Tuesday, January 31, 2006

عصفورة

يوما ما كنت اقضى الليل نائما فوق سطوح احد المكاتب العسكرية فى الصحراء الشرقية , لم يكن يشاركنى فيه الا قمة شجرة مانجة بها عش لعصفورة صغيرة , كان يومى يبدأ فى السادسة صباحا , وكانت تبدأ فى الزقزقة فى السادسة الا ربع , ولذلك كانت اجمل نغمة منبه طبيعى فى حياتى
يوما ما سأتذكر تلك العصفورة التى فارقتها نسبيا منذ شهران , وسأفارقها نهائيا بعد شهر

صباح الخير يا عصفورة

يا أول لقطة فى الصورة

وأقرب نغمة فى براحى

بأجمل لحن فى صباحى

من عشك

فوق شجر المانجة

واصلنى غناكى يا كمنجة

يا أول غنوة فى طريقى

وراحة نفسى من ضيقى

صباح الخير

صباح الخير يا مزيكتى

ودندتى هنا

صباح الخير يا عصفورتى

يا جارة الهنا

و احلى غنا

لأول حد بشوف

وأقرب حياة جنبى

يا أجمل نهار معزوف

بزقزقتك على قلبى

دا ضحك الفجر علشانك

بقصيدة فرح محتارة

وقصيدة عشق من كفى

و لاتكفى

وصفى حتى لجمالك

ورفرفتك على جيرانك

وأنا منهم

و أولهم ..وأخرهم

مفيش غيرى

يقدر يوصفك قدى

ومن بعدى كلام فى كلام

ومن بعدك مفيش احلام

يا عصفورتى

ألف سلام


احمد

7 comments:

Lasto-adri *Blue* said...

يابختك ياعم بالعصفورة حتى لو ح تسيبها.. هى الدنيا كدة.. بنتقابل عشان نودع بعض.. بس هى بتمشى بتساهيل ربنا... المحظوظ فينا اللى يعيش الفترة بين اللقا والفراق فى ذكريات حلوة يشلها معاه، ويطلعها يفتكرها كل ما يفتكر ان الدنيا ضلمت عليه

شكلى ح قول شعر.. بس مش قد بتاعك.. يلا اتمنالك تخلص الجيش دة بقى على خير ونقول لك كفارة وكدة

سلاماتى

ادم المصري said...

يا بختها دي العصفورة
لو تعرف ان فيه حبيب بيحبها حبك ليها
لاسابت العش وجاتلك برجليها

أبوشنب said...

أول مره أشوف حد في الجيش يقول شعر

أنت كنت سلاح التلميذ

ولا كنتو بتصيدو عصافير في الجيش

ربنا يخليلك عصفورتك

بس على فكرة ممكن تتطوع وتنام جنبها على طول

إنسان said...

بجد ؟
يبقي زي ابو شنب ما قال

hesterua said...

لست
بالظبط هى الذكريات الحلوة
ادم
مش مسألة حب بس يمكن الفة ومشاركة
ابو شنب
منورنى يا ويلد العم
انسان
اه والله بجد

Itis-only-words said...

كلامك لمسنى وحبيته وفهماه لان الحاجات دى بعشها بس كنت فاكره انى حسه بيها لوحدى
ساعات الواحد يتوه فى تفاصيل الحياه الصغيرة ويبقى نفسه يتوه فيها علطول
ساعات الواحد يبقى نفسه يقعد كده تايهه فى العصفورة وفى الشجر وورق الشجر اللى بيطير فى الخريف من شارع لشارع كانه بيودع الشوارع لحد الخريف الجاى والشخصيات العتيقه فى بلدنا ودلسبس يوم الخميس والزحمه وليلة القمر لما يكون كامل ويبقى منور بورسعيد وسهرة الشباب عند البحر اليله دى ويفضل كده علطول تايه بس محال طبعا
بس ارجع واقول زى صلاح جاهين
انا اللى بالامر المحال اغتوى
شفت القمر نطيت لفوق فى الهوى
طلته ما طلتوش ايه انا يهمنى
وليه مادام بالنشوه قلبى ارتوى
مش عايزه اطول عليك بس لو معندكش مانع ابقى ابعتلك الموقع اللى بشتغل فيه لما يكمل تقول لى رايك فى حاجات صغيرة كدة كنت كتبها

hesterua said...

شكرا يا باشا
وبعدين رأى ايه اللى تخديه
عيشى التجربة واكتبى وميهميكيش حد
واهلا بخامس مدونة بورسعيدى