قصيدة جميلة جدا واعتقد انها نادرة جدا باردو خبطت فيها و انا بدور على حاجات لعمنا صلاح جاهين
مش عارف ليه حاسس انى عاوز ادونها فى الوقت ده بالذات بس القصيدة فعلا جميلة ومعبرة
من النوع اللى بيقولوا عليه السهل الممتنع بتاع صلاح جاهين
صلاح جاهين كان بيجاوب عن السؤال التقليدى اللى بيساله اى طفل لأهله
السؤال اللى سألته بنت صلاح جاهين لأبوها هو يعنى ايه ربنا؟
وبعيدا عن اسئلة العقيدة والتوحيد والتى اؤمن تماما بأهميتها الا اننى وكبنى ادم كبير الأن لا امتلك الا ان ارفع القبعة تحية لصلاح جاهين , لا ادرى سبب اعجابى الكبير لهذة القصيدة رغم عشقى القديم لصلاح جاهين و قرائتى لأغلب اعماله الا ان هذه القصيدة وصلت قوى و رشقت فى قلبى ودماغى
يعنى ايه ربنا
ربنا
مين اللى نور الكرة الأرضية
مين اللى دورها كده بحنية
مين اللى فى الفضا الكبير علقها
متقعش منها اى نقطة مية
مين اللى عمل البنى ادمين
مفكرين و مبدعين
مين اللى ادانا عقول و قلوب
و شفايف تسال هو مين
مين اللى دايما صاحى واخد باله
و كلنا بنحبه جل جلاله
ربنا
احنا بنحب ربنا
و ربنا بيحبنا
و يحبنا اكتر كمان
لما نحب بعضنا
عمل الفراشة بأجنحة و ذوقها
و كل فكرة مدهشة حققها
البحر حطله ملح لجل يعوم
و مسابش حاجة الا لما خلقها
مين اللى لما بنطلبه يسمعنا
و فى وقت الحزن يشجعنا
و لما نفرح نشكر مين
على انه بسطنا و متعنا
مين اللى قلبه علينا واحد واحد
ربنا
سألتنى طفلة قلت هو ما بيننا
موجود فى كل مكان وبيبص لنا
بيشوف بنسعد بعض ولا لأ
و مالخطر يحرسنا و يحوش عنا
فى كل مكان ربنا موجود
جنب الضعف و جنب المجهود
يا ربنا انت جميل
ومفيش كمثلك فى الوجود
مين الصديق اللى مفيش غنى عنه
و كلنا بنحبه و نخاف منه
ربنا
5 comments:
شبه اغانى مصطفي كامل
يخرب عقلك يا فوزي ضحكتني جدن جدن جدن
..
هو اللي كتبه عم صلاح ده فوق مستوى النقد ؟؟ قرآن جديد مثلا ..
و بعدين مين قالك انه نقد ؟؟ انا و ابليس من كبار محبي مصطفى كامل .. و من كبار منظري صوره الشعريه الحيه
مش كده يا بيسو
روق كده يا فوزي .. و عم قول يارب
ولاااااه
ابليس و هيثم
كل سنة وانتوا طيبين اولا
ثانيا
شكرا للظروف الجميلة اللى اتاحتلى
اقابل حد يشاركنى فى عشقى لمصطفى كامل
وعلى رأى معشوقنا
لو لم اكن مصريا لوددت ان اكون مصريا
فوزى
يا عم المفترى
هو عشان ابليس متسلسل اليومين دول بسلاسل رمضان هتفترى عليه
استنى بعد العيد و شوف ابو الأباليس بجد
lol
كل سنة وانتوا طيبين
انا قريت القصيدة دى قبل كده وكان مكتوب تحتها تنويه انها كانت رد من جاهين لطفلة مش فاكرة هي مين بتسأل يعنى ايه ربنا ؟؟؟ القصيدة فعلا بتخاطب طفلة بكل مافيها من بساطة ف اللفظ والمعنى لكن افتكر انها مبقتش ترضي عقول الكبار اللي زينا واللي معظمهم بيعلنوا بكل جحود انه مفيش حاجة اسمها ربنا لمجرد انهم مش قادرين يكونوا بسطا زي الأطفال
قصيدة حلوة قوى يا احمد ..قريتها زمان قوى وفرحت لما فريتها دلوقتى
Post a Comment