Wednesday, May 09, 2007

من كشكولى القديم

أنا كل ما بكتب بعدك
بلقانى قصايدى جريحة
وألقانى بقول فى كلام
مالهوش ولا لون ولا ريحة
بقه كل غنايا حزين
وحروفى دموع وأنين
مش قادر أفضل واقف
ولا عارف همشى لفين
أنساكى وأكتب غنوة
للفرح ألقاها بتبكى
أمحيها وأكتب تانى
تطلع غنيوة بتشكى
وانا نفسى أفضفض و أحكى
لكن راح هحكى لمين
ما انا كنت زمان بحكيلك
خلاص يا حبيبتى مشيتى
هكتم جوايا وهبكى
امبارح قلت أكتبلك
فكتبت قصيدة حزينة
مفيهاش ولا بيت للفرح
مكسورة بلون حكاوينا
ورجعت أتوه فى العمر
من شط لشط لمينا
ما أنا كنت زمان غرقان
ولقيتك ليا سفينة
دلوقتى رجعت اتوه
مش لاقى لقلبى مدينة
وكل ما بكتب بعدك
بلقانى قصايدى جريحة
أحمد

7 comments:

nour said...

انا اول واحده:)))
ده كشكولك القديم؟؟امال لو كان الجديد كنت عملت فينا ايه؟؟؟
حلوووة اوىى بجد
تحياتى

Geronimo said...

طلع اللى ف جراب الحاوي
والكشاكيل المدفونة


الحاجات دى تستاهل
نقراها

mariam said...

انهاردة كنت بدندن بتغنى لمين يا حمام
وافتكرتك..عايزاك لما تقرا كلامى تدندن معايا وتبطل حزن

Amr Ahmed said...

برافو

كلماتك رائعة

بقولك ايه

ماتنشرنا شوية كده

بس كتير
من الكشكول القديم ده

hesterua said...

شكرا لكل من اهتم بالرد

tagreba said...

الله الله يا احمد.. حسّك حلو يا جدع، مغنواتي عُقر :-)

arab girlscool said...

This is such a nice addition thanks!!!
عرب كول
شات صوتي
شات مغربي
إنحراف كام
شات عرب كول
صوتي
دردشه صوتيه
سعودي كول