أنا كل ما بكتب بعدك
بلقانى قصايدى جريحة
وألقانى بقول فى كلام
مالهوش ولا لون ولا ريحة
بقه كل غنايا حزين
وحروفى دموع وأنين
مش قادر أفضل واقف
ولا عارف همشى لفين
أنساكى وأكتب غنوة
للفرح ألقاها بتبكى
أمحيها وأكتب تانى
تطلع غنيوة بتشكى
وانا نفسى أفضفض و أحكى
لكن راح هحكى لمين
ما انا كنت زمان بحكيلك
خلاص يا حبيبتى مشيتى
هكتم جوايا وهبكى
امبارح قلت أكتبلك
فكتبت قصيدة حزينة
مفيهاش ولا بيت للفرح
مكسورة بلون حكاوينا
ورجعت أتوه فى العمر
من شط لشط لمينا
ما أنا كنت زمان غرقان
ولقيتك ليا سفينة
دلوقتى رجعت اتوه
مش لاقى لقلبى مدينة
وكل ما بكتب بعدك
بلقانى قصايدى جريحة
أحمد
6 comments:
انا اول واحده:)))
ده كشكولك القديم؟؟امال لو كان الجديد كنت عملت فينا ايه؟؟؟
حلوووة اوىى بجد
تحياتى
طلع اللى ف جراب الحاوي
والكشاكيل المدفونة
الحاجات دى تستاهل
نقراها
انهاردة كنت بدندن بتغنى لمين يا حمام
وافتكرتك..عايزاك لما تقرا كلامى تدندن معايا وتبطل حزن
برافو
كلماتك رائعة
بقولك ايه
ماتنشرنا شوية كده
بس كتير
من الكشكول القديم ده
شكرا لكل من اهتم بالرد
الله الله يا احمد.. حسّك حلو يا جدع، مغنواتي عُقر :-)
Post a Comment