Wednesday, May 23, 2007

غنواية للبحر....و م البحر





من صغر سنى
وأنا بعشق البحر اكمنى
تاخدنى النسمة واروحله كتير
وأحب النورس لما يطير
وبغنى للموج يسمعنى
زمان نادانى
وقاللى تعالى يا وحدانى
جريت ع الشط فى ثانية لقيت
بنوتة عيونها ولا الحواديت
خدتنى الدنيا ..روحت وجيت
على صوت البحر بيندهنى
ورجعت تانى
البحر بيتى وعنوانى
تملى أروحله وانا مجروح
أحكى وأشكى أقوله وابوح
أعمل مركب اسيبها تروح
للشط التانى بأحزانى
أحمد
الصورة ل..خوليو...بعدسة.... وليد منتصر

10 comments:

نفسنا said...

تم أفتتاح العدد الأول من مجلة نفسنا
نتمنى منكم زيارتنا

Unknown said...

اولا تحية و انحناءة لوليد ع الصورة الاولانية

وبجد والصفحة بتفتح متخيلتش انه خوليو تخيلته موديل

الصورة جامدة موووووت

الصورتين التانيين بقة حلوين بس حاسة انى شايفة خوليو زي ماهو عاوز يكون ودي حاجة جميلة

وزي مابيقولي عيشي جيرو


عيش خوليو :) انت باشا والله يابني

الغنواية بقة يا شلبي لوحة كده هاند ميد مطعمة بالصدف والحواديت


تسلموا

Lemonada said...

يا بخت البحر بيك

بس يا حرام حيستحمل اي ولا اي البحر
كويس انو كبير

بس اي بحر بتشكي احزانك وبتتكلم معا؟؟

كلامك جميل وبيلمس القلب

الصورة جميلة جدا جدا

عين جميلة اكيد خوليو جميل بس المصور اجمل
مش عارفة بس دايما بحس انو المصورين جنود مجهولين ؟

Anonymous said...

يا أحمد يا بورسعيدي ... أنا بقرا مدونات بقالي أكتر من سنة ... أول مرة أعلق ... أنا مبسوط قوي إني قريت مدوناتك ... عترت بالصدفة في تدوينتك اللي عن شط اسكندرية ... حبيتها قوي وقريت شوية تدوينات تانية بسرعة وقلت لازم أبعت لك ... على فكرة أنا قاهري بحب اسكندرية وبحب من اسكندرية وبعشق بورسعيد وليا أصحاب كتير جدا من هناك ويا ما رحتها هفرح قوي لو تعارفنا واتقابلنا ف طرح البحر أول ما آجي بورسعيد

مريم said...

انا بقى البحر بيكلمنى
البحر الابيض اجع ناس

sara said...

الله مين العسل اوى ده اللى بيحب البحر ده واللى بيموت فى النورس دى واللى عامل فينا كل ده

rosealia29 said...

إحساس عين .. بجمال قلب .. بريحة بحر .. بحروف زهر ...



=


متعة ما بعدها متعة ..



ألف شكر بجد ..

hesterua said...

شكرا لكل من اهتم بالرد

تحياتى

meroooo said...

البحر ده بحر بورسعيد انا واثقه ان الشط دي شط بورسعيد
انا من عشاق البحر بروحله كل مابحس اني محتاجه حد يسمعني وبس بروحله
ويسلم كلامك تاني

صهيل النفس said...

البحر بيتى وعنوانى
تملى أروحله وانا مجروح
أحكى وأشكى أقوله وابوح
أعمل مركب اسيبها تروح
للشط التانى بأحزانى