على بالى

لا ادرى لماذا استحضر كل الذكريات الجميلة عندما اكون فى الجيش
حاجات كتير اوى بكون عاوز اكتب عنها وبنسى
بحاول يكون معايا ورقة وقلم وادون اول باول بس طبيعة الجيش متسمحش بكده

امس حدث معى ذلك الموقف المعروف حينما كنت اسير وحيدا على البحر حيث اننى من عشاق بحر بورسعيد و لكن فى مرحلة ما بعد الصيف حيث الهدوء والجمال
قابلت احد الأصدقاء لم اره منذ سنوات حينما تعرفت عليه فى الغردقة اثناء فترة عملى هناك
كان يمشى وحيدا ايضا و دار ذلك الحوار الأزلى

انت فين يا عم؟
اهو الدنيا بقى والجواز
اتجوزت؟
اه يا ابنى و عندى مريم دلوقتى
ما شاء الله
لسى فى الغردقة؟
لا سبتها من زمان انا فى مرسى علم دلوقتى فاكر ايامنا فى مرسى علم.؟
فاكر طبعا كانت احلى ايام كنا فيها و كانها امبارح
وانت فين دلوقتى؟
فى الجيش
يا راااااجل
يقولى انت عارف كنت لسى فى سيرتك مع مين من كام شهر؟
قلت اكيد الريس حسن سفاجا
قال لأ كاترين
قلت بذهول كاترين هى رجعت مصر
قالى انت متعرفش دا انا كنت فاكرك عارف من 4 سنين دى كانت قالبة الدنيا عليك فى القصير
وهى فين دلوقت؟
رجعت فرنسا تانى

بقية الحديث كان من عينة بتشوف فلان وعلان سال عليك

و لما سيبته ومشيت
كنت ما زلت فى حالة ذهول
كاترين يا بنت الأيه
انتى لسى فاكرانى
و انا عمرى منسيت الأيام دى
اول تجربة عمل خارج بورسعيد و فين فى الغردقة وفين فى مجال السياحة
وفين فى الغطس فى يخت سفارى كنت اعيش داخل البحر الأحمر لمدة اسبوع سفارى

كاترين دى بقى حكايتها حكاية
حتة بنت فرنساوية كما يقول الكتاب كانت شغالة غطاسة فى احد شركات السياحة
الموقف الأول معاها لما سمعتنى بسمع على ادى اغانى فرنك سيناترا كنت اخدها من احد السياح الأنجليز
بصراحة البنت كانت دماغ وبتتكلم عربى مكسر اوى
وبدات المساومة المشهورة
اعلمك فرنساوى شوية شوية
و تعلمنى عربى شوية شوية
والحوارانجليزىطبعا
ايااااااااااااااااام
ومرت الأيام
ورجعت بورسعيد و الكلية
وانا غيرت تيلفوناتى وهى رجعت فرنسا وغيرت محل اقامتها والأميلات مفيش
وبعد 4 سنين اكتشف ان هى بتدور عليا رغم انها كانت على بالى علىطول

تجربة الغردقة دى عاوز اتكلم عنها
تجربة ثرية جدا عشت فيها فى ساحل البحر الأحمر كله من غارب حتى برانيس وشلاتين تحت
اكلت اكلهم وغنيت اغانيهم وحضرت افراحهم
عرفت ثقافة ساحل البحر الأحمر التى هى عبارة عن مزيج من النوبى على الصعيدى على لمسة خليجية بحكم الجوارو العمل المشترك فى البحر
عاوز اتكلم عن القصير البلد الجميلة القديمة جدا
و مرسى علم الحلم الجميل ليا فى يوم من الأيام
عن ناس كتير قوى من عينة شغال فى الساحة على ما تفرج

عاوز اتكلم عن شغل البحر نفسه
و اززاى بتعرف الناس على حقيقتها فى البحر
و البحر باليل عامل اززاى
عاوز اتكلم عن العبابدة والجعافرة
عاوز اتكلم عن الجزر و صيد السمك

اكيد هتكلم عن التجربة دى انشاء الله