شعور غريب وانا وياكى
لسه معاكى
ليه الغربة وانا جواكى
وانا اللى كنت عاشق للحاجات
طالما فيها اسمك
انا اللى كنت بلضم الحكايات
فى فلك عشقك
ليه اتغرب
وانا لسه من النيل بشرب
واتوضى منه
وادعى
حلمنا يقرب
اول مرة اشوفك قاسية
على حكاياتى
على احلامى
اول مرة اشوفك قاسية عليا
اول مرة
اسمك يهرب من غناويا
رغمن انى
اول مرة كتبت قصيدة كانت عنك
واخر مرة كانت ليكى
واول غنوة واول لحن
كانوا لعينيكى
يعنى معاكى
وانا جواكى
يمكن مرة بعدت شوية
مرة قسيت
قولى نسيت
بس الحاصل انى رجعت
حتما جيت
راجع شايل الحكايات و الحواديت
حافظ غنوة و لا نشيد
وعمر بعيد بيقول الأه
اهه وطالعة من جوه الضلوع
أه يا زفرة دافية
تقدر تنشف بحر الدموع
أه يا زفرة قوية تقدر تحرك كل القلوع
دا مركبى فى بحرك
عشقان انا شطك
موعود انا بارضك
مشتاق انا لحضنك
زيفاجو
3 comments:
اللى كنت بلضم الحكايات
فى فلك عشقك
ليه اتغرب
وانا لسه من النيل بشرب
واتوضى منه
وادعى
حلمنا يقرب
جميل يا أحمد :)
انت اللى جميل و الله
انت كنت فين من زمان
على فكرة انت شاعر جميل قوى
بتعرف تمسك الأحساس قوى
فرصة جميلة انى عرفتك
فرصة اجمل يا عم هانيبال والله
تحياتى انا كمان
Post a Comment