Thursday, September 15, 2005

ثلاثى بورسعيد.......بنى سويف رايح جاى

عندما علمت بخبر كارثة بنى سويف كنت فى الوحدة بتاعتى (الجيش) وقلت مش لازم اكتب عنها فى المدونة .....بس اول ما مسكت الجريدة و قرات اسماء المصابين و قرات اول اسم فى المصابين شعرت بمدى الفاجعة
الولد ده من بورسعيد عندنا و صاحب اخويا الصغير جدا ولأن اخويا ممثل مسرحى اساسا
و اول ما رجعت بورسعيد اكتشفت ان البورسعيدية الثلاثة اللى ماتوا اعز اصدقاء اخويا
وماتوا بعد الحادثة بفترة
كل ما اسمع المعاناة اللى عانوها قبل الوفاة حاجة كده الله ما احفظنا
انا مش عارف اكتب حاجة عن الموضوع ده
رغم انى حاسس بيه اوى
رغم ان بيتنا عاش جذء من الماساة من دموع اخويا على اصحابه
مش عارف اتكلم عنه و لاعن زكريات اصحابه
و لا عن مسرحياتهم المشتركة مع بعض
و لا عن زياراته اليومية للمصابين فى الحادثة
و لاعن حفل تابين قصر ثقافة بورسعيد ليهم


انا مش قادر اعبر رغم ان اسهل شىء نعبر عنه هو اللى حاسن بيه
بس اكيد هتكلم بعد كده عن الماساة دى

1 comment:

وينكى said...

انت لمست جوايا جرح مانسيتهوش.. بس كنت باحاول اطيبه ومش قادره
الحادثه دى اكيد ليها صدى فى أى بيت مصرى
لأن اللى استشهدوا فيها أهلنا وأصحابنا وزمايلنا واخواتنا
يكفى مشهد موت المخرج علاء المصرى - الله يرحمه- فى القصر العينى بعد معاناه يومين بحالهم قدام عينين أختى اللى كانت بتتابع حالته الصحيه بصفتها طبيبته وتلميذته فى المسرح الجامعى
يكفينى موت صديقى محمد شوقى طالب معهد الفنون المسرحيه, وخطيب أعز صديقه ليا, واللى كانوا هايكتبوا كتابهم بعد العرض دا طوالى
أنا عارفه ان دا غلط , لكن بصراحه .. شهر شعبان ارتبط جوايا بالموت من السنه اللى فاتت
امبارح كان دورهم.. وبكره الدور على مييييين؟؟