللأجتماعى سواء كان نادى شارع سوق و يحصل فيه اى مشكلة
من اللى بتحصل فى فى اى و قت و اى مكان و لأى سبب
وبعد ما تخلص المشكلة و تبدا التعليقات لازم نسمع التعبير ده اصل احنا كدة المصريين
منجيش غير با لكرباج واللى يقولك اصل احنا كدة يا عرب عاملين زى الياى
لازم يدوسه علينا عشان نكش ......الخ
ايه ده ايه ده الله يخرب بيوتكو ..... احنا بنحاول نحى الأمل علىالأقل فىنفسناطب لى جلد النفس بقى ليه كل عقد التقص دى ليه دايما عقدة الخواجا
اكيد احنا عندنا اخطاء كتيرة و كبيرة
بس اكيد فى حاجات جميلة اكتر و مشاعر و امال و ناس تانية اكبر
ليه الناس دى ماتعرفش تاريخ البلد دى وقيمتها ليه ميعرفوش ان النبى صلى الله
عليه و سلم قال علينا ان احنا خير اجناد و اهل الأرض
لية مايعرفوش انه وصى علينا مرتين ليه ميعرفوش ان اول كتاب طبع فى اسرائيل سنة 48 و اسمه الدولة اليهودية و مؤلفه ديفيد بن جوريون قال اول حاجة لازم
نقضى على مصر ليه..........ليه
ليه محدش يعرف واحد من اكبر العشاق اسمه جمال حمدان
عاشق مصر و الشخصية المصرية حتى النخاع ليه منعرفش كمية الثراء اللى
فى الشخصية بتاعتنا و ان احنا احسن نموزج لدراسة
ا- نموزج شعب وادى النيل
ب-نموزج شعب عربى
ج-نموزج شعب حوض بحر متوسط
د-نموزج شعب اسلامى
ه- نمزج شعب افريقى
ليه محدش يعرف انه قال ان مصر هى البوتقة التى صهرت فيها شعوب العالم
و ان احنا المعدة اللى هضمت كل ثقافات العالم لتخرج خلاصة العبقرية المصرية
ليه محش بيبص للنمازج الجميلة المخلصة و الكتيرة اللى عندنا واللى هتكلم
عن كتير منهم بعد كده .....ليه
انا مش عارف بس اللى عارفه و متأكد منه ان احنا لازم نكون و هنكون انشاء الله


قبل الطوفان ما يجى وخلتنى اخاف عليكى يا مصر و احكيلك على المكنون
محمد منير

تمام يا افندم

الشنطة تمام ,اللبس تمام,معجون الحلاقة ,معجون الأسنان تمام,ملابسى الداخلية تمام
فلوسى,شاى السلام البورسعيدى العتيد,شوية اكل خفيف,الحاجات اللى زملائى و بعض الظباط طالبينها منى بصفتى مندوب بورسعيد الدائم فى الجيش
يعنى شوية برفانات و اسبريهات وبوكسرات بورسعيد بقى
ليلة السفر للجيش مشكلة بالنسبة لى
رغم انى مرتاح فى المكان اللى انا فيه بس زى ما الجوهرى صاحبى بيقول
الميرى ميرى و لو على سريرى
اهم حاجة تصريح السفر تمام عشان انا راجع وحدتى
بعد 3 ساعات بس يعنى يا دوب اسلم على اسلام و نرغى و نجيب فى سيرة بورفؤاد شوية و بعدين اصلى الفجر
وخد الشنطة و اتكل وادندن معى نفسى زى كل مرة فى المعدية من بورفؤاد لبورسعيد تراحيل مع يحى غنام
جميلة قوى بورسعيد بالليل والقمر بيغيب والشمس بيطلع و المعدية بتميل على سطح القناة
و انا بقى يا عينى واقف بالشنطة و الميرى فعلا بتحول لعسكرى زى الل بيجى فى الجرنان بلد يعنى
راجع تانى للمخلة و البيادة و الصحرا و نفذ يا عسكرى تمتم يا فندم
رغم كده الجيش المصرى اكيد اكيد فايدة لأى عسكرى دخلو
كوكتيل غريييييييييب من البشر تلاقى واحد كان بيتعلم فى اوروبا او حتى الجامعة الأمريكية مانتم مع واحد مطلعش
من بلدهم الا للجيش
قابلت ناس مش عاوز افتكرها وقابات ناس كنت بعيط يوم وداعها لأنى ممكن افقدهم للأ بد
رغم كل اللى فى الجيش بس اكيد هو تجربة انسانية جميلة جدا يمكن عيان انا من النوع اللى
بحاول اشوف الحاجة الحلوة و استمتع بيها حتى لو فى وسط الصحرا


بكرة هروح بكرة اشوفك بكرة يا صحرا السكة طويلة
شنطة خفيفة و زحمة كتيرة شايل وردة فى ايدى جواب
فرقة يحى غنام

أيمن نور؟؟؟؟؟؟؟

مش هتكلم عن تاريخو انا معرفوش و مش هتكلم عن البرنامج بتاعه عشان
مليش فى السياسة و مش هتكلم عن انصاره عشان عارف ان فيهم شباب كتييييييييييير عاشق البلد دى
ولكن.......فى اسئلة نفسى الاقى ليها جواب

مثلا بعيد عن نظرية المؤامرة ليه الأخ ايمن نورغاوى يعيط لأمريكا ودا مش كلام و احد سطحى بس الناس دى بتكرهنا و عنهم علينا من زمان و اللى مش مصدق يقرا مزكرات نيكسون
تانى حاجة فى مزكرات نبكسون فى نصيحة منه بتقول عشان تسيطر على المنطقة العربية لازم تسيطر على مصر وعشان تسيطر على مصر لازم تفرق البناء الأجتماعى فيها
و بعد كده نلاقى الأخ ايمن نور بيلعب على حتة كسب المسيحيين و الشيعة
طب سيبك من دا بص الشيعة بيتكلموا ازاى ضد السنة فى البرامج ومش ضد النظام لأ ضد مصر و المسلمين الينة المصريين و احنا عارفين ان اول الغيث قطرة
اخر حاجة الأخطاء الكتير فى جريدة الغد اللى بتظهر ثقافة ضحلة جدا للى بيكتب و تحيز واضح
يعنى ايمن نور بيطبق كل نصائح رئيس امريكا السابق للسيطرة على مصر
انا مش عارف اقول اداة و لا لعبة
بس باردو مش هقول خاين

فى شوارع بورسعيد كانت لنا ايام

بورسعيد بحر وكنال زكريات العمر
اكيد كل واحد بيحب مدينته بس باردو اكيد عشقى لبورسعيد حاجة تانية معرفش اكتب ولا اعبر
بس حد عارف يعنى ايه تعشق شوارع مش بس بملامحها لأ دا بريحتها كمان يمكن دا العبق اللى بيقولوا عليه؟
بورسعيد عندى البحراللى بعرف افرقه من مليون شط وريحة اليود اللى تسطل و الشط دا ياما
شاف من ايام اللعب على الرمل و انا لسى 3 سنين و اول ما عرفنا معنى التزويغ
كان المكان الوحيد الأمن هو البحر
بورسعيد ليها رونق فى كل وقت من اوقات اليوم .
بورسعيد الليل و البحر والسهر على القناة و اجدع شباب و احلى بنات و اللف طول الليل على طرح البحر
وزحمة التجارى قبل العيد و رحلات الصيد والشبار و ماتشات النادى المصرى و المعدية وبورفؤاد و مدرستى و اصحابى بورسعيد الشياكة واللبس و البارفانات المستوردة
بورسعيد و ايام الشقاوة والأمل اللى غازل عيوننا اللى نفسه يبقى الضظوى واللى امله يكون زى محمود ياسين او عمرو دياب واللى نفسها تكون سكينة فؤاد او حتى هالة سرحان و نقول و مالو ما كلهم كانو فى بورسعيد و بياكلو شبار زيينا
بورسعيد و اخف دم فى الدنيا حتى بياعين السمك ..ابيض ويمين يا شبار..واللى يقوللك..حلو السردين طازة وسمين..
و شبار الكنال وكده و الشبار بالمناسبة هو البلطى
بورسعيد و اكتر ناس متعصبة لبلدها و النادى المصرى
بورسعيد اول بحر عمت فيه اول صلاة فى الجامع العباسى اول نادى شججعته المصرى
بلدى مش هقدر اديكى حقك بس اكيد هكمل تانىان شاء الله

تعالى نلضم اسامينا

من زمان و انا نفسى اكتب عن البلد دىالشخصية دى عن الشخصية المصرية من كل النواحى من اول الناحية

الدينية مرورا بالثقافة لغاية ثقافة الفقاقة و الفهلوة يمكن اللى طلعها فى دماغى انى عاشق للبلدى ودا مش كلام اغانى بس حقيقى
انا لازم اكتب عن كل شبر شوفته فى بلدناو عن كل شخصية قابلتها و ادتنى و خدت منها لازم اتكلم عن الشخصيات اللع عاشقة مصر فى
صمت اللى بيعمل عشانها حاجات كتير من غير ما يتكلم ولو ابسطها غرس حب البلد دى فى ولاده الصغار وصحابهم
هاتكلم عن ناس كتير عن بورسعيد و القاهرة و اسكندرية عن الفلاحين و الصعايدة عنى و عنك
عن الولد العترة والصبية الحنان زى ما قال عم فؤاد حداد
و خلينا نغنى مع صلاح حاهين ونقول حلوة يا بلدى

هات ريشتك هات الوانك و ارسم على الأرض مكانك

الله يا منير

فى المواقف اللى زى اللى انا فيها دلوقتى مش عارف ابدا اول تدوينى بى ايه

و انا مش ال كاتب اللى هوا ولا المثقف اللى هوا و لا حتى بفهم فى الكمبيوتر و شغله

بس اللمشترك بننا انى عاوز اتكلم عاوز اعللى صوتى بالغنى حتى لو كلام مش هيشوفو حد غيرى

و عشان كدة مسكت ر يشتى و الوانى و ها حاول يمكن يقدر الزمان يفهمنا

احمد البورسعيدى