Tuesday, September 20, 2005

مد الخطاوى

بكره ....الأمل والحدوتة اللى لسى مسمعناهاش ومستنينها
بكره....الأمانى المتعلقة و الأغانى المتشعلقة فى الوعود
بكره...الوعود والورود والرغبة فى اثبات الوجود
بكره...اللى بكتب علشانه وعلشانى
بكره...الوعد والفكرةوالعهد
بكره...الخوف والقلق
بكره...اللى مستنيه


مدالخطاوى يا بكره
محتجلك
و بشتقلك
و بستعجل قطر النوم
لأجل ما اقوم
واصبح فيك
و اندهلك....تلاقينى
جنب الهرم
مستنيك
تفرحنى وتروينى
بمية نيل
تشد الحيل
تخلينى
جزع نخيل فى العالى
فى مرمى الشوف
اقدر اشوف
ملامحنا
و ارسمها بمليون لون
الونها
و مليون ايد ارسمها
تشد ستارة
و تدخل شمس
تنورلى
ضلام الأمس
بحنية تصحى
الولد
و بلمسة ينفض ليله
و يغسل وشه و يتوضى
بمية نيله
ويحكيلنا على حلمه
و لايهمه
كابوس الليل
و امبارح


1 comment:

Tamer Atef said...

مدالخطاوى يا بكره
محتجلك
و بشتقلك
و بستعجل قطر النوم
لأجل ما اقوم
واصبح فيك
و اندهلك
******
اه الجمال دي !! السطور دي مكتوبه بحرفيه عليه مشأ الله عليك يا احمد..أظاهر والدي كان عندو حق لما قال " ان الذي يولد ليعيش علي ارضك..حتما سيكون مبدعا"