Saturday, October 07, 2006

اهداء لواحدة بتحب المكان ده


كتير ما بسرح فى الخيال
واطير وادندن غنوتى
والحلم لو بعيد محال
أغازله وارسم ضحكتى

وأكتب قصيدة تعيش
وأقول لحزنى مفيش
والفرح لو ميجيش
ساكن فى احلامى

شايفه هناك مرسوم
عارف هقابله فى يوم
من غير عتاب ولا لوم
هيحنى ايامى

وارسم حاجات ياما
ورداية ويمامة
وقرص شمس كبير
وتطول المشاوير
يصاحبنى قرص الشمس
ويمامة تعزف همس
واعشق سما العصافير
واحلم
اعدى
اطير
ولو نهار روح
وقابلنى مليون ليل
عاشق انا وساهر
بتعب لكن قادر
احلم بمليون فجر
وطريق غنوة وبحر
وفرح بكره يزيد
وسفينة جاية بعيد
فيها النهار مولود
وفى يوم اكيد موعود
هقابله فى طريقى
يبللى ريقى
يدينى معنى الحلم
والضم حروفه فى اسم
يطرح غنا واشعار
ليكى يا رايحة معاه
على الشطوط لساه
بيمدلك ايدو
عيدك طرح عيدو
وفرحك اكيد جواه
هتلاقى نص معاه
والنص فى جيوبك
بس انتى مش شايفاه
يمكن ساعات حساه
لكن زحام العمر
خلى العيون السمر
خايفة من المشاوير
من حتى بكره الجاى
شفتى يا حلوة اززاى
من كلمتين منك
عرفت اكتب شعر
وحتى لو مش شعر
يمكن كلام عادى
يمكن كلام فاضى
حتى ولو فاضى
اهو لجل ما تبكيش
وبكره جاى منسيش
والمره دى ليكى
احمد
عدسة.. وليد منتصر

13 comments:

وليد منتصر said...

خفيف وسارح وطاير وف نينى عينه بريق شعة أمل .. نبض بكرة ..

أحمد شلبى

soha said...

kalam gameel yemla el wa7ed amal we e7saaaaaaaaas

radwa osama said...

حلوة القصيده ده ..كل سنه وانت طيب

Rivendell** said...

عاشق انا وساهر
بتعب لكن قادر
احلم بمليون فجر
وطريق غنوة وبحر
وفرح بكره يزيد
وسفينة جاية بعيد
فيها النهار مولود
وفى يوم اكيد موعود
هقابله فى طريقى
يبللى ريقى
يدينى معنى الحلم


الله عليك

Omar said...

من كلمتين منها تعمل ده كله؟ مين بنت اللذينا دي؟ دي جامدة جدااا :-)

حلو حلو حلو يا احمد

وينكى said...

قد ايه حلوه جدا واحساسها عالى وتلمس القلب
تحياتى ليك

Hafsa said...

قصيدة حلوة و كلماتها طعمة و هادية

hesterua said...

وليد منتصر
ع البركة يا عم...وشكرا ع التظبيط
سهى
منورانى وشكرا بجد
رضوى
فينك...شكرا وكل سنة وانتى وعمرو بخير
غواص
شكرا يا جميل ومنور
عمر
حبيبى يا شاعر
كل سنة وانت طيب يا صاحبى...ومبسوط صدقنى انها عجبتك...والمشكلة انهم كلمتين فعلا ...مش عارف حلوين ولا وحشيين بس كلمتين
وينكى
شكرا يا باشا
حفصة
حلوة طعمة دى
))
شكرا ومنورانى

rosealia29 said...

مبدع يا زيفاجو .. حامل تذكرة سفر للهبوط على قلب أي إنسان و بدون استئذان ..

hesterua said...

مش قد كلامك ده انا يا روزاليا
مظبطانى انتى دايما بكلامك
مبروك المدونة
احمد

أمل said...

القصيدة طالع منها صو ت البحر

هي اغنية مش شعر بس

:)

حلو

ساعه الغروب said...

هايله يا أحمد

بجد انتقاءك لكلماتك حلو جداومعبر جدا
و احساسك عالى جدا


شكرا ليك بجد

أنـــا حـــــــــرة said...

الله عليك

بجد زجل جميل جدا
لا أولا نيجى للصورة
متاخدة حلو قوى قوى
و ليها بصمة لوحدها كده من قبل ما تقرأ القصيدة

ثانيا بقى القصيدة
ما شاء الله يا أحمد
الإحساس واصلو الكلمات بتنساب كده بنعومة قوى
أجمل حاجه عجبتنى روح القصيدة نفسها
الأمل اللى بينطق منها
ياااااااااااه ياريت بكرة يسمعك و انت بتتكلم عنه كده و مايخذلكش

ربنا يوفقك
و تحياتى للملهمة عاشقة المكان