Saturday, December 24, 2005

مصطفى قاللى..............انت قفل

البداية كانت مبشرة بليلة جميلة من اللى بتهون ليل الجيش الطويل زى ليل الشتا اللى احنا فعليا فيه , وكنت قد انتهيت من اعمال اليوم الطويل حيث كانت الساعة قد تجاوزت الواحدة , وعليها غيرت افرول الجيش رغم انه ممنوع وضربت الترينينج سوت والشبشب الزحافى اللى صوتوا بيحسسنى بالحرية فى جو الجيش الملىء بالرتابة
ما ذلت احمد ربنا على الوحدة اللى بقضى فيها فترة الجيش وهى عبارة عن وحدة هادية على طريق اسماعيلية القاهرة وبينها وبين بورسعيد ساعة واحدة بس
واجمل حاجة فيها هى التجربة الأنسانية الجميلة والمتمثلة فى الصحبة والتناغم الجميل اللى بينا وبين بعض , حيث ان المكتب فيه 13 عسكرى منهم 8 من القاهرة و2من قنا و2 من احد محافظات الدلتا (اللى قالولى يا قفل) والعبد لله من بورسعيد
طبيعة شغلى جعلت كا تعاملى مع شلة القاهرة وواحد من قنا عشان شغلنا بالليل اساسا
العادى ان لما الشغل يخلص اغلب المكتب بيروح ينام الا شلة الأنس زى ما بيقولوا علينا هناك و احنا اللى بنشتغل باليل على التيلفونات وامن المكتب والطوارىء وكده
طبعا بنقضيها ضحك وتيلفونات وكمبيوتر ومحاولات فاشلة فى الطبيخ لغاية الساعة 7 صباحا بعدها نصحى باقى المكتب وننام لغاية العصر
قوم ايه
انا ماشى بالشبشب بطرقع على الأرض بانشكاح وماسك مج النسكافيه اياه فى ايدىورايح بقى لشلة الأنس عشان نبدأ الليلة - قصدى الشغل-قوم الاقى الجوز بتوع الدلتا ماسكين التيليفون ...قلت عادى سيبهم يكلموا البيت ...اصل الجوز دول ممنوع يردوا على المكالمات من اساسه , بس لما قربت لقيتهم بيكلموا واحدة قلت عادى يا واد سيبهم يحبوا
الظريف بقى انى لقيتهم بيضربوا اى نمرة فى بلدهم يعاكسوها...اه والله عشوائى
طبعا بكل ظرف قلت ليهم كده ممكن نروح فى داهية فا يا ريت تروحوا تناموا
مصطفى بقى يقوللى ايه...دا البت بتسحب كلام وتقوللى النمرة دى فين
قلتله خلاص لو اتصلت تانى سيبنى ارد
قاللى هتظبط ...قلت اه هظبط
لما البنت اللى عندها اظهار اتصلت رديت بكل رومانسية
ولما سألتنى النمرة دى فين قلت ليهابنفس الرومانسية دا سنترال طرح البحر بمدينة نصر
طبعا عنوان وهمى فى القاهرة رغم انه موجود فعلا فى بورسعيد
طبعا الجوز الحلوين اتجنوا وبكل عبقرية قالولى ...دى مش هتتصل هنا تانى
قلت عارف..قام مصطفى قاللى ايييييييييييييه
انت شكلك قفل متعرفش تكلم بنات , انت طلعت خرونج يا احمد
ما علينا..........وبتجاوز رد فعلى
الليلة عدت وسهرنا وضحكنا وسمعت شريط عمرو الجديد اصل مكنتش سمعته
وطبخنا حاجة غريبة بس جميلة فكرتنى بالبتاع اللى عمر عمله
واحنا بناكل افتكرت موقفين بقى فطسونى من الضحك
الأول بتاع عادل امام فى شاهد ماشفش حاجة.....قاللى يا خرونج
والتانى بتاع صلاح السعدنى وكرم مطاوع فى الرائعة ارابيسك...انت خرونش
بس اللى هزنى مش الكلمة ...عشان هى هايفة على حاجة هايفة ومن واحد .....همم
مش عارف
ومش عارف رد فعلى اللى كان نظرة معبرة جدا بالسخرية ( و لا احمد ذكى والله)بجد
بس حمدت ربنا على الرد اللى كان على لسلنى ومطلعش واالى كان مليان بمركبات النقص اياها واللى الحمد لله انها جوايا ومحدش سمعها
يعنى كنت اقوله دا انا اعرف بنات عمرهم ما دخلواالقرية بتاعتك
و لا استشهد بمجموعة القاهرة اللى لما كنت فى ضيافتهم ورحت اقابل واحدة من شلة الجامعة فضلوا يحكوابينا وبين بعض عن الصاروخ اللى عرفتهم عليه
و لا احكى ليه عن بورسعيد و شقاوة بورسعيد
مش عاوز اعمل متواضع واحط ايدى تحت دقنى واتقمص دور بطل من ابطال عاطف الطيب واقول انا غلبان والله
بس فعلا انا فى حالى وماليش فى التظبيط والحوارات...بس اللى واثق فيه تماما انى
مش قفل ومش خرونج


3 comments:

islam yousef said...

مش عارف ليه و انا بقرا البوست ده حاسسيت انك مش بتقضى فترة تجنيدك و ان اللى انت بتحكى عنه ده كانك بتصيف او بتتفسح ,اقولك ..انت اديتنى امل كبير بس مش عارف اذات كان الامل ده واهم و اللا لأ لأنى لسه هالبس فى شهر واحد و منتظر الفرج و ان ربنا يكرمنى بوحده مستريحه دا طبعا بعد فترة التدريب ربنا يعديها على خير و يعدى فترة تجدنيدك هو انتا لسه لك اد ايه ؟و على فكره هوا الكلام عن المواضيع دى مسموح و اللا دى اسرار عسكريه

hesterua said...

شوف
بالنسبة للكلام فى المواضيع دى
انا مش كاتب اشارة للمكان او الوحدة او السلاح وكده
هى مجرد مذكرات
بالنسبة لموضوع التصييف
دا أر بقى
))))
هى مكان كويس قوى والحمد لله
يعنى مش مسرح مثلا لأ بكون هناك لمدة 10 ايام واسبوعين وعشرين مثلا
بس مع ناس كويسة وشغل كويس
بس اهم حاجة بالنسبة ليك انها تجربة ثرية جدا وهتعدى اكيد
يعنى متقلقش

Abdelrahman said...

وحتى لو كتبت يا دوك مفتكرش إن حد حياخد باله.. ولو خد مش حيهتم. أنا بكتب أي تفاصيل مفيدة في السياق المم ميكنش فيها معلومات ممكن تفيد حد من حبايبنا.. وبعدين الخوف على الجيش مش من العساكر المدونين، أنا وانتا عارفين اللي بيحصل جوا بقى وخلي الطابق مستور :)

إجابتك في كلمة واحدة يا إسلام: كوسة!

وفي كلمتين..
متقلقش من الجيش يا صديقي لأنك حتتعود عليه قبل ما تعرف وكمان حتتعلم فيه حجات كتير حتفيدك طول حياتك. عايز أقولك إن مش شرط فترة مركز التدريب تكون أصعب فترة، ممكن العكس تماما. وممكن متروحش مركز تدريب خالص. وممكن وحدتك تبقى زي أحمد أو أحسن كمان. في ناس بتقعد بالشهر وأكتر متنزلش أجازات وفي أماكن متعبة وبعيدة جدا عن بيتهم، وفي ناس بتاخد مخلتها وتقعد في البيت لحد نهاية فترة تجنيدهم. وفي بقى كل ما يمكن أن تتخيله بين هذين القطبين. وكل ده يعتمد على حاجة واحدة بس: "كوستك مين" زي ما بنقول في الجيش.

مع إن يحزنني جدا إني أقولك كدة، لكن نصيحتي إنك تبتدي تظبط كوستك (أو كوساتك) من دلوقت. هو ده واقع الجيش المصري.