Saturday, September 17, 2005

كحلى العيون ........الى مصر

كحلى العيون واكشفى المكنون
و فكرينى بزمن
ينسينى الزمن
و ارمى بذور الأمل
جوه الولاد
ورشى السماد
فكرة وقلم
لتطرح غناوى
تحكى الحكاوى
فى حوش البيت
وفسحاية
و ستى تغنى غنواية
لولد اسمر
وبنوتة
وجد بيحكى حدوتة
عن فرحة فى قلب مكبوتة
والحزن فى نظرة مبعوتة
لفين ما تروح
حنين الروح
بيرسملى
حمامة نايمة فى برج سطوح
و ارجع ابوح
ويسمعنى
ويفهمنى
ويرجع يلملم حكاويا
فى امنية واغنية
يرد صداها فى الحارة
وفى الشارع
وفى الفضا
وسرب الحمام راجع
على عشه
و لا يغشه
ابتسامة الصياد
صفرا على وشه
والضمى كل الحارات
ويا البلاد
فى حدوتة
واجمعى كل الولاد
فى الدوار
وجنب الفرن
حواليكى
وبايديكىيشوفوا
لكره
فى عينيكى


دكتور زيفاجو

3 comments:

Omar said...

مش واخد بالي من آخر 3 أبيات يا احمد.. لكن جميل جميل، تسلم ايديك صحيح

hesterua said...

شكرا يا فنان

و بايديكى
يشوفوا
بكره
فى عنيكى

sad_doraa said...

ايه ده اي وقت تقرا فيه التعليق اعرف انك جامد جدا حلو الكلام زيادة عن اللزم انا نفسي اتعرف عليك لو تسمح انا متابعة جيدة جدا وكلامك قريب قوي من القلب