Monday, December 12, 2005

صباح الخير يا بورسعيد...............للشاعر البورسعيدى محمد عبد القادر

صباح الخير يا بورسعيد

صباح الخير.. يا مملكتى

يا تاج راسى..وكراسى

ونبراسى..فى معركتى

يا أول ارض قابلتنى

و انا مولود

مكنتش أخر العنقود

لكين محسود

على حنيتك ليا

شربت العشق بعنيا

و انا بحبى

و كان سحبى لحبل الصيد

مخلى الرزق يفرحبى

و كان البحر سلطانى

و خلانى

أسيرك حتى فى الغربة

و لما بتبقى متحاربة

باسرسب روحى وادخلك

ما انا ضلك وانا خلك

وانا الماضى اللى فاضلك

وانا اللى طلعت من بطنك

شبه وطنك

اموت لو حد متقصد

يدوس فوق شبر من شطك

بدون اذنى

و بيخلصنى من حزنى

صفا ريحك

وتسعدنى تفاريحك

و اعيادك و بولادك

يدوم اسمك

وعمر الحب ما يخاصمك

مادام حافظة وداد ناسك

ولادك هما حراسك

وانا منهم

لو انت فى يوم ندهتيهم

فى وسط النار حدفتيهم

محدش يخلفك وعده

وبالختمة على عينيهم

لا بيقولك لسان قولك

وعين خوفك على حمولك

ويحمولك تراب لقدام

سنين قدام

صباح الخير يا بلطية

يا اول صورة مصرية

على بطاقتى

واول عشق فوق طاقتى

واول ام نطقتى

عيالك مالطى وجريكى

وعرفوا يعاملوا نرويجى

وهندى وروسى و ايطالى

طالعلك و لا طالعالى

يا صوت حالى و راسمالى

ومهما اتعب ويجرالى

مابستغناش فى يوم عنك

ما انا منك انا ننك

وانا اللى فى غربته سمعلك

ولما تعوزى يتبعلك

و يرجعلك

صباح الخير








2 comments:

change destiny said...

جميلة جدا و بورسعيدية جدا

hesterua said...

شكرا على زيارتك المدونة اولا

ثانيا
محمد عبد القادر من اكتر الناس اللى قدرت تلمس روح بورسعيد بجد