Saturday, September 17, 2005

سلمى صباحى ....احمد عسيلى....اياد مراد

الأسماء البسيطة الجميلة دى مش عارف ليه عاوز اتكلم عليها
بسبب ظروف العمل و بعديه الجيش لم اكن متابع هؤلاء الثلاثة
ولكن عندما رايت احمد العسيلى ومن اول لحظة عرفت انى سوف اكون من اكثر معجبيه
طبعا التوليفة اياها اللى بعشقها لوحدى من زمان
يعنى منير على فيروز على جاهين وفؤاد حداد على احمد ذكى و داود عبد السيد مع بهاء طاهر وكام احن لزياد و سيد درويش
و اهم حاجة حب كبيييييييييييييييير للبلد دى و رغبة كبييييييييييييييييييرة للتغير للأحسن
غير انه مثقف جدا وخفيف الدم يعنى من النوع اللى ممكن تشوفه فى القاموس المصور
و عليه سهم ....شاب مصرى جدع ابن بلد

نفس النموذج ده لاحظته مع الجميلة سلمى صباحى المزيعة فى دريم واللى عرفت ان هى عضو فى فريق يحى غنام الجميل
مع الثائر اياد مراد هما بيزيعوا فى برنامج جديد اسمه شبابيك و تقريبا هو برنامج يومى بصراحة هما اللى فى البرنامج
بساطة وجمال فى الحوار و على دراية كبيرة بظروف البلد السياسية و الثقافية
اشعر و نا اسمع هؤلاء بمصر و ريحة الزرع اللى فى الأرض
بحس بالفخر ان عندنا ناس لسى بالخير ده بعيد عن طوفان المكياجات و العرى
بعيد عن اللهجة اللى فايحة منها ريحة البترول

شبابيك دريم ده بقى غحقيقى بفرح لما اشوف برنامج زى ير الديكورات والحاجات اللى مش بفهم فيها


حاسس بمنير بيغنى
ايدين بتحضن ايدين
تحى اللى مات من سنين

7 comments:

سامية جاهين said...

أنا بقى ماكنتش أعرف قد ايه أحمد العسيلي ظريف لغاية ما قابلته وجها لوجه لأني مش متابعة التلفزيون أوي -كنت شفته باين مرة واحدة على مزيكا وسمعته على الراديو -بس كل الناس كانت بتقوللي انه بيحب صلاح جاهين جدا وتقريبا بيقول رباعية في كل حلقة وكنت مشتاقة جداً اني أتعرف عليه وظني ما خابش :) هو صحيح لاسع ومجنون لكن ماهواش مدعي ولا متفزلك ولا هايف. هو انسان صادق مرهف الحس وأهم من ده كله انه مجتهد

ترقبوا بقى حلقة الخميس القادم أو اللي بعده بنقول فيها أنا وهو أجزاء من قصيدة على إسم مصر

hesterua said...

اولا ده شرف ليا ان الأستاذة سامية جاهين تزور المدونة بتاعتى
حقيقى انا مش عارف اقول ايه
و اسمحيلى اسجل اعجابى بمدونتك و تاثيرها على المدونين المصريين
و اسمحيلى احييكى على تعريفنا بالقنبلة الأدبية اللى اسمها احمد حداد
اللى كلامه فعلا للشارع و من الشارع

احمد عسيلى فعلا صادق وده اللى واصلنى
و مستنى البرنامج
و اسمحيلى تانى اشكرك على تشريفك مدونتى

سامية جاهين said...

يا سيدي كتر خيرك أنا كده حاصدق وآخد قلم في نفسي :)

من غير ما أسمحلك ولا حاجة، ده شيء يسعدني وأكيد يسعد أحمد. أنا حاوصل له مقالك وكلامك الجميل عنه ومتأكدة انه حيفرح جداً

تحياتي

Omar Mostafa said...

بصراحة يا ابو حميد أنا مبقيتش أتابع التليفزيون غير بالصدفة، وبرنامج شبابيك ده شفته مرة أو مرتين في بداياته، والحقيقة كنت محبط جداً من مستوى البرنامج..
أنا معرفش أسماء المذيعين ومعرفش ان كانوا غيروهم أو هم نفسهم بقوا أحسن، بس اللي انا شفته كان مأساة تليفزيونية بكل المقاييس، والحكاية كان واضح ان هى نحتاية مثالية، في محاولة لتقليد نفس النوعية من البرامج في قنوات لبنان، لكن للأسف اللي انا شفته كان محاولة مش بطالة لتقليد الشكل، لكن الروح كانت في الضياع..

أتمنى يكون الموضوع بقى أفضل، وتحياتي للشباب اللي بتحكي عنهم، واللي انا معرفهمش

hesterua said...

يا عمر انا عارف ان البرنامج بيالد الفضائيا اللبنانية
عشان كده انا قلت اياد
و سلمى الصباحى هما اللى فى البرنامج
عندك سلمى صباحى دى مدمنة صلاح جاهين ومثقفة جدا
وش بتعتمد على لبسها او المكياج
و شوف دى كمان
عضوة فى فريق يحى غنام
بس الباقى انا معاك فيه تماما
عشان كده قلت هما اللى فى البرنامج

Anonymous said...

أحمد العسيلى أنا ماعرفتهوش الا من برنامجه المتميز على نجوم اف ام
م الاخر.. نموذج للشاب اللى اتمنى انى ارتبط بيه.. الثقافه والذكاء والمنطق وطبعا خفة الدم اللا متناهيه
اما سلمى بقى فليها حوار تانى
أعرفها من ايام الجامعه
انسانه ليها كاريزما فى اى مكان بتكون فيه
النجمه اللى الكل بيحلم يوصلها
النسمه اللى بنستنى انها تهب علينا عشان تلطف حر الصيف
يمكن مدونة ملامح قالت عنها اللى مش هاقدر اقوله هنا
بس بجد .. مصر لسه بخير مادام النماذج دى فيها

. said...

بحبك يا مصر ونفسي ارجعلك رجعتوني للايام بس هانت بكرة انا راجع