Thursday, April 19, 2007

عمر فتحى


أصوات كثيرة لازمتنى منذ الطفولة , بداية من صوت ايمان البحر درويش و عمر فتحى اللذان احببت دفئ صوتيهما , مرورا بفيروز , ثم محمد منير الذى اقتحم حياتى بقوة فترة المراهقة , وصولا لعوالم مختلفة من الموسيقى انفتحت عليها منذ دخولى المرحلة الثانوية , دائما كنت أستطيع أن اجمع كل ما هو متاح من أغانى من أحب , الوحيد الذى لم أستطع ان أحصل له على أى شئ هو عمر فتحى اللهم الا بعض التسجيلات التى كنت أقوم بتسجيلها من الراديو
وفى يوم
من عشر سنين
بعد درس الكيميا
وتحت المطر
كنت واقف مع يوسف صاحبى
مستنين أخته اللى هتوصلنا بعربيتها
ولما ركبت العربية
خطفنى صوت عمر فتحى من الكاسيت
وهو بيقول
الناس لازم يطلوا ع الناس من حين لحين
كنت دايما بحب عمر فتحى
اتفائل لما اسمعه
بحة غريبة فى صوته
كانت بتحسسنى بدفا جميل
وشجن أجمل
ويومها
كان أول شريط اسمعه لعمر فتحى
عرفت كمان
انه منزلش غير 4 البومات
كل واحد فيهم بيبدأ ب كلمة ...على
على ايدك
على سهوا
خلصت تانية ثانوى
وتالتة
ويوسف واهله راحوا عاشوا فى مصر
عدت سنين
وسنين
ومعدتش اعرف حاجة عن يوسف
ولا أخته
لكن كل ما اسمع عمر فتحى افتكرهم
ومن يومين
بفتح الأميل لقيت رسالة
من حد معرفوش
كان بيعمل سرش على أغانى عمر فتحى
وخبط فى موضوع كنت كاتبه عنه فى منتدى بورسعيد
فقرر يبعتلى
ويضيفنى
ويقوللى انه بورسعيدى زيى
وانه بيحب عمر فتحى
ويتكلم
واتكلم
واكتشفت
ان اخت يوسف
بقت أم يوسف
وان يوسف بقه فى فرنسا
وان الشخص اللى خدت منه اغانى عمر فتحى
صدفة من 10 سنين
بعد عشر سنين
بيطلب منى أغانى عمر فتحى دلوقتى
صدفة برضه
عمر فتحى مات سنة 1986 وهو عنده 34 سنة بسبب ازمة قلبيه نتيجة لمرضه بالشريان التاجى ,
أغنية عمر فتحى يوم 8 ديسمبر مع فرقة المصريين
أغنية عمر فتحى البنت دية من البوم على سهوا

11 comments:

Alexandra said...

عندي ليك هدية لما توصل مصر او نتقابل بأي شكل. شريطي المفضل، موشحات لفرقة رضا بصوت عمر فتحي وفؤاد عبد المجيد

rosealia29 said...

ياااااه يا أحمد .. الزمن ده كان جميل .. صوته في وداني أول ماشوفت صورته ..


بجد ألف شكر ..

sara said...
This comment has been removed by a blog administrator.
Omar Mostafa said...

الله يرحمه.. كان صوت جميل ومميز

مريم said...

من صغرى ليا ناس احبها من غير سبب










































































من صغرى ليا ناس احبهم من غير سبب وحاجات احبها من غير سبب ومن الحاجات دى ضحكة عمر فتحى

hesterua said...

الكسندرا
مستنيه من زمان يا باشا
وشكرا مقدما
ومنورانى طبعا

روزا
منور يا عم
طبعا هو من عنوانين المرحلة


عمر
منور يا صاحبى
الله يرحمه فعلا كان صوت دافى ومميز


مريم

منور يا عم
ايه البراح ده كله
ابتاسمته دافيه برضه
ابسط يا عم

saso said...

وانا جيتلك في سيرش صدفة عن عمر فتحي برضة
مع اني مكنتش بحبه زيك
بس فاهمة انك تحس بارتباط مع مطرب او اغنية
هاتكلم كتير ليه
خد يا احمد لينك لألبوم علي فكرة لعمر فتحي كامل
هـنــا
ولو عاوز البوم تاني او موشحات فؤاد عبد المجيد بصوتة قوللي

أما عن الصدفة اللي حصلتلك فبجد غريبة جدا ان نفس الشخص تقابلة مرة تانية بسبب نفس الاغاني اللي اخدتها منه

ahmedfarouk said...

اشكرك على احساسك المرهف و تعبيراتك الراقيه

ahmedfarouk said...

ممكن استعير خواطرك عن عمر فتحى

ahmedfarouk said...

الذى نتشارك حبه من اجل مجموعتى ع الفيس بوك

ahmedfarouk said...

مع الاشاره بالطبع لصاحب الخواطر ارجو الرد وتقبل احترامى