Wednesday, October 19, 2005

محاولة

يوم ما حاول يكون حلمه
مقدرش مسكتش
حاول يكون حتى حروف اسمه
معرفش
كان نفسه يقول انه عافر انه بطل
انه مصمم وقادر
بس الحاصل كان ببساطة
انه بجد بقى نفسه يطاطى
يصبح واطى
وانه يجرب يمسح جوخ
جايز مرة يلمس حلمه
حتى ولو يصبح ممسوخ
ساعة ما حاول يكتب غنوة
ساعة ما تاهت منه حروفه
طارت الورقة
ونشف حبر القلم من خوفه
جرب تانى يعيد الكرة
حاول يرسم غنوة لبكره
الليل طول
اللون باهت
الصوت ساكت
حاول تانى يظبط خطه
الريشة طارت
حب يدور على شماعة
يعلق فشله
عاب على زمنه
عاب على دنيا براح ملياه
قال ببساطة مهيش سيعاه
خاف من بكره


7 comments:

Omar said...

شفته

hesterua said...

مش فاهم يا عمر
الصيام بقى
وضح يا فنان
lh ,wgja

Ahmed Shokeir said...

بس المهم إنه حاول

أبو حميد .. بصراحه عاميه تحفه

Omar said...

شفته في اللي انت كاتبه يا دوك، كإنه قدامي

hesterua said...

عمر شكرا يا فنان وصلت
احمد شكرا يا جميل وكل سنة وانت طيب

ادم المصري said...

علي فكرة انت فاضح الراجل ده اوي اوي انا تقريبا كنت مستني اسم معين يمضي تحت القصيدة ... ويقول انا اللي كنت بحاول .. وبصراحه انا كمان عارفه .. زي ما عمر عرفه بالظبط لانك فاضحك .. قصدي فاضحه

hesterua said...

ادم
هو مش بالظبط كده
بس من ضمن اللى بيحصل ليا ولناس كتير قوى
ممكن تغير مبدا عشان حاجة
الحاجة دى ممكن تكون حاجة
وممكن تكون مصلحة
و ممكن تكون حياة او موت

والمبدا ممكن يكون شرف
او مزاج
او اسلوب حيياة
او حتى طريقة لبس
وكده وكده وكده