Monday, October 10, 2005

لسى

عدت سنة ولسى الحاجات متلونة
لسى القمر عاشق السهر لنتهاه
لسى الندى على الشجرسهران معاه

لسى الكتاب مفتوح
لسى القلم بيبوح
لسى الغنيوة بتتطلع
رغم ان الصوت مببحوح

لسى الورد مستنى الربيع
لسى الزهور بلونها البديع
لسى الولد بيحلم ببكره
لسى السحاب بيفوت سريع

لسى البنات بترسم ورود
لسى بنسمع حكاوى الجدود
لسى الحروف بتولد كلام
ولسى الكلام امل مولود

لسى الهرم سهران وحيد
لسى النيل جاى من بعيد
لسى العلم بيرفرف هناك
ولسى الولاد حافظة النشيد

لسى الكورنيش للمعشقة
لسى العصفور للزقزقة
لسى الجمال جمال الروح
و لسى القلوب متجمعة

لسى الليل متحنى
لسى النهار مستنى
لسى القمر بيسابق شمس
ولسى الفجر نفسه يسمعنى

1 comment:

وينكى said...

كلامك بجد اكتر من رائع
كل حاجه قريتهالك عجبتنى, وبجد مش قادره اكتب تعليق عليها لأنها أحلى من انى اقول عنها حاجه
لكن بجد انا باعانى من الاخطاء الإملائيه فى كلامك يا احمد
حاول تشوف حل للموضوع دا
وما تزعلش