ليا نصيب أقابلك صدفة
قبل ما تاخدى القطر وتمشى
قبل ما يخدك بحر الدنيا ولا أعرف فين نتقابل تانى
عمرى ما كنت فى يوم وحدانى
عمرى ما كنت بدمع وابكى
لكنى بكيت لما عرفت اننا بنقابل بعض لأخر مرة
ولما عرفت اننا هنكمل من غير بعض
رعشة برد أجتاحت روحى
رجعت أقول لو كنتى تبوحى
لو كان قلبى يقول ويبوح
مكنتش لما أفتكرك مرة أبات مجروح
مكنتش لما الدنيا تمطر
اتوه واتبعتر وأنا بفتكرك وانتى بتجرى فى طرح البحر وع الكورنيش
لما الاقى الحزن فى عينك أقولك مالك مترديش
لما الاقى ألو تشبهلك...تيجى فى بالى ولا أسمعكيش
ليا نصيب نتقابل صدفة
علشان أحضن فيكى الدنيا وأكمل وحدى وأقدر أعيش
اللوحة من أعمال وليام ويتكر
أحمد
10 comments:
مؤلمة يا بن عمي .. مؤلمة بجد ..
بتوجع اوى فعلا
مش هيه دى الدنيا
نلاقى حاجات و تتوه منا
و نتوجع
و ساعات تانيه
تلاقينا حاجات
و دايما فيه قدر و مكتوب و صدفه
من الوجع والشجن ويمكن الألم يبدا الجمال والأمل
حلوة اوي
راثعه بجد بس مؤلمه اوى
تحية كبيرة على الكلمات المعبرة بحق
تحس واحد بيفارق وهو جواه الشخص اللى بيفارقه
وأحييك على التنويه عن اللوحة
دى أول مرة ألاقى حد فى المدونات بينوه عن اللوحة ويذكر هى من أعمال مين
دة يدل على فهمك للفن أو على الاقل احترامك لحقوق الملكية الفكرية
اللوحة أكثر من رائعة وهى معبرة بحق ولفتت نظرى جدا لذا سعدت للغاية حين وجد التنويه عنها
تحياتى
تحضن بيها الدنيا وتقدر بعدها تعيش
ارجوك قولى هتعمل كده ازاى
الاقى الحزن فى عينك أقولك مالك مترديش
لما الاقى ألو تشبهلك...تيجى فى بالى ولا أسمعكيش
ليا نصيب
جزئ ده لمسني بجد
بنتلمس وجوه تاهت عننا
وجوه خدها منا بحر الحياة
ممكن تجمعنا تاني بيهم صدفه؟
جميله اوى واحساسك عالي جدا
تحياتي يافندم
جميل يا فنان
بس انا برضه عايز اعرف
انت ليه مكسور كده
معلش متزعلش منى بس بجد انا بحترمك زى اخويا الكبير
روزا
منورانى يا قمر
شكرا
دنانير
فينك يا عم
شكرا بجد على كلامك الجميل دايما
كراكيب نهى
منورانى والله
شكرا ورأيك يشرفنى
حسام
ازيك يا بلد
شكرا يا عسل
ياسمين
منورانى بجد
مدونتك وكلامك حاجة جميلة حقيقى وسط صخب كتير
شكرا
مريم
تعالى وانا اعلمك
محض روح
منورنى يا باشا
شكرا يا جميل
باسم
لا يا ابن عمى
مفيش انكسار يا قمر
الحمد لله
انت اللى واحشنى
طمننى عليك بقه
ماشاء الله بجد جميله جدا
واحساس الوجع والجرح واضح قوى فى كلماتها ويمكن ده اللى بيمنحها بريق خاص
دمت بخير
Post a Comment